Read Waray Samarenyo Meaning Based Mga Darahonon 27 Bible Online

Mga Darahonon 27 - Waray Samarenyo Meaning Based bible

Mga Darahonon 27

¹Ayaw gud paghinambog mahitungod han buwas nga adlaw. Diri ka maaram han mahinanabo tikang yana ngada buwas.

²Ayaw gud pagdayaw han imo kalugaringon; an iba nga mga tawo an pagpabuhata hini—bisan an mga diri nimo kinikilala.

³An kabug-at han baras ug bato diri mahitatanding han kamabug-at han kasamok nga kanan kalurongan nahihimo.

⁴Mapintas ngan nakakadaot an kasina, kundi diri gud ini ikatatanding han pangabugho.

⁵Mauruupay pa nga sawayon ha dayag in usa ka tawo, kay nga makahunahuna hiya nga waray mo panginlabot ha iya.

⁶Bisan kon nakakapasakit ha imo in sangkay, an tuyo niya maupay. Kundi pagtagam, kon aagbayan ka hin kaaway.

⁷Kon busog ka na, an dugos imo didirion, kundi kon ginugutom ka, bisan an mapait nga pagkaon matam-is gihapon.

⁸Sugad hin tamsi nga bulag han iya salag an tawo nga bulag han iya puroy-anan.

⁹Nakakalipay ha imo an mga agwa ngan maghamot nga lana, kundi an kasamok nakakabungkag hin murayaw mo nga hunahuna.[44]

¹⁰Ayaw hingalimti an imo o an kan imo tatay kasangkayan. Ayaw pakibulig hin bugto kon aada ka ha kakurian. Labaw pa nga makakabulig ha imo an amyaw nga hiraniay, kay hin usa nga bugto nga hirayo.

¹¹Pagmakinaadmananon, anak ko, ngan ako magmamalipayon; may-ada ko igbabaton han bisan hin-o nga nasuson ha akon.

¹²Makita ngan malikay an may buot nga mga tawo han tiarabot nga kasamokan, kundi matapo lugod han kasamokan an tapang nga tawo, ngan ha orhe iya ini pagbabasolan.

¹³An bisan hin-o nga lurong nga nagsasaad hin pagbayad han utang hin tawo nga diri kinikilala,[45] angay kuhaan han iya kalugaringon nga hiagi, basi magamit hin pagbayad.

¹⁴Gabay lugod nimo igmaldisyon an imo sangkay kag hin pagpukaw ha iya pinaagi hin goliat nga pangumosta.

¹⁵An asawa nga mamugo ngan maaringasa sugad hin tubig nga nagtitinuro dida hin adlaw nga mauran.

¹⁶Uunanhon mo hin pagpahilom ha iya? Nagsari ka na ba hin pagpugong han hangin o pagsalod hin lana[46] ha imo kamot?

¹⁷Nahibabaro an mga tawo tikang han igkasi-tawo, sugad nga ginbabaid an puthaw hin igkasi puthaw.

¹⁸Pagmangnoi an kahoy nga igos ngan magkakamay-ada mo mga igos nga kakaonon. Pagpapasidunggan an surugoon nga nagmamangno han iya agaron.

¹⁹Imo ngahaw bayhon an hikikit-an mo nga nalambong ha tubig ngan hinkikit-an mo dida han imo kasingkasing an imo kalugaringon.

²⁰An mga ungara han tawo sugad han kalibutan han mga patay; may-ada pirme dapit para han ngatanan.

²¹Ginpupurog han kalayo an salapi ug bulawan; mahihimo liwat nga pagsarihan an dungog han tawo.

²²Bisan haros mo patayon in usa nga lurong pinaagi hin latob, diri ka gud makakakuha han iya pagkalurong.

²³Pagmangnoi gud hin maupay an imo mga karnero ug kabakahan,

²⁴kay diri kadayonan an manggad. Bisan ngani an mga nasod may-ada kataposan.

²⁵Garaba an sakati, harasa an kabanwaan didto han kapungtoran, samtang nanunubo pa an sunod nga mga sakati.

²⁶Makakaghimo ka hin mga panapton tikang han barahibo han imo kakarnerohan, ngan makakapalit ka hin tuna pinaagi han kwarta nga palit han iba nimo nga kakandingan.

²⁷Mahatag hin gatas para ha imo ngan han imo panimalay an mahibilin mo nga mga kanding, ngan para liwat han imo mga surugoon nga kababayen-an.