Read Waray Samarenyo Meaning Based Kinaadman ni Solomon 9 Bible Online

Kinaadman ni Solomon 9 - Waray Samarenyo Meaning Based bible

Kinaadman ni Solomon 9

¹“O Dyos han amon kaapoy-apoyan, maloloy-on nga Ginoo, pinaagi han imo pulong gintuha mo an tagsa nga butang.

²Pinaagi han imo Kinaadman, ginhimo mo an tawo ngan imo pinapaghadi han bug-os nga binuhat,

³hin pagdumara han kalibutan pinaagi han pagkabaraan ngan pagkamatadong, hin pagpalakat han tunay nga katadongan.

⁴Tagi ako han Kinaadman nga nalingkod ha ligid han imo trono; tagi ako hin usa nga dapit dida han imo mga anak.

⁵Oripon mo ako sugad han akon iroy nga una ha akon. Tawo la ako. Diri ako makusog, ngan an akon kinabuhi halipotay la. Gutiay la an akon pagsabot han Balaod o han paagi hin paggamit hini.

⁶Bisan kon hingpit in usa ka tawo, sugad la hiya hin waray gamit kon waray an Kinaadman nga natikang ha imo.

⁷Imo ako ginpili nga labaw han iba, basi maghadi ako han kalugaringon mo nga mga tawo, hin paghukom han imo mga anak.

⁸Pinapagtindog mo ako hin usa nga templo ha bawbaw han imo baraan nga bukid, hin usa nga altar didto ha Jerusalem, nga amo an syudad nga imo ginpili nga imo urokyan. Sinubad ini hadto nga Templo didto ha langit, nga imo gin-andam tikang pa ha tinikangan.

⁹Kaupod mo an Kinaadman ngan maaram hiya han imo ginbubuhat; nakada na hiya han paghimoa mo han kalibutan. Maaram hiya han imo nalilipayan, kon ano an matadong ngan subay han imo mga sugo.

¹⁰Ipadara hiya tikang han baraan nga kalangitan, tikang han imo maanyag nga trono, basi makagbuhat hiya ha akon kagiliran, ngan mahibaro ako kon ano an nakakalipay ha imo.

¹¹Nahibabaro ngan nakakasabot hiya han tagsa nga butang, ngan pagmamandoan ako niya nga masinaboton han akon ginbubuhat. Pananalipdan ako han iya himaya.

¹²Niyan maghuhukom ako hin maupay han imo mga tawo, ngan mahihimo ako nga takos han trono han akon amay. An akon mga buhat makakalipay ha imo.

¹³“Hin-o gud an mahibabaro han kaburot-on han Dyos?

¹⁴Diri igo para han buruhaton an tinawo nga pangatadongan, ngan ginlilipat la kami han amon mga pilosopiya,

¹⁵kay binubug-atan an amon mga kalag han amon mga lawas nga may-ada kamatayon. Lumalabay la an tunan-on nga lawas, usa nga pinas-an han maabtik nga hunahuna.

¹⁶An aton la nahihimo amo an pagbanabana hiunong han mga butang ha tuna; kinahanglan manlibasog kita hin pag-aram hiunong han mga butang nga suok ha aton. Sanglit hin-o ngani an makakalaom hin pagsabot han langitnon nga mga butang?

¹⁷Waray pa gud may nahibaro han imo kaburot-on, labot kon tagan mo hiya hin kinaadman nga ipadara mo ngadto ha iya an imo baraan nga espiritu.

¹⁸Dida hini nga paagi nahitultol han matadong nga dalan an mga tawo ha tuna, nahibaro han imo nalilipayan, ngan himyang an kamutangan pinaagi han kinaadman.”