Read Waray Samarenyo Meaning Based Kinaadman ni Solomon 18 Bible Online

Kinaadman ni Solomon 18 - Waray Samarenyo Meaning Based bible

Kinaadman ni Solomon 18

¹Kundi samtang nahinanabo ini may-ada usa nga masilaw nga kapawa nga nakalamrag han imo baraan nga mga tawo. Nakabati an ira mga kaaway han ira mga tingog, kundi waray hira makakita ha ira. Naawa hira han maupay nga kapalaran han imo mga tawo nga waray mag-antos.

²Adto nga mga kaaway nagpasalamat na man la nga ini nga mga tawo nga ginbuhatan nira hin sayop hadto waray makahunahuna hin pagbulos yana ha ira; sanglit ginhangyo nira nga bumaya ha ira.[10]

³Niyan imo gin-unhan an imo mga tawo han paglatas nira hin usa nga nasod nga waray nira hibaroi. Gin-unhan mo hira pinaagi hin usa nga harigi nga kalayo. Sugad ini hin adlaw nga waray maglabot ha ira dida han ira malamposon nga paglakaton.

⁴Kundi an ira mga kaaway nga waray tugoti hin pagkita han kapawa, angay pagprisohon ha kasisidman, kay ira ginpriso an imo mga tawo. Ngan pinaagi hini nga imo mga tawo an dayon nga kapawa han Balaod ighahatag ha kalibutan.

⁵Han pagtuman na han imo mga kaaway an ira tinguha hin pamatay han mga minasus-an han imo baraan nga mga tawo, may-ada usa nga bata nga ginbayaan kundi ginsapod gihapon. Niyan imo ginkastigo an imo kaaway pinaagi hin pamataya han ira kalugaringon nga mga anak. Gindurungan mo hin paglumos han bug-os nira nga kasondalohan didto han masulog nga katubigan.

⁶Kundi daan ginsumatan an amon kaapoy-apoyan kon ano an mahinanabo hito nga gab-i, basi hira malipay ngan madasig hin matapod nga pagsarig han imo mga saad ha ira.

⁷Maaram na an imo mga tawo nga imo pagtatalwason an matadong nga nasod ngan pagpupuohon an ira mga kaaway.

⁸Pinaagi han amo ngahaw nga buhat imo ginkastigo an amon mga kaaway ngan imo kami ginpasidunggan nga malipayon ngan gintawag mo kami ngada ha imo ngahaw.

⁹Ha ngatanan hini nga panahon an mainampoon nga mga tawo tikang hini nga matadong nga nasod daan na naghalad hin hilom hin mga tinubod nga hayop, ngan nagkasarabot hira nga ira pagtutumanon an balaod han Dyos ngan mag-iinangbitay hira han ira mga kaupayan ngan mga kataragman. Daan na hira nagkanta hadto nga mga imno hin pagdayaw.

¹⁰Kundi nag-aningal tikang han tagsa nga dapit an magpakalolooy nga mga pagtangis han ira mga kaaway, kay nagmasulob-on hira tungod han ira mga patay nga anak.

¹¹Nag-antos an mga agaron han amo ngahaw nga sirot nga gin-antos han iramga oripon; nag-antos an hadi han amo ngahaw nga kapakyasan nga gin-antos han sakop niya nga mga tawo.

¹²Damo didto in patay nga mga lawas nga makuri maihap. Diri na damo an mga tawo nga nahisalin hin paglubong hini ngatanan. Ha usa la ka takna nagkamatay an ira labi ka hinigugma nga mga anak; nagkamatay hira ngatanan ha amo ngahaw nga paagi.

¹³Waray bumali ini nga mga tawo hin bisan ano nga pahimatngon, kundi tinmapod lugod hira han gahom han ira salamangka. Kundi han pamataya na han ira suhag nga mga anak nga kalalaken-an, nakasabot na hira nga anak han Dyos an Israel.

¹⁴Ha katutnga han kagab-ihon, ngan mamingaw ngan malinaw na an ngatanan,

¹⁵tigda la nga natuman an imo mga pagtarhog! Usa nga gamhanan nga pulong hin paghukom ginmawas tikang han imo hadianon nga trono ha langit ngan linmusad dayon ngadto han tuna nga imo pagpupuohon. Inmabot ini sugad hin usa nga mapintas nga pagsulong hin sondalo,

¹⁶nga nagtutuman han imo marig-on nga sugo dara in usa nga hinganiban hin panarhog, nga natukdaw ha bawbaw han tuna ngan an iya ulo nasukdo han langit, ngan ginluob hin kamatayon an tuna.

¹⁷Dida hito nga takna ginngarat an mga tawo nga tikamaratay ngan inalpan hira hin tigda nga kahadlok.

¹⁸Ha bug-os nga tuna natumba hira nga himaratyon ngan

¹⁹hinbaroan nira kay ano nga mapatay hira, kay ginsumatan hira pinaagi han ira magpakaharadlok nga mga inop.

²⁰Inmabot liwat an kamatayon ngadto han matadong nga nasod, kay dinmangat ha kadam-an ha ira han nakadto pa hira ha kamingawan in peste kundi waray pag-iha an imo kasina.

²¹May-ada didto usa ka tawo nga matadong ngan ginmios dayon hin pagpanalipod ha ira. Ha iya mga buhat hin pagkapadi para ha ira, naghalad hi Aaron hin mga pag-ampo ngan nagtubod hin insyenso nga gingamit dida hin paghangyo nga pasayloon an mga sala. Upod an mga pag-ampo ngan insyenso sugad nga iya mga hinganiban, inmato hiya han imo kasina ngan natapos an karat-an. Ha pagbuhata niya hini ginpamatud-an nga imo hiya surugoon.

²²Gindaog niya an mapait nga kakurian,[11] kundi diri pinaagi han kalugaringon niya nga kusog o hin kusog hin kasondalohan. Lugod, ginmamit hiya hin pag-ampo basi diri ipadara an sirot, upod an pagdangop han mga saad nga imo iginsumpa hin paghatag ngadto han amon kaapoy-apoyan.

²³Natambak na an patay nga mga lawas, kundi naghangyo hiya nga kapugngan an imo kasina ngan kapugngan ini basi diri makadaot hadton mga nanhisalin pa nga mga buhi.

²⁴Nagsul-ot hiya hin hilawig nga panapton nga binordahan hin mga simbolo han bug-os nga kalibutan. Ha pagpasidungog han amon kaapoy-apoyan nagsul-ot hiya hin upat ka rumbay nga tinigib nga mga bato dida han iya dughan ngan an kalugaringon mo nga pagkahadi tinitindogan han rayandayan dida han pudong han iya ulo.

²⁵Nahadlok hini nga mga butang an Anghel han Kamatayon, ngan inmundang hiya. Gutiay la ini nga hinabo hin pagsari han imo kapungot, kundi igo na adto.