Read Waray Samarenyo Meaning Based Ecclesiastes 6 Bible Online

Ecclesiastes 6 - Waray Samarenyo Meaning Based bible

Ecclesiastes 6

¹Hinkit-an ko in karat-an nga ginbubuhat dinhe ha kalibutan.

²Mahatag an Dyos ha usa ka tawo hin manggad, dungog, ug hiagi, ngan han ngatanan nga iya kinaruruyag, kundi diri hiya matugot nga magpahimulos hini an tawo. An diri lugod kinikilala an magpapahimulos hini. Waray ini pulos ngan diri gud ini angay buhaton.

³Bisan pa mag-usa ka gatos an mga anak hin tawo ngan mahilawig an iya kinabuhi, kundi bisan pa mahilawig an iya kinabuhi, kon diri hiya makaangkon han iya bahin hin kalipayan han kinabuhi ngan diri hiya mahilubong hin maupay, niyan masiring ako nga maupay pa nga natawo hiya nga daan patay.

⁴Waray kapulsanan an iya katawo, kay maanaw la hiya ngadto ha kasisidman, ngan hinngangalimtan.

⁵Diri gud hiya makita han kapawa han adlaw, o masasayod kon ano an kinabuhi, kundi nakapahuway gihapon hiya.

⁶Labi na an tawo nga diri gud nagpapahimulos han kinabuhi, bisan kon mabuhi hiya hin duha ka yukot ka tuig. Ha katapostaposan, makadto hira nga duha ha amo la ngahaw nga dapit.

⁷Nagbubuhat in tawo han ngatanan niya nga mga buruhaton basi la makakaon hiya, kundi diri gud hiya nasasadngan.

⁸Ano man an kalainan han lurong ug han maaram? Ano nga kaupayan an maaangkon han kablas nga tawo kon mahibaro hiya hin pag-atubang han kinabuhi?

⁹Waray la ini kapulsanan; sugad la ini hin pagdakop han hangin. Maupay pa nga makontento ka han aada ha imo kay hin pag-inungara hin iba pa nga mga butang.

¹⁰Ginlarang hin maiha na nga panahon an ngatanan nga mahinanabo, ngan maaram kita ngatanan nga diri makakalantugi in tawo[6] hadton makurukusog ha iya.

¹¹Kon mauruiha an imo pakiglantugi, labi na nga waray kapulsanan ini, ngan waray nimo makukuha.

¹²Uunanhon hin paghibaro hin tawo kon ano an maupay ha iya dinhe hini nga halipot ngan waray pulos nga iya kinabuhi—kinabuhi nga nalabay sugad la hin lambong? Uunanhon hin paghibaro hin usa ka tawo kon ano an mahinanabo dinhe ha kalibutan katapos niya mamatay?