Read Waray Samarenyo Meaning Based Sirac 16 Bible Online

Sirac 16 - Waray Samarenyo Meaning Based bible

Sirac 16

¹Kakastigohon han Dyos an mga Magpakasasala Ayaw pag-ungara hin dako nga panimalay kon waray manla pulos an mga anak. Diri gud sadang iparayaw an mga anak nga lalake nga diri nakilala han Dyos.

²Magkadiano hin kadamo an imo mga anak, ayaw hira iparayaw kon waray hira pagkahadlok han GINOO.

³Ayaw ibutang an imo paglaom han ira kabubuwason o ayaw pagpaabot nga maghilawig an ira kinabuhi. Mauruupay pa an usa nga bata nga nagbubuhat han kaburot-on han GINOO kay han usa ka yukot nga diri nagbubuhat.[33] Mauruupay nga mamatay ka nga waray mga anak kay hin pagkamay-ada mga anak nga diri nakilala han Dyos.

⁴Mahihimo nga magtikadamo an umurokoy hin usa nga syudad tungod han kamaaram hin usa ka tawo, samtang nabubungkag in usa nga tribo tungod hin tampalasan nga mga tawo.

⁵Nakadamo na ako pakakita hin sugad nga mga butang, ngan hinbatian ko in labaw pa hini nga mga susbaranan.

⁶Makakaluob an nagdidilaab nga kasina han GINOO kontra hin gutiay nga hugpo hin mga makasasala o hin usa nga masupakon nga nasod.

⁷Waray niya pasayloa an mga higante han una nga mga panahon, nga sinmupil ha iya ngan tinmapod la han ira kalugaringon nga kusog.

⁸Dinmiri hiya han pagpalabilabi han mga tawo nga kaurosa ni Lot ngan naubos ini hira hin kamatay.

⁹Waray niya kalooyi adto nga mga nasod nga iya gin-ubos hin pagbungkag tungod han mga sala nga ira ginbuhat,

¹⁰sugad man an 600,000 nga mga tawo nga nagkaurosa didto ha kamingawan hin pagsupil ha iya.

¹¹Bisan kon may-ada usa la ka tawo nga matig-a an ulo, usa gud nga milagro kon mahigawas hiya han kastigo. Maloloy-on an GINOO, kundi danay liwat hiya mapungot. May gahom hiya hin pagpasaylo o hin pagkasina.

¹²Dako an iya pagkalooy sugad nga mabug-at man an iya pagkastigo. Ginhuhukman niya an mga tawo sumala han ira ginbuhat.

¹³Waray makakasala nga makakakalagiw nga dara an iya kinawat. Babaloson han GINOO an kamapailubon han mainampoon nga mga tawo.

¹⁴Pagbabaloson an tagsa nga tawo nga matadong;[34] makarawat an ngatanan sumala han angay ihatag ha iya.[35]

¹⁷Ayaw gud pagsiring, “Matago ako han GINOO. Hin-o ngani an aadto ha langit nga manunumdom ha akon? Uunanhon an paghisabti ha akon dida hin damo kaupay nga mga tawo? Damo kaupay an mga binuhat, ano man an akon gamit?

¹⁸Kon umabot na an GINOO, mangungurog an ngatanan; an tuna ngan an dagko nga katubigan ha ilarom han tuna, an panganoron ngan an kalangitan ha igbaw han panganod.

¹⁹Mababay-og an kabukiran ngan mangungurog an mga patukoranan han tuna ha pagtutok niya hini ngatanan.

²⁰Diri makakahunahuna ha akon an GINOO. Waray gud magdidipara han akon bubuhaton.

²¹Kon makasala ako ngan tagoon ko la an akon pag-ato, waray mahibabaro hini.[36]

²²Kon magbuhat ako hin matadong waray magsusumat han GINOO hiunong hini. Kon baga sidngon, hin-o man ngani an karuyag maghulat ha iya? Mahinay hiya hin duro hin pagtuman han iya iginsiring nga iya pagbubuhaton.”

²³Sugad hini an panhunahuna hin tawo nga gutiay la an pagsabot ngan gintutdoan hin linurong nga paagi. An Kanan Dyos Kinaadman hin Pagtuha

²⁴Anak ko, pamati ngan dungga ako; kadudugangan an imo hibaro kon imo ini pagbuhaton.

²⁵Tatagan ko ikaw hin makugi ngan tuptop nga pagtutdo.

²⁶Ha tinikangan gintuha han GINOO an iya mga binuhat,[37] ngan gintagan an ngatanan han ira kalugaringon nga dapit.

²⁷Ginpahimutang niya an ngatanan hin dayon nga kahusayan, ngan nagsugo hiya nga amo gud ini ha kadayonan. Waray usa nga bahin han mga binuhat nga gugutomon; waray bahin nga gugul-an o mahunong han iya buruhaton.

²⁸Diri an mga magkalainlain nga butang magpapaagaw-agaw hin dapit, ngan diri gud nira susupakon an iya pulong.

²⁹Han paghimoa na hini ngatanan han GINOO, sinmiplat hiya han tuna ngan ginpuno ini hin mag-upay nga mga butang.

³⁰Ginluob ini niya han ngatanan nga mga binuhat nga kinahanglan mamatay ngan bumalik hin pagkatapotapo.