Read Waray Samarenyo Meaning Based Kanta han mga Kanta 4 Bible Online

Kanta han mga Kanta 4 - Waray Samarenyo Meaning Based bible

Kanta han mga Kanta 4

¹Hin pagkamahusay mo, akon hinigugma! Nasilaw gud hin gugma an imo mga mata ha luyo han imo masilag nga bilo! Nasayaw an imo buhok sugad hin panon hin kakandingan nga nagkakalugsong ha kapungtoran han Galaad.

²Mabusag an imo mga ngipon sugad han kabusag han mga karnero nga bag-o pa gudla nga inarotan ngan kinarigosan. Waray gud hini may naiban; padispadis gud ini ngatanan.

³Sugad an imo mga im-im hin pula nga laso; matahom pagkit-on kon nagyayakan ka! Nasilaw an imo mga bayhon ha luyo han imo masilag nga bilo.

⁴Sugad han lantawan ni David an imo liog, malidong ngan mahamis,[5] nga may nabitay nga kwentas nga sugad hin usa ka yukot nga mga taming.

⁵Sugad hin maglaksi nga mga bugsok an imo mga suso, hin magkaruha nga mga bugsok nga naninibsib hin mga liryo.

⁶Mapakadto ako ha pungtod han mirra, an pungtod hin insyenso, ngada han pagharupoy ha kaagahon ngan han pagpapas han kasisidman.

⁷Hin kamahusay nimo, akon hinigugma, hin kahingpit gud nimo!

⁸Upod ha akon tikang ha Kabukiran han Libano, akon pangarasaw-on, upod ha akon tikang ha Libano. Lugsong tikang ha sampaw han Bukid Amana, tikang ha Bukid Senir ngan Bukid Hermon, diin nag-uokoy an mga liyon ngan mga leyopardo.

⁹An paniplat han imo mga mata, akon hinigugma ug pangarasaw-on, ngan an kwentas nga imo bitay an nakabihag han akon kasingkasing.

¹⁰Nakakalipay ha akon an imo pagmahal, akon hinigugma ug pangarasaw-on. Matam-is pa kay han bino an imo paghigugma; maharuhamot pa kay hin bisan ano nga balsamo imo pahamot.

¹¹Aada ha imo mga im-im an rasa hin dugos, akon minahal, gatas ug dugos para ha akon an imo mga dila. May-ada han ngatanan nga alimyon han Libano an imo panapton.

¹²Usa nga tinago nga tanaman an akon hinigugma ngan pangarasaw-on, inalad nga tanaman, kalugaringon nga burabod;

¹³maupay an pagtubo didto han mga tanom. Natubo ini sugad hin mga granada, nga magrasa an mga bunga. Diri nagkukulang hin nardo ug tiena,

¹⁴hin asafran, kalamos, ug kanela, o hin magkalainlain nga insyenso. Naturok didto an mirra ug aloe, upod pa an iba nga mga maghamot nga kahoy.

¹⁵Tinutubigan hin mga burabod an tanaman, an mga sapa hin masulog nga tubig, nga nag-aawas tikang ha Kabukiran han Libano.

¹⁶Pagmata na, Hangin nga Amihan. Hangin nga Habagat, hangini an akon tanaman; pun-a hin alimyon an kahanginan. Pakadtoa ha iya tanaman an akon higugmaon ngan pakaona han labi kamarasa nga mga bunga.