Read Waray Samarenyo Meaning Based Kanta han mga Kanta 8 Bible Online

Kanta han mga Kanta 8 - Waray Samarenyo Meaning Based bible

Kanta han mga Kanta 8

¹Hingyap ko nga bugto ka unta nakon nga lalake, nga ginpasuso ha dughan han akon iroy. Basi kon magkatapo kita ha kalsada, makaharok ako ha imo hin waray manginginlabot ha aton.

²Dadad-on ko ikaw ngadto ha balay han akon iroy, diin makakatutdo ka ha akon hin paghigugma. Tatagan ko ikaw hin pinahamotan nga bino, ngan paiimnon ta ikaw han akon bino nga granada.

³Inuunlan ko an imo wala nga kamot, ngan nahapuhap ha akon an tuo mo nga kamot.

⁴Kababayen-an han Jerusalem, saari ako niyo nga diri niyo pagsasamokon an amon paghigugma.

⁵Hin-o ini nga naabot tikang ha kamingawan, nga nag-aagbayay ngan han iya hinigugma? Ginpukaw ko ikaw ha sirong han kahoy nga mansanas, ha dapit nga imo natawhan.

⁶Sadhi an imo kasingkasing ha ngatanan nga paghigugma labot ha akon, ayaw na paggakos hin iba labot ha akon. Sugad kagamhanan han kamatayon an paghigugma; sugad kamapintas han kamatayon an pag-abugho. Naglalarab ini ngan naglalaga sugad hin naglalahinggab nga kalayo.

⁷Waray tubig nga makakaparong; waray baha nga makakasubo hini. Kundi kon may-ada magtinguha hin pagpalit hin gugma pinaagi han iya manggad, pagtamay la an iya maaangkon.

⁸May namon batan-on nga bugto nga babaye, ngan gudtiay pa an iya mga suso. Ano an amon bubuhaton para ha iya kon umabot in ulitawo nga mangulitawo ha iya?

⁹Kon usa hiya nga pader, pananalipdan namon hiya hin torre nga salapi. Kundi kon usa hiya nga ganghaan, pananalipdan namon hiya hin sidro nga mga tabla.

¹⁰Usa ako nga pader ngan an mga torre hini amo an akon mga suso. Maaram an akon higugmaon nga kon upod ako ha iya, hiaagian ko an kahimyang ug kamurayaw.

¹¹May-ada urubasan hi Solomon didto hin dapit nga ginngaranan Baal Hamon. Ngan ginpahuram ini niya ngadto hin mag-uruma; nabayad an kada usa hin usa ka yukot nga salapi.

¹²Hipusa, Solomon, an imo usa ka yukot nga salapi, ngan babahinan ko hin duha ka gatos nga salapi an mga mag-uruma. May-ada ko kalugaringon nga urubasan.

¹³Pabatia ako han imo tingog tikang ha tanaman, akon hinigugma; naghuhulat an akon mga kaurusa hin pamati han imo mga pulong.

¹⁴Kadi ha akon, akon higugmaon, sugad hin malaksi nga bugsok, sugad hin bugsok nga lalaki ha kabukiran nga naturok in mga maghamot nga tanom.