Read Waray Samarenyo Meaning Based Kanta han mga Kanta 6 Bible Online

Kanta han mga Kanta 6 - Waray Samarenyo Meaning Based bible

Kanta han mga Kanta 6

¹O labi kamatahom han kababayen-an, diin pakadto an imo higugmaon? Sumati kami han dalan nga iya gin-agian, basi kabuligan ka hin pamiling ha iya.

²Kinmadto ha iya tanaman an akon higugmaon, diin naturok didto an mga kahoy nga balsamo. Nagpasibsib hiya han iya panon didto ha tanaman, ngan nanguha hiya hin mga liryo.

³Akon hiya, an akon higugmaon, ngan iya man ako; nagpasibsib hiya han iya panon dida han mga liryo.

⁴Sugad ka han Jerusalem kamahusay, akon hinigugma, sugad ka kamatahom han syudad han Tirsa, sugad ka kamakaaramdok hini nga dagko nga mga syudad.[8]

⁵Ilingiw ha akon an imo mga mata; kay nabibihag ako hini. Nagsasayaw an imo buhok sugad hin panon hin kakandingan, nga nagkakalugsong ha kapungtoran han Galaad.

⁶Sugad kamagbusag an imo mga ngipon hin panon hin kakarnerohan, nga bag-o pala nga ginkurigosan. Waray gud hini may naiban; padispadis gud ini ngatanan.

⁷Nasilaw an imo mga bayhon ha luyo han imo masilag nga bilo.

⁸Makakaangkon an hadi hin 60 nga mga rayna, hin 80 nga mga aruasawa, ngan diri maihap nga kadaragan-an!

⁹Kundi usa gudla an akon hinigugma, ngan sugad hiya hin sarapati kamahusay. Usa gudla hiya nga anak nga babaye han iya nanay, an pinauna nga bata han iroy niya. Natan-aw ngan nadayaw ha iya an ngatanan nga kababayen-an. Nagkakanta an mga rayna ngan mga aruasawa han ira mga pagdayaw ha iya.

¹⁰Hin-o ba ini kanay paniplat sugad hin kaagahon? Maanyag sugad han bulan ngan mapawa sugad han adlaw?[9]

¹¹Linmugsong ako tikang han mga almendras hin pagkita han linghod nga mga tanom ha kahamub-an, hin pagkita han lapyo nga mga dahon ha mga ubas ngan han mga biyuos nga bukad han mga kahoy nga granada.

¹²Nangungurog ako; gindasig mo ako hin paghigugma sugad han kutsero han karuwahe tipakadto ha pag-awayan.[10]

¹³Sayaw, sayaw,[11] daragita han Sulam. Pakitaa kami han imo pagsayaw. Kay ano nga karuyag niyo kumita ha akon samtang nasayaw ako ha butnga hin mga rumbay hin mga magkirita?