Read Waray Samarenyo Meaning Based Kinaadman ni Solomon 3 Bible Online

Kinaadman ni Solomon 3 - Waray Samarenyo Meaning Based bible

Kinaadman ni Solomon 3

¹Kundi pinananalipdan han Dyos an mga magtadong ngan diri hira mag-aantos hin kasakitan.

²Usa ini nga tinuyaw nga sayop hin paghunahuna nga mapatay an mga magtadong ngan nga an ira kamatayon usa nga makalilisang nga karat-an.

³Nabaya hira ha aton kundi diri ini usa nga karat-an. Ngani murayaw an kinabuhi han mga magtadong.

⁴Daw nag-aantos hira hin sirot, kundi may-ada hira buhi nga paglaom han kinabuhi nga waray kamatayon.

⁵Gutiay la an ira mga pag-antos kon igtatanding han mga kaupayan nga ira kakarawaton. Ginsarihan hira han Dyos, sugad hin bulawan nga ginpurog pinaagi hin kalayo ha hudno, ngan hinbaroan nga takos hira hin pakig-usa ha iya. Iya ginkarawat hira sugad han pagkarawat niya han mga halad nga hayop nga pagsusunogon dida ha altar han mga nasingba ha iya.

⁷Kon kumanhi na an Dyos hin pagbalos han mga magtadong, makakapulaw hira han mga magraot sugad hin mga uga nga uhot nga naglalalaga.

⁸Maghahadi hira han mga nasod ngan mga katawhan, ngan magigin hadi nira ha kadayonan an Ginoo.

⁹Adton mga nasarig han Dyos makakasabot han kamatuoran han iya mga paagi. Mag-uokoy upod han iya gugma adton nagin matinumanon ha iya, kay maloloy-on ngan mapinairon hiya han iya mga pinili.[1]

¹⁰Kundi makarawat an mga magraot han sirot nga angay han magraot nira nga mga panhunahuna kay inmato hira han Ginoo ngan gindiwara nira an matadong.[2]

¹¹An usa ka tawo nga nadiri hin kinaadman o hibaro may-ada makalolooy nga kinabuhi nga pamumulaton niya. Waray na niya sadang paglaoman. Waray gamit an iya mga pagkabudlay, ngan waray gud niya mahihimo nga mapulsanon nga butang.

¹²An babaye nga iya pinangangasawa diri katataporan, ngan an iya mga anak mahinga ngadto hin karat-an.

¹³Gagabaan an ngatanan niya nga mga tulin. Ha adlaw han paghukom babaloson han Dyos an babaye nga baw-as, basta diri hiya makasala hin paglingo han iya bana. Niyan magmamalipayon hiya.

¹⁴Dida hito nga adlaw, pagbabaloson hin kalipayan bisan an tawo nga ginkaponan, kon gintuman niya an Balaod ngan waray hiya magtipig hin kasinahon supak han Ginoo. Tungod nga nagin matinumanon hiya, makarawat hiya hin linain nga balos nga maromahal kay hin pagkamay-ada mga anak: usa nga dapit didto han langitnon nga Templo han Ginoo.

¹⁵An tangkod nga mga binuhatan sugad hin usa nga kahoy nga makaruruyag an mga bunga. An kinaadman sugad hin usa nga buhi nga gamot nga dayuday nakakaghatag hin bag-o nga mga sanga.

¹⁶Kundi mapatay hin sayo nga kamatayon an mga anak nga natawo tungod hin panlibog o hin igindidiri nga pakighilawas.

¹⁷Kundi bisan kon mabuhi hira hin maiha, waray gud nira kapulsanan. Diri hira pagtatahoron ha ira pagkalagas,

¹⁸ngan kon mamatay hira nga batan-on pa, mawawaray nira paglaom o kaliawan ha Adlaw han Paghukom.

¹⁹Mag-aantos hin makalolooy nga kapalaran an mga anak nga matawo hin igindidiri nga pakighilawas.