Read Waray Samarenyo Meaning Based Kanta han mga Kanta 2 Bible Online

Kanta han mga Kanta 2 - Waray Samarenyo Meaning Based bible

Kanta han mga Kanta 2

¹Usa la ako nga bukad ha kapatagan han Saron, usa nga liryo ha kahimub-an hin bukid.

²Sugad hin liryo dida hin katungkan amo man an akon hinigugma dida han kababayen-an.

³Kon itanding hin iba nga kalalaken-an, an akon minahal, sugad hin kahoy nga mansanas dida ha butnga han kagurangan. Karuyag ko hin pagsirong ha iya landong, ngan pagtilaw han matam-is niya nga bunga.

⁴Gindara ako niya ha iya kombitehan, ngan gintahoban ako niya han bandera han gugma.

⁵Pakusga ako hin mga pasas, ngan pakaona ako hin mga mansanas! Kay naluya ako tungod hin balatian han gugma.

⁶Inuunlan ko an iya wala nga kamot, ngan nahapuhap ha akon an iya tuo nga kamot.

⁷Saari ako niyo, kababayen-an han Jerusalem; pagsumpa kamo pinaagi han malaksi nga bugsok nga diri niyo sasamokon an amon paghigugma.

⁸Nabati ako han tingog han akon higugmaon. Naabot hiya nga nagdadalagan ha kabukiran, ngan ha kapungtoran ngadi ha akon.

⁹Sugad hin malaksi nga bugsok an akon hinigugma, sugad hin nati nga lalaki nga bugsok. Natindog hiya ha ligid han pader. Nahiling hiya ha bintana, ngan nag-iinaw hiya dida han mga rehas.

¹⁰Nakikighimangraw ha akon an akon higugmaon. Sanglit kadi na, akon hinigugma; akon minahal, bunyog ha akon.

¹¹Linmabay na an kathagkot; hinmunong na an pag-inuran;

¹²namumukalkag ha kaumhan an mga bukad. Amo ini an panahon hin pagkanta, hinbabatian ha kaumhan an honi han mga sarapati.

¹³Nagtikang na an pagkahinog han mga igos; nangangalimyon an namumukad nga mga ubas. Sanglit kadi na, akon hinigugma, akon minahal, bunyog ha akon.

¹⁴Sugad ka hin sarapati nga natago ha mga lungag hin bato. Pakitaa ako han imo mahusay nga bayhon ngan pabatia ako han imo manamit nga tingog.

¹⁵Dakpa an mga miro, an gudtiay nga mga miro, nga diri pa nira pupuohon an aton namumukad nga urubasan.

¹⁶Akon hiya, an akon higugmaon, ngan iya man ako. Ginpapasibsib niya an iya panon dida han mga liryo

¹⁷ngada han panharupoy ha kaagahon ngan kapara han kasisidman. Balik gad, akon hinigugma, sugad hin malaksi nga bugsok, sugad hin lalaki nga bugsok ha kabukiran han Betero.[4]