Read Waray Samarenyo Meaning Based Kinaadman ni Solomon 2 Bible Online

Kinaadman ni Solomon 2 - Waray Samarenyo Meaning Based bible

Kinaadman ni Solomon 2

¹Sayop an magraot nga mga tawo kon nasiring hira ha ira ngahaw, “Halipot la an aton kinabuhi ngan tugob hin kabidoan, ngan kon naabot na an kataposan, waray naton mahihimo. Waray pa tawo nga hinbaroan nga binmalik tikang han kalibutan han mga minatay.

²Dalikyat la an aton katawo ngan katapos han kinabuhi, masusugad kita hin waray ngani katawo. An aton gininhawa sugad la hin aso; an aton hunahuna sugad la hin usa ka sispas hin kalayo nga tabsik la han putok han aton kasingkasing.

³Kon maparong na ito nga sispas, mahihimo an aton lawas nga mga agbon ngan an aton gininhawa nahihimo nga bahin han kahanginan.

⁴Lakat han panahon waray na manunumdom han bisan ano nga aton ginbuhat, ngan hingangalimtan bisan an aton mga ngaran. Magpapapas an aton kinabuhi sugad han mga lutop han mga dampog ngan mapapara sugad hin burong kon sinisirakan han adlaw.

⁵Sugad la an aton panahon ha tuna hin usa nga nalabay nga lambong. Waray makakakalagiw han adlaw han aton kamatayon; gintalaan na ini, ngan diri na ini mauugsod.”

⁶Nasiring an mga magraot, “Sanglit tana, ngan pagpahimulos kita han mag-upay nga mga butang han kinabuhi, ngan pag-ukoy kita dinhe ha kalibutan sugad han aton ginbuhat han mga batan-on pa kita ngan waray naton pagkabaraka!

⁷Pag-inom kita han gimamahali nga mga bino ngan paggamit kita han giuupayi nga mga pahamot. Ayaw naton ligari in usa nga bukad ha panahon han pagtikang han katsirak!

⁸San-o malaya an mga rosas, paminggota ta ini ngan igsabong han aton buhok!

⁹Pagrugyaw kita ngatanan ngan pagbutang kita hin mga tigaman ha tagsa nga dapit han aton mga patakas nga pagrayhak, kay amo ini an aton malon ug an aton palad.

¹⁰“Pagraraogdaogon naton an mga kablas bisan kon mga magtadong hira. Diri kita matahod han balo nga kababayen-an o han mga kalagsan.

¹¹Makakasiring kita nga matadong kita kon may-ada naton igo nga kusog hin pagkuha han aton karuyag. Waray gud hingangadtoan pinaagi hin pagkamaluya!

¹²Mga magsamok an magtadong nga mga tawo, sanglit pangita kita hin mga higayon hin pagpatay ha ira. Nalaris hira han aton ginbubuhat, ginsusumbong kita nira nga nagtatalapas kita han Balaod ni Moises ngan nasupak han mga pagturon-an han aton kaapoy-apoyan.

¹³Nagtutug-an hira nga hira an nakilala han Dyos, ngan natawag hira ha ira ngahaw nga mga anak hira han Ginoo.

¹⁴Diri kita nailob hin pagkita hin sugad nga mga tawo; nakontra hira han bug-os naton nga panhunahuna.

¹⁵Diri hira sugad han iba nga mga tawo, malain an ira mga paagi.

¹⁶Naghuhunahuna hira nga uraura hin kamaraot an aton pamatasan nga angay paglikyan an ngatanan nga aton ginbubuhat. Naghihinambog hira nga ira Amay an Dyos, ngan nagtotoo hira nga kon igsiring ngan pagbuhaton na an ngatanan, an mga magtadong la an magmamalipayon.

¹⁷Kundi kikitaon ta kon matuod ba ni! Kitaa ta kon ano an mahinanabo kon umabot na an takna han ira kamatay!

¹⁸Kon tinuod nga mga anak han Dyos an mga magtadong, tatalwason hira han Dyos tikang han ira mga kaaway.

¹⁹Sanglit sarihi ta hira. Pagraraogdaogon ta hira, ngan pagsasakiton ta hira; niyan hisasabotan ta kon tiunan-o an ira kamurayaw ngan kamatadong! Hibabaroan ta kon tubtob ngain an ira pagpailob!

²⁰Pagsisirotan ta hira hin makaarawod nga kamatayon. Kon baga sidngon, ira man siring nga pananalipdan hira han Dyos.”

²¹Amo ito an panhunahuna han magraot nga mga tawo, kundi nagsasayop hira. Ginbubuta hira han kalugaringon nira nga pagkamaraot.

²²Waray gud hira mahibaro han mga tinago han Dyos, waray gud hira maglaom han mga balos hin usa nga baraan ngan waray ikakasuson nga kinabuhi.

²³Han pagtuhaa ha aton han Dyos, waray hiya maglarang nga magkamatay kita; iya ginhimo kita nga sugad ha iya ngahaw.

²⁴An pangabugho han Yawa amo an nagdara han kamatayon nganhi ha kalibutan, ngan adton mga sakop han Yawa amo an magkakamatay.