Read Waray Samarenyo Meaning Based Kanta han mga Kanta 1 Bible Online

Kanta han mga Kanta 1 - Waray Samarenyo Meaning Based bible

Kanta han mga Kanta 1

¹Ini an labi kamatahom nga mga kanta ni Solomon.[1]

²Ginluob mo ako hin mga harok han imo mga im-im; an imo gugma matam-is pa kay han bino.

³An paghinabe han imo ngaran; nagpapahinumdom han alimyon han imo pagkamahamot. Sanglit tunay an paghigugma han mga daraga ha imo.

⁴Dad-a ako ngan pagkalakat kita; ikaw an akon hadi ngan dad-a ako ngadto han imo kwarto. Magmamalipayon kita nga duha; patakas hin pag-inom ngan wad-a ta dida ha paghigugma an aton kalugaringon. Diri urosahon nga hinihigugma ka han ngatanan nga kababayen-an!

⁵Kababayen-an han Jerusalem, tinuod nga tabunon ako kundi[2] mahusay, tabunon ako sugad han mga tulda ha kamingawan han Kedar, kundi mahusay sugad han mga kurtina ha palasyo ni Solomon.

⁶Ayaw ako pagtamaya tungod han akon panit, kay sinirakan ako han adlaw. Nasina ha akon an akon kabugtoan nga kalalaken-an ngan ginpatrabaho ako nira ha urubasan; ngan waray na ako panahon hin pagmangno han akon kalugaringon.

⁷Sumati ako, akon hinigugma, ngain mo dadad-a hin pagpanibsib an imo mga panon? Diin ini hira sisirong han naudto nga adlaw? Kay ano nga aadto ta man ikaw bibilnga han mga panon han iba nga mga magmarangno?[3]

⁸Diri ka ba maaram han dapit, ikaw, an labi kamatahom han kababayen-an? Lakat ngan sunda an panon; pamiling hin panibsiban han imo kakandingan, hirani han mga tulda han mga magmarangno.

⁹Ikaw nga akon hinigugma nakakakabig hin kalalaken-an, sugad nga in babayi nga kabayo nakakapukaw han balatian han lalaki nga mga kabayo han mga karuwahe ni Faraon.

¹⁰Matahom an imo hilaba mga buhok nga matabon han imo mga bayhon, ngan natunton ha imo liog sugad hin mga alahas.

¹¹Kundi ighihimo ka namon hin kwentas nga bulawan, nga may mga sabong nga salapi.

¹²Samtang nahigda an akon hadi, naluob an hangin hin alimyon han akon pahamot.

¹³Mahamot sugad hin mirra an akon higugmaon samtang nasandig hiya ha akon mga dughan.

¹⁴An akon hinigugma sugad han mga bukad ha kapatagan nga namumukalkag ha mga urubasan han Engadi.

¹⁵Hin kamahusay nimo, akon hinigugma; nasilaw gud hin gugma an imo mga mata!

¹⁶Hin kagwapo nimo, akon minahal; nakakalipay ka gud ha akon! Aton higdaan an linghod nga kabanwaan;

¹⁷nga paduros han aton balay an mga sidro, ngan aton alkoba an mga kahoy nga sipres.