Read Waray Samarenyo Meaning Based Mga Darahonon 29 Bible Online

Mga Darahonon 29 - Waray Samarenyo Meaning Based bible

Mga Darahonon 29

¹Kon nagtitikatig-a la an imo ulo ha kada pagsasawaya ha imo, may adlaw nga mapupukan ka ngan diri ka na gud makakabangon.

²Ipakita ha akon in matadong nga punoan, ngan ipakikita ko ha imo in malipayon nga mga tawo. Ipakita ha akon in maraot nga punoan, ngan ipakikita ko ha imo in makalolooy nga mga tawo.

³Malilipay ha imo an imo amay kon pagmahalon mo an kinaadman. Linurong la an pagkarag hin kwarta ha mga maghugaw nga kababayen-an.

⁴Magmamarig-on an nasod kon katadongan an kanan hadi gintitinguha, kundi iya pagbubungkagon an iya nasod kon nagtitinguha la hiya hin kwarta.

⁵Kon nag-uulog-ulog ka han imo kasangkayan, nagbubutang ka la hin bitik para ha imo ngahaw.[47]

⁶Nabibitik an magraot nga mga tawo dida han ira kalugaringon nga mga kasal-anan, samtang an mga tangkod mga maglipayon ngan may kagawasan.

⁷An tawo nga maupay maaram han mga katungod han mga kablas, kundi diri nakakasabot an mga magraot hin sugad nga mga butang.

⁸Nakakaribok hin bug-os nga mga syudad an mga tawo nga diri nanginginlabot han iba. Nakakahatag hin kalinaw adton mga makinaadmananon.

⁹Kon nagsusumbong in tawo nga maaram kontra hin usa nga lurong, nagtitinawa la an lurong, maaringasa hiya ngan palabilabihon.

¹⁰An magraogdaog nga mga tawo nangangalas hin tawo, nga tangkod, kundi an tangkod nga tawo pinanalipdan[48] han mga magtadong.

¹¹Iginpapadayag han mga lurong an ira kasina, kundi an tawo nga may buot maaram magpailob ngan magpugong han iya kasina.

¹²Kon mamati an punoan hin sumat nga diri matuod, magigin mga buwaon an ngatanan niya nga mga opisyal.

¹³An pobre ngan an nagtatalumpigos ha iya may-ada ginkakausaan—hira nga duha tinagan han GINOO hin mga mata.

¹⁴Kon panalipdan hin hadi an mga katungod han mga pobre mag-iiha an iya paghadi.

¹⁵An pagsaway ngan pagkastigo maupay para han kabataan. Kon pasagdan la in usa nga bata han iya karuyag, maaawod an iya nanay tungod ha iya.

¹⁶Nagdudugang an pagtalapas kon an mga magraot an mamumunoan. Kundi an mga magtadong magigin saksi han ira pagkapukan.

¹⁷Tutdoi hin matadong an imo anak, ngan dayuday ka malilipay ha iya. Diri ka gud niya pagpapakaalohan.

¹⁸An nasod nga diri minandoan han Dyos waray katuhayan. Malipayon an tawo nga nagtutuman han balaod han Dyos.

¹⁹Diri ka makakagsaway hin surugoon pinaagi la hin mga pulong; bangin makasayod hiya ha imo, kundi diri ka niya pamamatian.

²⁰May-ada pa paglaom para hin usa nga lurong kay hin tawo nga diri nanhuhunahuna, nga nayayakan la dayon.

²¹Kon tagan mo an imo surugoon han ngatanan nga iya karuyag tikang han pagkabata, may adlaw nga kukuhaon niya an ngatanan nga imo gintatag-iya.[49]

²²An mga tawo nga madali masina nakakaaghat hin damo nga mga lantugi ngan kasamokan.

²³Magdadara han imo pagkapukan an pagkamapinahitas-on, kundi pagtatahoron ka kon ikaw mapinaubsanon.

²⁴An kabulig hin kawatan amo an iya dako nga kaaway. Kakastigohon hiya kon magsumat hiya han kamatuoran didto ha hukmanan, ngan kon diri hiya magsumat, higagabaan hiya han Dyos.

²⁵May kataragman an pagkabaraka han ginhuhunahuna ha imo han iba, kundi waray ka na kataragman kon sumarig ka han GINOO.

²⁶Naruruyag an ngatanan han maupay nga kaburot-on han punoan, kundi tikang gud la han GINOO nga makakarawat ka han katadongan.

²⁷Nagdudumot han mga magtadong an mga magraot, ngan nagdudumot han mga magraot an mga magtadong.