Read Waray Samarenyo Meaning Based Ecclesiastes 11 Bible Online

Ecclesiastes 11 - Waray Samarenyo Meaning Based bible

Ecclesiastes 11

¹Ipuhunan an imo kwarta ha langyaw nga pagpatigayon, ngan paglabay hin mga adlaw makakaganansya ka.

²Ibutang an imo mga puhunan didto hin pira nga mga dapit, o bisan pa ha damo nga mga dapit, kay diri ka gud maaram han kadimalasan nga maabot ha imo dinhe ha kalibutan.

³Bisan ngain an kapukan han kahoy, aadto ini himumutang han iya napukanan. Kon duro na kadakmol an mga dampog, inuuran ini.

⁴Kon humulat ka pa han igo nga hangin ngan han maupay nga panahon, diri ka gud makakagtanom, ngan waray nimo pag-aanihon.

⁵Ginhimo han Dyos an ngatanan, ngan diri mo hisasabtan an ginbubuhat niya, sugad nga diri mo hinsasabtan an pagtikang hin bag-o nga kinabuhi dida ha tiyan hin usa nga burod.

⁶Pagtanom ha aga ngan ha gab-i, kay diri ka maaram kon matubo ba hin maupay ini ngatanan, o kon an syahan nga pagpugas magmamauruupay ba han ikaduha.

⁷Maupay an pagpahimulos han kapawa han adlaw.

⁸Pagpasalamat han Dyos han kada tuig han imo kinabuhi. Bisan magdiunan-o hin kahilawig han imo kinabuhi, hinumdomi nga labaw pa gud hin kamaiha han panahon nga aadto ka ha lubnganan ngan patay ka na. Waray na gud naton sadang paglaoman didto.

⁹Mga batan-on, pagpahimulosi an iyo pagkabatan-on. Pagmalipayon samtang batan-on ka pa. Buhata an iyo karuyag ngan tumana an ungara han iyo kasingkasing. Kundi panumdom kamo nga huhukman kamo han Dyos pinaagi han bisan ano nga ginbubuhat niyo.

¹⁰Ayaw itugot nga may-ada butang nga makapaguol o makapasakit ha iyo. Diri gud mag-iiha an iyo pagkabatan-on.