Read Waray Samarenyo Meaning Based Ecclesiastes 7 Bible Online

Ecclesiastes 7 - Waray Samarenyo Meaning Based bible

Ecclesiastes 7

¹Mauruupay pa hin marahalon nga pahamot an maupay nga dungog; ngan mauruupay pa han adlaw han imo katawo an adlaw han imo kamatay.

²Mauruupay an pagkadto hin balay nga may kabidoan kay hin pagkadto hin balay nga may panagtawo, basi an mga buhi dayuday mahinumdom nga naghuhulat ha aton ngatanan an kamatayon.

³Mauruupay pa han pagtawa an kabido, bangin makakabido ini han imo nawong, kundi nakakabaid ini han imo sarabotan.

⁴Lurong in tawo nga dayuday la naghuhunahuna hin kalipayan. Naghuhunahuna hin kamatayon in tawo nga may kinaadman.

⁵Mauruupay pa nga sawayon ka han mga may kinaadman, kay pagkantahan ka hin mga pagdayaw han mga lurong.

⁶Sugad la ini hin mga tunok nga nagbibiribti ha kalayo kon natawa in lurong; waray la ini kahulogan.

⁷Kon naglilimbong in tawo nga may kinaadman sugad hiya hin lurong. Kon nakarawat ka hin hukip, gindadaot mo an imo pagkatawo.

⁸Mauruupay pa han iya tinikangan an kataposan hin usa nga butang. Mauruupay pa han kamapinahitas-on an kamapinailobon.

⁹Pugngi an imo kapungot; tinuyaw an pagtipig hin pagdumot.

¹⁰Ayaw pakiana, “Kay ano nga mauruupay man an aton pagkabutang hadto kay hiton yana?” Diri ini maupay nga pakiana.

¹¹An ngatanan nga buhi kinahanglan nga may-ada kinaadman; sugad ini kamaupay hin pagkarawat hin panurondon,

¹²ngan mahatag ini ha imo hin kahimyangan sugad han ihinahatag han kwarta. Nakakatalwas ha imo an kinaadman—amo ini an nakakaupay han hibaro.

¹³Painoinoha an ginbuhat han Dyos. Hin-o in makakatadong han ginbaliko han Dyos?

¹⁴Pagmalipayon kon maupay an imo kamutangan ha kinabuhi, ngan kon naabot an kakurian, panumdoma la nga an Dyos an nagpapadara hin kalipayan ug kakurian, diri ka gud maaram kon ano an sunod nga mahinanabo.[7]

¹⁵Waray gudla pulos an akon kinabuhi, kundi hinkit-an ko an ngatanan. May-ada napatay dayon bisan kon maupay hiya nga tawo; may-ada liwat hilawig nga kinabuhi, bisan kon maraot hiya nga tawo.

¹⁶Sanglit ayaw pag-uraura hin kamaupay o hin kamaaram—kay ano nga naglulugaring ka man hin pagpatay ha imo?

¹⁷Kundi ayaw liwat pag-uraura hin kamaraot o hin kalurong—kay ano nga magpakamatay ka ha diri pa nimo panahon?

¹⁸Ayaw pagpalabi hin bisan hain hini nga duha. Magmamainuswagon ka man gihapon kon mahibaro ka hin pagtahod han GINOO.

¹⁹Dako an mahihimo han kinaadman para hin tawo kay han nahihimo hin napulo nga mga punoan para hin usa nga syudad.

²⁰Waray tawo ha tuna nga dayuday nagbubuhat hin matadong ngan diri gud nagsasayop.

²¹Ayaw pamati han ngatanan nga iginyayakan han mga tawo—bangin hibatian mo nga gintatamay ka han imo surugoon,

²²ngan maaram ka ngahaw nga nakadamo ka na magtamay hin iba nga mga tawo.

²³Ginamit ko an akon kinaadman hin pagsari hini ngatanan. Nagtalinguha ako hin pagkamaaram, kundi makuri ko na maabot ini.

²⁴Uunanhon hin tawo hin paghibaro han kahulogan han kinabuhi? Uraura ini hin kahilarom para ha aton, ngan uraura ini hin kamakuri hisabtan.

²⁵Kundi nagtalinguha gud ako hin pag-aram ngan pagtoon; gintalinguha ko gud hin pamiling han kinaadman ngan han mga baton han akon mga pakiana, ngan akon hinbaroan an kamaraot ngan kalurong han katuyawan.

²⁶Hinsabtan ko in labaw pa kamapait kay han kamatayon—an babaye. Dadakpon ka han gugma nga iya ihinahalad ha imo; sugad hin bitik o sugad hin pukot; ngan an iya mga butkon nga nagakos ha imo nakapot sugad hin kadena. Nakakalipay ha iya an tawo nga nakakalipay han Dyos, kundi dinadakop niya an makasasala.

²⁷Tinuod, hinsabtan ko ini hin hinayhinay, samtang nangingita ako hin mga baton, nagsiring an Magwarali.

²⁸Nangita ako hin iba nga mga baton, kundi waray ko gud hin-agian. Nakaagi ako hin usa nga lalake ha usa ka yukot nga angay ko pagtahoron, kundi waray gud usa nga babaye.

²⁹Amo la ini an akon hinbaroan: ginhimo kita nga yano han Dyos, kundi ginhimo ta nga uraura hin ka masamok an aton kalugaringon.