Read Waray Samarenyo Meaning Based Kinaadman ni Solomon 14 Bible Online

Kinaadman ni Solomon 14 - Waray Samarenyo Meaning Based bible

Kinaadman ni Solomon 14

¹Ha amo nga paagi, in usa ka tawo nga nag-aandam hin pagsakay dida hin mabalod nga dagat magtatawag hin pakibulig hin usa ka tipak nga kahoy nga diri ngani sugad hin kadig-on han barko nga iya pagsasakyan.

²Ginhimo an barko basi in usa ka tawo makaganansya, ngan ginhimo ini hin usa nga batid nga panday hin barko.

³Kundi an imo panimangno, O Amay, amo an nag-uulin han barko; masayonay an imo pagpalakat han barko ha butnga han mga balod han dagat.

⁴Mahimo nga magsakay an mga tawo ha dagat bisan kon waray nira hinbabaroan, kay makakahimo ka man hin pagtalwas ha ira ha bisan ano nga kataragman.

⁵Imo ini kaburot-on nga an mga butang nga ginhimo han imo kinaadman, mamay-ada gamit. Sanglit nakakatabok han dagat an mga tawo dida hin usa nga sakayan ngan nakakaduong ha tuna nga talwas ngan maupay an mga lawas, kay ira igintapod an ira mga kinabuhi ngada hito nga gutiay nga retaso hin kahoy.

⁶Amo gihapon an nahinabo hadto nga mga panahon, han nagtitikapara na in usa nga mapinahitas-on nga tulin hin mga higante. Nakalikay an paglaom han kalibutan, sakay hini nga sakayan ha ubos han imo pagmando ngan iginbilin mo ha kalibutan in usa nga katulinan nga magpapadayon han katawhan.

⁷Baraan an kahoy nga sakayan ni Noe kay tinugotan nga mabuhi an pagkamatadong,

⁸kundi may-ada gaba in usa nga diyosdiyos nga kahoy nga ginhimo la hin mga kamot hin tawo ngan gagabaan liwat an tawo nga naghimo hini, kay ginbubuhat niya ini nga may pagkaanaw nga butang ngan onina gintatawag niya nga diyos.

⁹An Dyos nagdudumot han diri dyosnon nga mga tawo ngan hini nga diri dyosnon nga mga butang nga ira ginhihimo,

¹⁰ngan magkakastigo han mga butang nga ginhimo ngan han mga tawo nga naghimo hini.

¹¹Sanglit an paghukom han Dyos mahingangadto han pagano nga mga diyosdiyos, kay bisan kon ginhimo ini tikang hin butang nga gintuha han Dyos, nahimo ini nga makangingirhat nga mga butang nga nagbibitik han mga kalag han lurong nga mga tawo.

¹²Nagtikang an lawasnon nga kalaw-ayan dida han syahan nga paghimoa han mga diyosdiyos. Ira gindaot an kinabuhi han tawo tikang pa han syahan nga paghimoa ha ira.

¹³Diri dayuday aanhi an mga diyosdiyos, ngan diri ini hira magpapadayon.

¹⁴An pagkamapinahitas-on han tawo amo an nagdara ha ira nganhi ha kalibutan, sanglit ginlarang na in tigda nga kataposan para ha ira.

¹⁵May-ada hadto usa nga amay nga natugob hin kabidoan tungod han madali nga pagkamatay han iya anak, sanglit naghimo hiya hin usa nga ladawan han iya anak nga binmaya hin tigda ha iya. Sanglit ginpasidunggan niya in usa nga patay nga tawo sugad nga usa nga diyos, ngan naghimo hiya hin hilom nga mga turumanon ug seremonyas para han iya mga ginsakopan.

¹⁶Lakat han panahon, nagtikadamo an nagtuman hini nga diri dyosnon nga pamatasan. Ha kataposan nahimo ini nga balaod, ngan ginsingba na in mga diyosdiyos ha ubos han sugo han mga punoan.

¹⁷Han pag-ukoy han mga tawo didto hin hirayo nga mga dapit nga diri na hira nakakagpasidungog han ira punoan, karuyag nira nga makagpasidungog hira han ira hadi bisan kon diri hira nakita; ira ginpainoino kon ano gud an iya hulagway, ngan nagpahimo hira hin usa nga pareho ha iya.

¹⁸An mga higtaas an panuyo nga mga maghirimo hini nga mga ladawan amo an nagpasarang hini nga pagsingba, bisan dida hin mga tawo nga diri nakilala han hadi.

¹⁹Bangin karuyag in usa nga maghirimo hin pagpahalipay hin usa nga punoan, sanglit gintatalinguha niya nga magmauruupay an ladawan kay han tawo ngahaw.

²⁰Niyan nalulukmay an mga tawo pinaagi han kamahusay han trabaho, ngan an tawo nga ira ginpasidunggan hadto amo na yana an ira ginsisingba.

²¹Sanglit nahihimo ini nga usa nga malara nga bitik, kay an mga tawo nga aada hin kabidoan, ug kahadlok han mga punoan, nakuha hin bato o kahoy, ngan gintatagan nira hin pagpasidungog nga para la unta hin Usa nga Dyos.

²²An usa nga butang sinusundan hin iba. Diri igo an pagsayop hiunong han hibaro han Dyos. Nag-ukoy hira ha usa nga kahimtang hin maraot nga pakig-away, kundi uraura hira hin kaburong nga an ira hunahuna nga may-ada nira kalinaw.

²³Ira pinamatay in kabataan kay bahin ini han ira mga seremonyas hin pagpasakop, ginsaurog nira in hilom nga mga misteryo, ginbuhat in maglaw-ay nga mga seremonyas upod in maghilas nga mga binuhatan nga supak han kinaiya han tawo.

²⁴Waray na nira pagtalinguhaa hin pagputli han ira kinabuhi o han ira mga pag-asawa.

²⁵An ngatanan puro la kasamokan hin mga panmatay, panikas, panlimbong, pandaot, pagkadiri matinumanon, araway, pagbinuwa,

²⁶panraogdaog hin waray sala nga mga tawo, pagkabungalos, pagkawaray batasan, lawasnon nga pagkamahilas, pagkabulag hin mga mag-asawa, panlibog, ngan pagkamalaw-ay.

²⁷An pagsingba hin mga diyosdiyos, kanay mga ngaran kinahanglan diri gud igyakan, amo an tinikangan ngan an kataposan, an hinungdan ngan an dadangatan han tagsa nga karat-an.

²⁸An mga tawo nga nagsisingba ha ira diri na nakakapugong han ira kalugaringon tungod hin labis nga kalipay, o pabay-an nga mga buwa in mga panagna, o nga mag-ukoy hin maraot nga kinabuhi, o nga waray na paghialang hin pagtalapas han ira pulong.

²⁹Nagsusumpa hira hin mga buwa ngan diri nagpapaabot hin kastigo, kay waray kinabuhi an mga diyosdiyos nga ira sinasarigan.

³⁰Kundi ha kataposan hinsasakban hira han kastigo tungod hin duha nga hinungdan: syahan, nagsayop hira hiunong han Dyos han pagsingba nira hin mga diyosdiyos, ngan ikaduha, gutiay la an ira pagtagad para hin pagkabaraan kay naghimo hira hin buwa nga mga yayaknon paglimbong hin mga tawo.

³¹Kon makasala an diri magtadong nga mga tawo, pagbibilngon hira, diri pinaagi han gahom han bisan ano nga butang nga ira ginamit hin pagsumpa, kundi pinaagi han kastigo nga angay han mga makasasala.