Read Waray Samarenyo Meaning Based Mga Darahonon 9 Bible Online

Mga Darahonon 9 - Waray Samarenyo Meaning Based bible

Mga Darahonon 9

¹Gintindog han kinaadman an iya balay, ngan ginbutangan ini hin pito nga mga harigi.

²Nagpaihaw hiya para hin usa nga kombite, nagsakot hin mga panakot dida han bino, ngan nag-andam han lamesa.

³Nagsugo hiya han iya surugoon nga kababayen-an hin pagdapit han mga tawo tikang han gihahataasi nga dapit han bungto:

⁴“Sulod ngadi, tapang nga mga tawo!” Ngan nagsiring hiya ngadto han lurong nga tawo,

⁵“Kadi, kaon han akon gin-andam ngan inom han bino nga akon ginsampuran hin pahamot.

⁶Ayaw na pag-upod-upod han tapang nga mga tawo, ngan mabubuhi ka. Sulsoga an dalan han hibaro.”

⁷Kon sawayon mo in tawo nga malabyaw, pagtatamayon ka la niya. Kon sawayon mo in tawo nga maraot, pagbibidoan ka la niya.

⁸Ayaw gud pagsaway hin tawo nga malabyaw; pagdudumtan ka niya tungod hini. Kundi kon sawayon mo in tawo nga makinaadmananon, tatahoron ka niya.

⁹An bisan ano nga isiring mo ngadto hin tawo nga makinaadmananon makakadugang han iya kinaadman. An bisan ano nga igtutdo mo ngadto hin tawo nga matadong makakadugang han iya hibaro.

¹⁰Basi mamay-ada ka kinaadman kinahanglan tumahod ka anay han GINOO. Kon nakilala ka ha Iya, an Usa nga Baraan, may-ada ka pagsabot.

¹¹Makakapahilawig han imo kinabuhi an kinaadman.

¹²Ikaw la ngahaw an magpapahimulos kon may nimo kinaadman, kundi kon igsikway mo ini, ikaw la ngahaw an mag-aantos.

¹³Maaringasa, tapang, ngan waray alo an lurong nga babaye.[8]

¹⁴Nalingkod hiya dida han porta han iya balay, o dida hin lingkoran didto han gihahataasi nga dapit han bungto,

¹⁵ngan nagtatawag han mga tawo nga malabay tipakadto han ira pagpakabuhi o pagpatigayon.

¹⁶“Sulod kamo ngadi, tapang nga mga tawo!” Nasiring hiya ngadto han lurong nga tawo,

¹⁷“Matarutam-is an kinawat nga tubig. Mas marasa an kinawat nga tinapay.”

¹⁸Waray kalibutan adton mga pinmadara ha iya nga namamatay an mga tawo nga napakadto han iya balay, nga adton mga nakasulod na aadto na ha kahiladman han kalibutan han mga patay.