Read Waray Samarenyo Meaning Based Mga Darahonon 5 Bible Online

Mga Darahonon 5 - Waray Samarenyo Meaning Based bible

Mga Darahonon 5

¹Anak ko, pamatii hin maupay an akon kinaadman ngan hibaro.

²Niyan mahibabaro ka hin panggawi hin maupay, ngan hisasabotan dida han imo mga pulong nga may-ada ka hibaro.

³Bangin sugad han dugos hin kamatam-is an mga im-im han asawa hin iba nga lalake ngan sugad han lana hin olibo hin kamanamit an iya mga harok,

⁴kundi katapos hini ngatanan, waray ibibilin ha imo kundi an kapaitan ngan kasakitan.

⁵Iglulusad ka niya ngadto han kalibutan han mga patay; an dalan nga iya paglalaktan amo an dalan ngadto ha kamatayon.

⁶Diri hiya magsusulsog han dalan han kinabuhi; kundi nahisasalaag hiya, ngan diri ngani hiya masabat.

⁷Yana pamatii ako, mga anak ko; ngan ayaw gud hingalimti an akon igsisiring.

⁸Pahirayo hin sugad nga babaye! Ayaw paghirani bisan han iya porta!

⁹Kon buhaton ini niyo, aagawon han iba an pagtahod nga iyo hadto anay, ngan magkakamatay kamo nga mga batan-on pa ha mga kamot hin waray pagkalooy nga mga tawo.

¹⁰Tinuod, kukuhaon hin mga diri niyo kinikilala an ngatanan niyo nga manggad, ngan tatag-iyahon hin iba nga mga tawo an iyo ginkabudlayan.

¹¹Maghaharoy kamo kon aada na kamo ha tangpi han kamatayon, ngan waray na niyo kusog ngan magluya na kamo hin duro,

¹²ngan masiring kamo, “Kay ano nga waray pa man ako magmaan? Kay ano nga waray man ako tumugot nga sawayon ako?

¹³Waray gud ako mamati han akon mga magturutdo. Waray ako bumale ha ira.

¹⁴Ngan ha gilayon hinbaroan ko[4] dayon nga ginpakaalohan ako ha atubangan han kadam-an.”

¹⁵Ayaw paglingo han imo kalugaringon nga asawa, ngan ihatag ha iya la an imo paghigugma.

¹⁶Diri makakahatag ha imo hin kaupayan adton imo mga anak ha gawas.

¹⁷Kinahanglan tumubo an imo mga anak basi makabulig ha imo, ngan diri an mga diri nimo kinikilala.

¹⁸Sanglit pagmalipayon upod an imo asawa ngan bilnga an imo kalipay dida han babaye nga imo pinangasawa—

¹⁹nga sugad hin bugsok kamahusay ngan kamatahom. Makalipay unta ha imo an iya kaanyag, ngan itugot nga lub-on ka niya han iya gugma.

²⁰Anak ko, kay ano nga ihahatag mo ha iba nga babaye an imo paghigugma? Kay ano nga palalabihon mo an kaanyag han asawa hin iba nga lalake?

²¹Nakita an GINOO han ngatanan nga imo ginbubuhat. Nakita hiya bisan pumakain ka.

²²Usa nga bitik an mga sala hin usa nga maraogdaog nga tawo. Nadadakop hiya dida han pukot han iya kalugaringon nga sala.

²³Namamatay hiya kay kulang hiya hin pagpugong han iya kalugaringon. Magdadara ha iya ngadto han iya lubnganan an dako niya nga pagkalurong.