Read Waray Samarenyo Meaning Based Ecclesiastes 8 Bible Online

Ecclesiastes 8 - Waray Samarenyo Meaning Based bible

Ecclesiastes 8

¹An tawo la nga may kinaadman an maaram kon ano gud an kahulogan han mga butang. An kinaadman nakakapahiyom ha iya, ngan nakakapawara han iya mga pagmud-ot.

²Buhata an isinusugo han hadi,[8] ngan ayaw pagdalidali hin pagsaad ha Dyos.

³Nakakahimo an hadi hin bisan ano nga iya karuyagon, sanglit pahirayo ha iya atubangan; ayaw pabilin dida hin sugad ka makulba nga dapit.

⁴May gahom an hadi hin pagbuhat hin bisan ano, ngan waray nakakariwa ha iya.

⁵Diri ka maaano samtang nga nagsusugot han iya mga sugo, ngan maaram an tawo nga may kinaadman kon uunanhon ngan kon san-o bubuhata ini.

⁶May igo nga panahon ngan igo nga paagi hin pagbuhat han ngatanan, kundi gutiay gudla an aton hinbabaroan!

⁷Waray ha aton maaram kon ano an mahinanabo, ngan waray tawo nga makakagsumat ha aton hini.

⁸Waray tawo nga makakahawid han iya kamatayon o makakaugsod han adlaw han iya kamatayon. Amo ito an away nga diri naton kalilikyan ha aton pag-inagawasan hini; diri kita makakalimbong.

⁹Hinkit-an ko ini ngatanan dida han akon pagpainoino han mga ginbubuhat dinhe ha kalibutan, kalibutan nga diin gamhanan an iba nga mga tawo, ngan an iba ginraogdaog.

¹⁰Hinkit-an ko in magraogdaog nga mga tawo nga iginlubong ha ira mga lubnganan, kundi ha pagbalik na tikang han paglubong, gindayaw hira han mga tawo didto ha syudad nga ginbuhatan nira han ira karat-an.[9] Waray la ini kapulsanan.

¹¹Kay ano nga madali la magbuhat hin mga karat-an an mga tawo? Kay diri man kinakastigo dayon an karat-an.

¹²Makakagbuhat hin usa ka gatos nga karat-an in makasasala ngan buhi la hiya gihapon. Maaram ako han ira sinisiring: “Kon may-ada ka pagtahod han Dyos, magmamaupay an ngatanan,

¹³kundi diri ini magmamaupay para han mga magraot. Sugad la hin lambong an ira kinabuhi, ngan mapatay hira nga bata pa, kay diri hira natahod han Dyos.”

¹⁴Kundi linurong la ini. Tan-awa daw an nahinanabo dinhe ha kalibutan: usahay an mga magtadong an nakakaangkon han kastigo nga para han mga magraot, ngan an mga magraot an nakakaangkon han balos nga para han mga magtadong. Nasiring ako nga waray la ini kapulsanan.

¹⁵Sanglit nagmamatuod ako nga kinahanglan an tawo magpahimulos han iya kalugaringon, kay an iya kalipayan hini nga kinabuhi amo la an pagkaon, pag-inom, ngan an paglitaw-libang. Makakahimo hiya hini samtang nagkakabudlay hiya dida ha iya pag-ukoy hin kinabuhi nga iginhatag ha iya han Dyos dinhe ha kalibutan.

¹⁶Ha kada ko pagtatalinguha nga mamay-ada ako kinaadman, ngan mahibaroan ko an nahihinabo ha kalibutan, nasabtan ko nga bisan ka mag-agma adlaw gab-i,

¹⁷diri ka gud makakasabot han ginbubuhat han Dyos. Bisan unanhon mo hin paniguro, diri ka gud mahibabaro hini. Bangin sumiring an mga may kinaadman nga maaram hira, kundi diri hira maaram.