Read Waray Samarenyo Meaning Based Mga Darahonon 31 Bible Online

Mga Darahonon 31 - Waray Samarenyo Meaning Based bible

Mga Darahonon 31

¹Amo ini an matinahoron nga mga puplonganon nga igintutdo kan hadi Lemuel han iroy niya:

²“Ikaw an akon kalugaringon nga hinigugma nga anak, nga baton han akon mga pag-ampo. Ano an akon igsisiring ha imo?

³Ayaw pagkaragi an ngatanan mo nga kusog dida hin pakighilawas, ngan an ngatanan mo nga kwarta dida hin kababayen-an; ginpukan na nira in kahadian.

⁴Pamati, Lemuel. Kinahanglan an mga hadi diri uminom hin bino, o mag-ungara hin makahurubog nga irimnon.

⁵Kon nainom hira, hinngangalimtan nira an mga balaod, ngan ginpapasibay-an nira an mga katungod han mga tawo nga magpakalolooy.

⁶An makahurubog nga irimnon angay la hin mga tawo nga tikamaratay, ngan hin mga tawo nga aada ha kakurian.

⁷Paimna hira basi hingalimtan nira an ira kakablasan ngan kakurian.

⁸“Pagyakan para han mga tawo nga diri nakakayakan para han ira kalugaringon. Panalipdi an mga katungod han ngatanan nga mga magpakalolooy.

⁹Pagyakan para ha ira ngan magin matadong ka nga maghurukom. Panalipdi an mga katungod han mga kablas ngan mga magpakalolooy.”

¹⁰Hin kamakuri hiagian in katataporan nga asawa! Labaw pa gud hin mga alahas an kamahal niya!

¹¹Tinataporan hiya han iya bana, ngan diri gud mapapobre an iya bana.

¹²Samtang hiya buhi pa ginbubuhat niya an maupay, ngan diri an maraot para han iya bana.

¹³Naduruto hiya hin paghimo hin lino ngan delana nga panapton.

¹⁴Nagdadara hiya hin pagkaon tikang ha kahigrayoan sugad han ginbubuhat hin paragpatigayon nga mga barko.

¹⁵Masirom pa an kaagahon nabangon na hiya hin pag-andam hin pagkaon para han panimalay niya, ngan pagtutdo han mga surugoon nga kababayen-an han ira pagbubuhaton.

¹⁶Inuusisa niya in tuna ngan pinapalit ini, ngan pinaagi han kwarta nga iya pinakabuhian, nagtatanom hiya hin urubasan.

¹⁷Maupay gud hiya nga nagbubudlay, makusog ngan maduruto.

¹⁸Maaram hiya han kamahal han ngatanan nga iya hinihimo, ngan nag-aagma hiya ha gab-i hin pagtrabaho.

¹⁹Nalugaring hiya hin paghimo hin mga inulang, ngan naghahablon hiya han iya kalugaringon nga panapton.

²⁰Mahinatagon hiya han mga kablas ngan magpakalolooy.

²¹Ha panahon hin kathagkot diri hiya nababaraka, kay may magdakmol nga mga panapton an panimalay niya.

²²Naghihimo hiya hin mga basing ha higdaan, ngan nagbabado hin manipis nga lino nga pula.

²³Kinikilala hin maupay an iya bana nga usa han mga dumagko nga mga tuminungnong.

²⁴Naghihimo hiya hin mga paha ngan mga panapton, ngan ibinabaligya ini ngadto han mga magparatigayon.

²⁵Makusog ngan tinahod hiya, ngan diri hiya nababaraka han kabubwason.

²⁶An iya mga pulong puno hin kinaadman, ngan igintututdo niya an pagkamaloloy-on.

²⁷Dayuday hiya may-ada buruhaton, ngan iya pinaninimangno an kanan iya panimalay mga kinahanglanon.

²⁸Ginpapasidunggan hiya han iya mga anak, ngan gindadayaw hiya han iya bana.

²⁹Nasiring an iya bana, “Damo an kababayen-an nga mag-upay nga mga asawa, kundi ikaw amo an labi kamaupay ha ira ngatanan.”

³⁰Malimbong an kamaanyag ngan nalubad an kamahusay kundi an babaye nga nagpapasidungog han GINOO angay gud pagdayawon.

³¹Pasidunggi hiya tungod han ngatanan nga iya ginbubuhat. Angay hiya pagtahoron han ngatanan.