Read Waray Samarenyo Meaning Based Kanta han mga Kanta 7 Bible Online

Kanta han mga Kanta 7 - Waray Samarenyo Meaning Based bible

Kanta han mga Kanta 7

¹Hin pagkamaanyag mo nga babaye! Hin pagkamatahom han imo mga tiil nga may sandalyas. An kabawog han imo mga paa buhat hin usa nga iskultor.

²An imo pusod sugad hin surudlan nga dayuday puno hin mahamot nga bino. An imo hawak sugad hin usa nga upong hin trigo, nga ginpapalibotan hin mga liryo.

³Sugad hin magkaruha nga bugsok an imo mga suso, sugad hin duha nga maglaksi nga mga bugsok.

⁴Sugad hin torre nga marpil an imo liog. An imo mga mata sugad han mga linaw ha syudad han Hesebon, hirani han ganghaan hito nga syudad nga dako. An imo irong sugad han lantawan han Libano, nga naatubang han Damasco.

⁵An paghangad han imo ulo sugad han Bukid Carmelo. An tinalunay mo nga buhok matahom sugad han gimamaupayi nga satin; nakakabihag hin hadi an kamaanyag[12] hini nga buhok.

⁶Hin pagkamahusay mo, hin pagkamatahom mo! Hin pagkahingpit han mga kalipay han imo paghigugma!

⁷Sugad ka hin kahoy nga palmera kamalubay, ngan an imo mga suso mga urapong han mga bunga han palmera.

⁸Akon pagsasak-on an kahoy nga palmera, ngan pamumuroon ko an iya mga bunga. Ha akon an imo mga suso, sugad hin mga urapong hin ubas. An imo gininhawa sugad han alimyon han mansanas,

⁹ngan an imo baba sugad han labi kamaramit nga bino. Niyan paawasa an bino nga diri nahapit ha mga im-im ug ngipon[13] han akon higugmaon, kundi nadayon la ngadto ha iya but-ol.

¹⁰Iya ako han akon hinigugma, ngan naungara hiya ha akon.

¹¹Tana, higugmaon, kadto kita ha kaumhan, ngan didto kita ha kabaryohan[14] hin pagpalabay han kagab-ihon.

¹²Mabangon kita hin sayo ngan kikitaon ta an mga puno hin ubas kon nanaringsing na ini, kon nanmuklad na an mga biyuos, ngan kon nanmukad na an mga granada. Didto igtutug-an ko ha imo an akon paghigugma.

¹³Mangangalimyon ha imo an mga mandragora, ngan an ngatanan nga mag-upay nga mga bunga aada ha aton portahan. Gin-andam ko para ha imo, akon hinigugma, an daan ngan an bag-o nga makakahatag ha aton hin kalipay.