Read Waray Samarenyo Meaning Based Mga Darahonon 7 Bible Online

Mga Darahonon 7 - Waray Samarenyo Meaning Based bible

Mga Darahonon 7

¹Anak ko, hinumdomi an akon iginsiring ngan ayaw gud hingalimti an iginpabuhat ko ha imo.

²Buhata an akon igintugon ngan mabubuhi ka. Sunda hin maupay an akon pagturon-an sugad han imo pagbantay han imo mga mata.

³Dayuday tipigi an akon pagturon-an; igsurat ini dida han imo kasingkasing.

⁴Pagdumaraa an kinaadman sugad hin bugto mo nga babaye, ngan an pagsabot sugad hin suok mo gud nga sangkay.

⁵Amo ini an makakapahirayo ha imo tikang han kaasaw-an han iba nga kalalaken-an, tikang han kababayen-an nga may nakakalukmay nga mga pulong.

⁶Usa ka higayon dida han namimintana ako ha akon balay,

⁷hinkit-an ko in damo nga kulang hin hibaro nga mga batan-on nga kalalaken-an, kundi hinkit-an ko in usa nga waray buot nga batan-on.

⁸Naglalakat hiya ha kalsada hirani han kanto nga inuokyan hin usa nga babaye. Linmabay hiya hirani han balay han babaye

⁹han masirom na an kagab-ihon.

¹⁰Niyan gintapo hiya han babaye nga nakakabado sugad hin usa nga maraot nga babaye nga maraot gud an iya tuyo.

¹¹Mailob ngan waray alo hiya nga babaye nga dayuday nagsusudoy-sudoy han kakalsadahan,

¹²o naghihinulat nga natukdaw dida hin usa nga kanto, usahay didto ha mga kalsada, usahay didto ha merkado.

¹³Inagbayan niya an batan-on nga lalake, hinagkan niya, tinutokan hiya ngan ginsiring,

¹⁴“Naghalad ako yana nga adlaw, ngan may-ada ako sora tikang han mga halad nga gin-ihaw.

¹⁵Sanglit ginmawas ako pamiling ha imo. Karuyag ko gud ikaw igkita, ngan yana nagkita kita.

¹⁶Ginbasingan ko na an akon higdaan hin mga taklap nga dekolor nga lino nga tikang ha Ehipto.

¹⁷Ginpahamotan ko ini hin mirra, aloe, ug kanela.

¹⁸Tana, pagpahimulos kita han gugma ha bug-os nga gab-i. Magpapatakas kita hin kalipay.

¹⁹Waray didto ha balay an akon bana. Linmakat hiya ngadto han kahigrayuan.

²⁰Dara niya in damo nga kwarta, sanglit diri hiya mauli sulod hin duha ka semana.”

²¹Sanglit iya ginsulay an batan-on han iya kaanyag ngan nadara niya an batan-on pinaagi han manamit niya nga pulong.

²²Binunyog dayon ha iya an batan-on sugad hin usa nga baka nga tikadto ha irihawan, nga sugad hin usa nga bugsok nga nagluluksolukso tikadto hin usa nga bitik[6]

²³diin tatahoson hin pana an iya kasingkasing. Sugad hiya hin usa nga tamsi nga tikadto hin usa nga pukot—waray hiya kalibutan nga maoonong an iya kinabuhi.

²⁴Sanglit mga anak ko, pamati kamo ha akon. Pamatii hin maupay an akon igsisiring.

²⁵Ayaw ipabihag an iyo kasingkasing hin sugad nga babaye; ayaw kamo pagsinudoysudoy hin pamiling ha iya.

²⁶Hiya an nakakapukan hin damo nga kalalaken-an, ngan hiya an tinikangan han pagkamatay hin diri maiihap nga mga tawo.

²⁷Kon makadto kamo ha iya balay, magtitipakadto kamo han kalibutan han mga patay. Amo ini in usa nga laktod nga aragian ngadto ha kamatayon.