Read Waray Samarenyo Meaning Based Sirac 14 Bible Online

Sirac 14 - Waray Samarenyo Meaning Based bible

Sirac 14

¹Kon in usa ka tawo diri magpasagad hin pagyinakan hin waray hangkag, angay hiya paglipayon; diri kinahanglan nga umabat nga salaan hiya.

²Kon in usa ka tawo may-ada malinis nga konsyensya ngan diri hulopanon angay gud nga paglipayon hiya. Gamita hin Maupay an Karikohan

³Diri matadong nga magriko an usa nga halot. Ano an gamit han kwarta para hin usa nga tawo nga kuripot?

⁴Kon pag-igoan mo an imo kalugaringon basi makatirok ka hin manggad, nagtitirok ka la hini para hin iba nga tawo. Gagamiton hin iba nga mga tawo an imo karikohan hin himyang nga pag-ukoy.

⁵Uunanhon mo hin kamahinatagon ha iba kon kuripot ka ha imo kalugaringon, kon diri ka buot magpahimulos han imo kalugaringon nga karikohan?

⁶Waray na malabaw hin kamaraot kay hin usa ka tawo nga kuripot ha iya kalugaringon; usa ini nga sala nga nagdadara hin sirot.

⁷Kon lugaring magbuhat hin maupay in sugad nga tawo, usa la ini nga dalikyat nga hitabo. An iya kahalot maiha kon madali, hisasabotan manta.

⁸In usa nga tawo nga halot amo an usa nga tawo nga maraot, tinatalikdan niya an mga kinahanglanon han mga tawo

⁹ngan diri hiya kontento han aada ha iya. An kahalot[30] makakapagasa han kalag hin tawo.

¹⁰May mga tawo nga kuripot hin duro pagbutang hin pagkaon ha ira kalugaringon nga lamesa.

¹¹Anak kaon hin maupay sugad han imo karuyag ngan pagdara hin angay nga mga halad ngadto han GINOO.

¹²Panumdom nga may adlaw nga maabot ha imo an kamatayon ngan diri ka maaram kon san-o maabot.

¹³San-o umabot ito nga adlaw, magmaloloy-on ka unta han imo kasangkayan; magmahinatagon ka sugad han imo maabot.

¹⁴Ayaw pagpalabya an usa ka adlaw nga diri mo pahimulosan an kalipay. Kon may-ada nimo karuyag pagbuhaton ngan diri man ada sala, padayona ngan buhata ini.

¹⁵Maabot an panahon nga pagbabahibahinon an ngatanan nga imo ginkabudlayan ngan ighahatag ngadto han iba.

¹⁶Sanglit pagmahinatagon; kundi maandam ka liwat hin pagkarawat tikang han iba. Pagpahimulos ngan paglipay kay diri ka makakaagi hin mga kalipayan didto ha tuna han mga patay.

¹⁷An lawas han tawo nagtitikaluya sugad hin dumog nga dugnit. Nagsusugo an kadaan nga balaod nga kinahanglan nga mamatay kita ngatanan.

¹⁸Sugad an mga tawo hin mga dahon dida hin usa nga marampag nga kahoy. May-ada mga bag-o nga saringsing nga maliwan han mga dahon nga nataktak. Samtang napatay an iba ha aton, may-ada liwat iba nga natatawo.

¹⁹Madudunot ngan maaanaw an ngatanan nga hinimo hin tawo, upod an tawo nga naghimo hini. May Kalipay an Maaram

²⁰Malipayon an tawo nga nag-aataman han Kinaadman ngan nagamit hin maupay nga panhunahuna.

²¹An bisan hin-o nga magtuon hin mga paagi han Kinaadman mahibabaro liwat han iya mga sekreto.

²²Lanata an Kinaadman sugad hin parapanganop nga nagbibiling hin darakpon.

²³Hiling han iya mga bintana ngan pamati dida han iya mga porta.

²⁴Pag-ukoy nga hirani gud ha iya balay,

²⁵ngan magkakamay-ada ka maupay nga urokyan.

²⁶Pagbalay didto, nga waray pakahadlok ha sirong han iya mga sanga, ngan linandongan han kamapaso han adlaw.[31]