Read Waray Samarenyo Meaning Based Kinaadman ni Solomon 5 Bible Online

Kinaadman ni Solomon 5 - Waray Samarenyo Meaning Based bible

Kinaadman ni Solomon 5

¹Dida hito nga adlaw matukdaw nga puno hin pagtapod an matadong nga tawo ha atubangan hadton mga nagraogdaog ha iya ngan waray pagmahal han iya mga pagkabudlay.

²Mahipapausa hira hin pagkita ha iya nga himyang na an iya kamutangan ngan mangungurog hira hin makalilisang nga kahadlok.

³Niyan magbabasol hira han ira ginbuhat, ngan ha ira pagharoy tungod han kasakitan, may hin siring ha hira:

⁴“Amo ini an tawo nga aton gin-uyan-uyan. An aton hunahuna nga surunlogon la hiya. Hin ka mga lurong naton! Hunahuna naton nga nasabid na hiya hin pag-ukoy sugad han iya ginbuhat hadto, ngan han kamatay niya, waray kita ha iya magdipara.

⁵Ngan yana hahani na hiya, usa han kalugaringon nga mga anak han Dyos, nga may-ada kalugaringon nga dapit dida han mga tawo han Dyos.

⁶Hi kita amo an sinmimang han matadong nga dalan. Waray gud kita pag-ukoy dida han kalamrag han pagkamatadong; waray ngani kita kasilaw han syahan nga sulhog han iya kapawa.

⁷Ha aton bug-os nga kinabuhi naglatas kita han mga kamingawan nga waray pa hingadtoi hin tawo, ngan waray ta lugod pagsulsoga an dalan nga karuyag han Ginoo nga aton pag-agian. Ngan ini nga aton pagsupil amo an tinikangan han aton pagpukan.

⁸Pinmarayaw kita han aton kalugaringon—naghinambog kita hiunong han aton pagkariko—ngan yana, ano nga kaupayan an nahimo hini ha aton?

⁹Waray na yana ito ngatanan nga mga butang; napara ini sugad hin usa nga lambong, sugad hin usa nga butang nga imo hinbabatian ngan katapos, hinngangalimtan.

¹⁰“Gintatarap hin usa nga barko an mga balod han kalalawdan, kundi kon human na umagi, waray nabibilin nga tigaman han iya inagian. Diri ka ngani makakasabot nga inmagi ini nga barko.

¹¹Nalupad in usa nga tamsi ha kahanginan, kundi diri nagbibilin hin tigaman nga inmagi ini. Makusog an iya paghanoy ha kahanginan pinaagi han kusog han iya mga pako, ngan waray iginbibilin nga tigaman nga linmabay ini.

¹²Ginbubuhag an hangin pinaagi hin usa nga pana kon pinapalatos ini ngadto han iya ginpapana, kundi kahuman hini nakikipot dayon an hangin, ngan waray nakakasumat kon diin umagi an pana.

¹³Amo ngahaw kita ini—natawo kita, ngan onina diri na kita hikikit-an. Waray naton iginbilin nga tigaman hin maupay nga ginawian ha aton pagtalikod; napuo kita pinaagi han kalugaringon naton nga karat-an.”

¹⁴Ano an paglaom han mga magraot? An paglaom la han uhot nga iginpapalidpalid han hangin, an paglaom han mga bura han kalalawdan[3] nga napapara kon hinuhuyop han bagyo, an paglaom hin aso dida hin harupoy. An ira paglaom diri nag-iiha, sugad la han aton pagdumdom hin usa nga bisita nga nagpapabilin hin usa la ka adlaw ngan nalakat pagkabuwas.

¹⁵Kundi nagpapadayon hin kabuhi an mga magtadong. Pagbabaloson hira han Ginoo; pananalipdan hira han Gihahataasi.

¹⁶Iya tatagan hira hin hadianon nga pagkaanyag ngan hin usa nga matahom nga korona. An iya gamhanan nga mga butkon amo an pananalipdan ha ira.

¹⁷Mapakadto hiya ha pag-awayan nga magtatalinguha hin pagpukan han iya mga kaaway, ngan gagamiton niya an amo ngahaw nga mga binuhat nga iya hinganiban.

¹⁸An pagkamatadong amo an iya panalipod; an matuod nga katadongan amo an iya helmet;

¹⁹an pagkabaraan amo an iya marig-on nga taming.

²⁰Iya pagbabarion an mapintas niya nga kasina ngan hihimoon niya nga espada, ngan an mga gahom han kalibutan maupod ha iya hin pakig-away hadton mga nalulurong hin pag-ato ha iya.

²¹Iigoon han mga lilinti han kikidlat adton ira ginpapanuyo, nga daw sugad hin naghimo an Ginoo hin usa nga bawog hin pana tikang han mga dampog ngan ginpalatos niya in damo nga mga pana.

²²Pauuranon hin mga bato nga yelo an iya mga kaaway pinaagi hin makalilisang nga kakusog. An mga kadagatan ngan mga salog mahaganas ngada ha ira sugad hin makusog nga lunop nga makakabungkag ha ira.

²³Igpapalid hira hin magkusog nga mga bagyo sugad hin uhot. An pagkamatinalapason amo an makakabungkag han bug-os nga kalibutan. An magraot nga mga binuhatan amo an tinikangan hin pagkapukan han mga pamunoan.