Read Waray Samarenyo Meaning Based Kinaadman ni Solomon 6 Bible Online

Kinaadman ni Solomon 6 - Waray Samarenyo Meaning Based bible

Kinaadman ni Solomon 6

¹Sanglit, kamo nga kahadian, kamo nga mga punoan han bug-os nga kalibutan, pamatii an akon igsisiring, ngan pagtun-i niyo.

²Nagdudumara kamo hin damo nga mga tuna ngan naparayaw kamo nga damo in mga tawo nga sakop han iyo pagkahadi,

³kundi iginhatag ha iyo han Gihahataasi nga Ginoo ini nga pagburot-an. Panginginanoon niya kon ano an iyo nabuhat ngan kon ano an iyo ginhuhunahuna hin pagbuhat.

⁴Naghahadi kamo para han Dyos ngan han iya ginhadian, ngan kon diri matadong an iyo pamunoan, kon diri kamo magtahod han balaod, kon diri kamo mag-ukoy hin kinabuhi sumala han kaburot-on han Dyos,

⁵mag-aantos kamo hin tigda ngan makalilisang nga sirot. Mahigpit gud an paghukom hadton aada ha gahom.

⁶Bangin pasayloon tungod hin kalooy an kasaypanan han yano nga mga tawo, kundi maatubang hin mahigpit nga paghukom adton aada ha gahom.

⁷Diri nahadlok hin bisan hin-o an Ginoo han ngatanan, bisan magdiunan-o hin kagamhanan niya. Hiya ngahaw an naghimo han tagsa ka tawo, ma gamhanan hiya o ma yano, ngan waray pinalabi han paghatag ha ngatanan,

⁸kundi mahiruhigpit an iya paghukom han panggawi han mga punoan.

⁹Para ini ha iyo, mga gamhanan nga kahadian, nga akon ginsusurat ini nga mga pulong, basi mahibaro kamo hin pagbuhat dida hin kamaaram ngan hin paglikay hin kasaypanan.

¹⁰Baraan ini nga mga butang, ngan kon iyo ini paggawion ha baraan nga paagi, pag-iisipon kamo ngahaw nga mga baraan. Kon hinbaroan niyo ini nga pagturon-an, makakahimo kamo hin pagpanalipod ha iyo ngahaw didto han Paghukom.

¹¹Sanglit himoa niyo an akon pagturon-an nga iyo manggad ngan kalipay, ngan matututdoan kamo hin maupay.

¹²Malamrag an Kinaadman ngan diri masirom; masayonay hiya hiagian hadton mga nahigugma ngan nagbibiling ha iya.

¹³Madali hiya magpakilala ha iya ngahaw hadton bisan hin-o nga naungara hiya.

¹⁴Bangon hin sayo ha kaagahon hin pagbiling ha iya, ngan waray nimo kasurok-an, hiaagian mo hiya nga nalingkod dida han imo portahan.

¹⁵An pamalandong han Kinaadman amo an pakaangkon hin hingpit nga pagsabot. Kon pangitaon mo hiya diri maiha makakaagi ka hin murayaw nga panhunahuna,

¹⁶kay mamimiling hiya hadton mga takos ha iya, ngan hiaagian ka niya bisan kon hain ka. Maloloy-on hiya ngan maupod hiya ha imo ha tagsa mo nga panhunahuna.

¹⁷Magtitikang an Kinaadman kon kinasingkasing an imo karuyag hin pag-aram. An pag-ungara han Kinaadman amo an paghigugma ha iya;

¹⁸an paghigugma ha iya amo an pagtuman han iya mga balaod; an pagtuman han iya mga balaod amo an pakaseguro han pagkawaray kamatayon,

¹⁹an pagkakawaray kamatayon makakapaharani ha imo ngadto han Dyos.

²⁰An pag-ungara han Kinaadman makakaandam ha imo hin paghadi hin usa nga ginhadian.

²¹Sanglit kamo nga naghahadi hin mga nasod, kon ginpapakamahal niyo an iyo mga trono ngan an mga tigaman hin gahom, pagpasidunggi an kinaadman basi makaghadi kamo ha kadayonan.

²²Igsusumat ko ha iyo kon ano an Kinaadman ngan kon gin-unan-o an kahimo niya. Diri ako magtatago hin bisan ano. Pagsusulsugon ko an iya kasaysayan tikang han tinikangan ngan ipadadayag ko ha ngatanan an paghibaro hiunong ha iya. Diri ko pagpapasibay-an an bisan ano nga bahin han kamatuoran.

²³An aw-anon nga ungara hin pagbantay han kalugaringon ko nga hibaro diri makakapugong ha akon, kay an Kinaadman ngan an kaawa diri magkakausa.

²⁴Kon darudamo an mga tawo nga may-ada Kinaadman, diri na makulba hin pag-ukoy dinhe ha kalibutan. An masinabtanon nga hadi amo an matapod nga sinarigan han iya mga tawo.

²⁵Sanglit pag-admi an akon igtututdo ha iyo, ngan makakagpahimulos ka hini.