Read Waray Samarenyo Meaning Based Mga Darahonon 28 Bible Online

Mga Darahonon 28 - Waray Samarenyo Meaning Based bible

Mga Darahonon 28

¹Napalagiw an mga magraot bisan waray naglalanat ha ira, kundi an tangkod nga tawo maisog sugad hin liyon.

²Kon nakakasala in usa nga nasod nagsasarusaliwan an iya mga punoan. Kundi magmamarig-on ngan magpapadayon kon may-ada mag-aram ngan masinabuton nga mga pangulo.

³An punoan nga nagtatalumpigos han mga pobre, sugad hin makusog nga uran nga nakakadaot han mga tanom.

⁴Kon diri ka natahod han balaod, imo dinadapigan an mga magraot; kundi nakontra ka ha ira kon imo ini gintutuman.

⁵An mga magraot diri maaram han katadongan, kundi adton mga nagsisingba han GINOO nakakasabot hini hin maupay.

⁶Mauruupay pa an kablas ngan tangkod nga tawo kay han malimbong ngan riko nga tawo.

⁷Maaram an batan-on nga nagsusugot han balaod. Kaarawdan han iya amay an nakikigsangkay han mga bugoy.

⁸Kon magriko ka pinaagi hin dagko nga mga patubo ngan sumingabot ka hin mga tawo, mahingangadto an imo manggad hin tawo nga maloloy-on han mga kablas.

⁹Kon diri ka nagtutuman han mga balaod, makapupungot pamation han Dyos an imo mga pag-ampo.

¹⁰Kon pagbitkon mo in tawo nga tangkod basi magbuhat hin maraot, mahuhulog ka ngadto han imo kalugaringon nga bitik. Babaloson hin maupay an mga diri salaan.

¹¹Dayuday naghuhunahuna an mga riko nga hira makinaadmananon, kundi mas maaram an pobre nga nakakasabot hiunong ha iya.

¹²Kon nagdadaog an mga magtadong, nagsasaurog an ngatanan, kundi natago an mga tawo kon an mga magraot an namumunoan.

¹³Diri ka gud magmamainuswagon kon tagoon mo an imo kasal-anan. Igkompisal ngan bayai ini ngan han Dyos ikaw kalolooyan.

¹⁴Dayuday pagsugta an GINOO ngan ikaw magmamalipayon. Kon matig-a an imo ulo, ikaw pagdadaoton.

¹⁵Ha ilarom hin maraot nga punoan makalolooy an mga kablas, sugad hiya kamakaharadlok hin nagngungurob nga liyon o nabanghag nga uso.

¹⁶An punoan nga waray buot nahihimo nga usa nga maisog ngan maraogdaog nga tawo. An tawo nga diri malimbong magigin punoan hin maiha.

¹⁷An tawo nga salaan hin pagpatay malaksi mag-ukab han iya kalugaringon nga lubnganan. Ayaw hiya pagsawaya.

¹⁸Pagtangkod ngan mawawaray mo kataragman. Kon malimbong ka, mapupukan ka hin tigda.

¹⁹An maduruto nga parauma damo an pagkaon. Dayuday mapopobre an mga tawo nga nagkakarag hin panahon.

²⁰An tangkod nga mga tawo mag-uokoy hin hura ngan malipayon nga kinabuhi. Kon nagdadagmit ka hin pag-irinirikohan, pagkakastigohon ka.

²¹Sayop an pagpakita hin pagpaurog. Kundi magbubuhat hin sayop in mga maghurukom kon kumarawat hira bisan han gigugutiayi nga hukip.

²²Nagdadagmit hin pag-irinirikohan an maimat nga mga tawo nga diri hira maaram kon san-o maabot ha ira an kakablasan.

²³Sawaya in tawo ngan ha orhe malilipay hiya hini labaw han pag-ulog-ulog.

²⁴An bisan hin-o nga naghuhunahuna nga diri sayop an pangawat han iya mga kag-anak sugad la hiya hin hiara na nga kawatan.

²⁵Nakakasamok la an pagkahalot; mauruupay pa ha imo an pagsarig han GINOO.

²⁶Linurong an pagsunod han imo kalugaringon nga mga panhunahuna. Likayi an kataragman ngan sunda an mga pagtutdo han mga labi ka makinaadmananon nga mga tawo.

²⁷Paghatag ngadto han mga kablas ngan diri ka gud magkukulang. Kon piyongon mo an imo mga mata ngadto han mga kablas, damo nga mga tawo in makakapagaba ha imo.

²⁸Nananago an mga tawo kon namumunoan an mga magraot. Kundi kon napupukan an magraot nga mga punoan, maghahadi na liwat an mga magtadong.