Read Waray Samarenyo Meaning Based Kanta han mga Kanta 5 Bible Online

Kanta han mga Kanta 5 - Waray Samarenyo Meaning Based bible

Kanta han mga Kanta 5

¹Sinmulod ako ha akon tanaman, akon hinigugma, akon pangarasaw-on. Nanguha ako hin balsamo ug mirra; kinmaon ako han balayan nga puno hin dugos inminom ako han bino ug gatas. Kaon ngan inom, mga hinigugma, tubtob han iyo kahubog han gugma!

²Samtang nakaturog ako, waray hunong hin pagputok han akon kasingkasing. Nag-inop ako nga nagtuktok ha porta an akon higugmaon. Pasudla ako, akon minahal, akon higugmaon, akon sarapati. Mahulos na hin tun-og inin akon ulo, ngan humog na hin yamog an akon buhok.

³Naghubo na ako; kay ano nga magbabado na liwat ako? Nanhimsaw na ako; kay ano nga huhugawan ko na liwat an akon mga tiil?

⁴Kinaptan han akon higugmaon an porta, ngan nalipay ako nga hirani hiya.

⁵Andam na ako hin pagpasulod ha iya. Naputos hin mirra an akon mga kamot, Nagturo han tunaw nga mirra an akon mga tudlo, han pagkapti ko han trangka han porta.

⁶Binuksan ko an porta para han akon higugmaon, kundi waray na hiya dida. Ungara ko gud hin pamati han iya tingog! Ginbiling ko hiya, kundi waray ko na hiagii; gintawag ko hiya, kundi waray na hiya bumaton.

⁷Hin-agian ako han mga magbarantay nga nagsusudoy han syudad; ginbalbag ngan ginsamad ako nira; gingisi han mga gwardya han pader an akon kurugpos.

⁸Kababayen-an han Jerusalem, saari ako niyo nga kon hiagian niyo an akon higugmaon, sumati hiya niyo nga masakit na ako tungod hin paghigugma.

⁹O labi kamaanyag han kababayen-an, lain ba han iba an imo higugmaon? Ano gud an makawiwili dida ha iya nga pasasaaron mo man kami?

¹⁰Gwapo ngan makusog an akon hinigugma; usa la hiya ha napulo ka yukot.

¹¹Mahal pa hiya kay han bulawan; kurong an iya buhok, nga lubos maitom sugad hin uwak.

¹²Maanyag an iya mga mata sugad han mga sarapati ha ligid hin masulog nga sapa, mga sarapati nga kinarigosan hin gatas, ngan nag-uokoy ha ligid han sapa.[6]

¹³An iya mga bayhon matahom sugad hin tanaman, nga puno hin mga tanom nga maghamot. Sugad hin mga liryo an iya mga im-im, nga hulos han tunaw nga mirra.

¹⁴Bibyooson an iya mga kamot, ngan nakakasul-ot hiya hin mga singsing nga may mga mahal nga bato. Sugad hin mahamis nga marpil[7] an iya lawas, nga luob hin mga bato nga sapira.

¹⁵Mga harigi nga alabastro an iya mga paa, nga ipinatungtong hin bulawan. Makaaramdok hiya sugad han Kabukiran han Libano, nga may nananawantawan nga mga sidro!

¹⁶Matam-is paghadkan an iya baba; aada ha iya an ngatanan ko nga ungara. Amo ini hiya, an akon higugmaon, O kababayen-an han Jerusalem.