Read Waray Samarenyo Meaning Based Ecclesiastes 1 Bible Online

Ecclesiastes 1 - Waray Samarenyo Meaning Based bible

Ecclesiastes 1

¹Amo ini an mga pulong han Magwarali nga anak ni David, nga hadi ha Jerusalem:

²Waray la kapulsanan, waray kapulsanan, nasiring an Magwarali. Waray kapulsanan an kinabuhi. An ngatanan waray la kapulsanan.

³Nagkinabudlay ngan nagginuol kamo ha bug-os niyo nga kinabuhi, ngan may-ada ba niyo nakuha?

⁴Nagliwanliwan in mga katulinan, kundi amo la gihapon an kalibutan.

⁵Nasirang an adlaw ngan natutunod la gihapon, ngan naghihinayhinay hin pagbalik ngadto han dapit nga iya titikangan hin pagsirang.

⁶Nahangin tipatimogan, nahangin tipaamihanan, naglilinibotlibot, ngan nabalik na liwat.

⁷Natipakadto ha dagat an ngatanan nga mga salog, kundi diri pa napupuno an dagat. Nabalik an tubig ha mga dapit nga gintitikangan han mga salog ngan naawas na liwat.

⁸Nahatag hin kagul-anan an ngatanan nga mga butang—kagul-anan nga diri sadang mahiasoy. Diri gud natunga hin pagkinita an aton mga mata o pagpinamati an aton mga durunggan.

⁹An nahinabo na, mahinanabo liwat. An ginbuhat na, pagbubuhaton liwat. Waray gud bag-o dinhe ha kalibutan.

¹⁰Nasiring hira, “Kitaa, iini in bag-o.” Kundi diri ini bag-o, nahinabo na ini hadto pa, han waray pa kita katatawo.

¹¹Waray nahinunumdom han nahinabo hadto pa, ngan waray na mga adlaw nga tiarabot mahinunumdom han nahinanabo yana ngan han umarabot.

¹²Ako, an Magwarali, nag-ukoy ha Jerusalem, ngan hadi ako han Israel.

¹³Gintalinguha ko hin pag-usisa ngan pag-aram han ngatanan nga ginbuhat dinhe hini nga kalibutan. Iginpahamtang ha aton han Dyos in makalolooy nga kapalaran.

¹⁴Hinkit-an ko an ngatanan nga ginbuhat dinhe hini nga kalibutan, ngan susumatan ko kamo nga waray la kapulsanan ini ngatanan. Sugad la kita hin tawo nga nagdadakop han hangin.

¹⁵Diri niyo matatadong an baliko ngan diri niyo maiihap an waray dida.

¹⁶Nagsiring ako ha akon ngahaw, “Nagin dako ako nga pagkatawo, nga labaw gud hin kamaaram hin bisan hin-o nga naghadi ha Jerusalem una ha akon. Maaram ako kon ano gud an kinaadman ngan an hibaro.”

¹⁷Gintalinguha ko nga akon hibaroan an kalainan han kaaram ug kalurongan, han kinaadman ug katuyawan. Kundi hinbaroan ko nga maupay pa magdinakop ako han hangin.

¹⁸Kon darudako an imo kinaadman, darudamo man an imo kabidoan; kon darudako an imo hinbabaroan, darudako man an imo pag-aantoson.