Read Waray Samarenyo Meaning Based Mga Darahonon 30 Bible Online

Mga Darahonon 30 - Waray Samarenyo Meaning Based bible

Mga Darahonon 30

¹Amo ini an matinahoron nga mga puplonganon ni Agur nga anak ni Jake: “Diri aanhi ha akon an Dyos, diri aanhi ha akon an Dyos, ngan makalolooy ako.[50]

²Mas baga la ako hin mananap kay hin tawo. Waray ko buot nga angay hin tawo.

³Waray gud ako mahibaro hin bisan ano nga kinaadman, ngan diri gud ako maaram mahitungod han Dyos.

⁴Hin-o gud in nakatukib na han langitnon nga hibaro? Hin-o gud in nakasalod na han hangin dida han iya kamot? O nakagputos na hin tubig dida hin dugnit? O nakagpahimutang na han mga pag-ultan han tuna? Hin-o hiya, kon maaram ka? Hin-o an iya anak?

⁵“Gintutuman han Dyos an ngatanan nga iya iginsasaad. Sugad hiya hin taming para han ngatanan nga naayop ha iya.

⁶Kon sumiring ka nga nagsiring hiya hin butang nga waray gud niya pagyakna, bubusaan ka niya, ngan igpapakita niya nga buwaon ka.”

⁷Naghahangyo ako ha imo, O Dyos, nga tagan mo ako hin duha nga mga butang ha diri pa ako mapatay:

⁸pugngi ako hin pagbuwa, ngan ayaw ako tugoti nga magin riko o pobre. Sanglit tagi la ako hin igo nga pagkaon nga akon kinahanglan.

⁹Kon may-ada ko damo, bangin ako sumiring nga diri na ako nagkikinahanglan ha imo. Kundi kon pobre ako, bangin ako mangawat ngan pagpakaalohan ko an akon Dyos.

¹⁰Ayaw gud pagsuson hin usa nga surugoon ha atubangan han iya agaron, basi diri ka igmaldisyon ngan mag-antos tungod hini.

¹¹May mga tawo nga nagmamaldisyon han ira mga amay, ngan diri nagdadayaw han ira mga nanay.

¹²May mga tawo nga naghuhunahuna nga mga putli kuno hira, kundi ha tinuod mga maghugaw hira.

¹³May mga tawo nga naghuhunahuna nga maupay gud hira—hin kamaupay gudman nira ha ira la hunahuna!

¹⁴May mga tawo nga nasingabot han mga kablas ngan mga magpakalolooy; amo ito an paagi han ira pagpakabuhi.

¹⁵An linta may duha nga anak nga kababayen-an, ngan “Tagi ako,” an ira mga ngaran. May upat nga mga butang ngan diri gud ini hira natunga:

¹⁶an kalibutan han mga patay, an babaye nga baw-as, an mamara nga tuna nga nagkikinahanglan hin uran, ngan an naglalahinggab nga kalayo nga diri napupugngan.

¹⁷Bisan hin-o nga nagyuyubit han iya amay o nagtatamay han iya nanay kon lagas na,[51] angay hiya itubong ha mga manaol o paglukaton hin mga uwak an iya mga mata.

¹⁸May upat nga mga butang nga makuri ko matukib:

¹⁹usa nga agila nga nalupad didto ha langit, usa nga halas nga nagkakamang dida hin kababtoan, usa nga barko nga nanabatas han kadagatan ngan usa nga lalake ug usa nga babaye nga nagsisihigugmaay.

²⁰Sugad hini an binubuhat hin usa nga asawa nga malingo: nanlilibog hiya, nakarigo, ngan nasiring, “Waray gud bisan ano nga maraot nga akon nabuhat!”

²¹May upat nga mga butang nga makuri karawaton han mga tawo dinhe ha tuna:

²²usa nga oripon nga nahimo nga hadi, usa nga lurong nga patakas hin pagkaon,

²³usa nga tinamay nga babaye nga nakaasawa, ngan usa nga surugoon nga babaye nga sinmaliwan han iya agaron nga babaye.

²⁴May upat nga mga mananap ha tuna nga gudtiay kundi mga listo hin duro:

²⁵mga tubak: mga magluyahon la hira, kundi ha panahon han katsirak nagtitirok han ira pagkaon.

²⁶Mga kuniho ha bato: diri liwat hira mga magkusog, kundi nag-uokoy hira dida han kababtoan.

²⁷Mga duron: waray nira hadi, kundi burunyog gud kon nagkakalupad hira.

²⁸Mga taguto: makakaptan mo in usa ha imo kamot, kundi hiaagian mo hira didto hin mga palasyo.

²⁹May upat nga mga binuhat nga makaruruyag pagkit-on kon naglalakat hira:

³⁰mga liyon, an labi kamakusog han ngatanan nga kamanampan ngan waray nahahadlokan;

³¹mga kanding, naglalakat nga mga sunoy, ngan mga hadi ha atubangan han ira mga tawo.[52]

³²Kon nalurong ka na hin pagmapinahitas-on ngan paglarang hin maraot, hunong ngan panhunahuna!

³³Kon durohon mo hin pagbati han gatas, makakakuha ka hin mantikilya. Kon suntokon mo an irong, magdudugo ini. Kon aghaton mo an kasina, mahingangadto ka hin kasamokan.