Read Waray Samarenyo Meaning Based Kanta han mga Kanta 3 Bible Online

Kanta han mga Kanta 3 - Waray Samarenyo Meaning Based bible

Kanta han mga Kanta 3

¹Ha akon pagkaturog ha kada gab-i, gin-inop ko an akon higugmaon; ginbiling ko hiya, kundi waray ko hiya hiagii.

²Ginsinudoysudoy ko an syudad, ha kakalsadahan ngan mga kasuoksuokan. Ginbiling ko an akon higugmaon. Ginbiniling ko, kundi waray ko hiya hiagii.

³Hinkit-an ako han nagsusudoy nga mga magbarantay han syudad. Ginpakianhan ko hira, “Waray ba kamo makakita han akon higugmaon?”

⁴Ha akon gudla pagbaya ha ira, hin-agian ko hiya. Ginkaptan ko hiya ngan waray ko na hiya buhii tubtob nga gindara ko hiya ha balay han akon iroy, ngadto han kwarto nga akon natawohan.

⁵Saari ako niyo, kababayen-an han Jerusalem, pagsumpa pinaagi han maglaksi nga mga bugsok nga diri niyo sasamokon an amon paghigugma.

⁶Ano ba ini nga tikanhi tikang ha sinirangan, sugad hin harigi nga aso, nga nangangalimyon hin insyenso ug mirra, an insyenso nga iginbaligya han mga magparatigayon?

⁷Kitaa! Amo ini hi Solomon nga sakay han iya trono; saysenta nga mga sondalo an gwardya ha iya, an gimamaupayi nga mga sondalo ha Israel.

⁸Batid hira ngatanan han espada; batid gud hira ngan nalagas na la hira ha pag-awayan. Sangkap hin espada an kada usa ha ira, andam kon sulongon hira ha gab-i.

⁹Nasakay hin trono hi Hadi Solomon nga hinimo han gimamahali nga kahoy.

¹⁰Pinutos hin salapi an mga harigi hini; hinapinan ini hin dugnit ngan sinamay hin bulawan. Pinutos hin dugnit nga mapula an mga kohen hini, nga ginhablon han kababayen-an han Jerusalem.

¹¹Kababayen-an han Sion, kadi ngan kitaa hi Hadi Solomon. Nakakasul-ot hiya han korona nga iginbutang han iroy niya ha iya ulo, ha adlaw han pagkasla ha iya, ha adlaw han iya pagkalipay ngan pagrayhak.