Read Waray Samarenyo Meaning Based Sirac 17 Bible Online

Sirac 17 - Waray Samarenyo Meaning Based bible

Sirac 17

¹Niyan ginhimo han GINOO in mga tawo tikang han tapotapo. Ngan ginpabalik liwat hin katapotapo an kada usa ha ira.

²Gin-igoan la niya hira hin panahon hin pag-ukoy, kundi gintagan niya hira hin gahom pagdumara han ngatanan ha tuna.

³Ginhimo niya hira nga maladawon sugad ha iya ngan gintagan niya hira han iya[38] kalugaringon nga kusog.

⁴Ginbuot niya nga an ngatanan nga iba nga mga binuhat mahadlok ha ira; gintagan niya hira hin gahom hin pagdumara, han ngatanan nga mga mananap ug katamsihan.[39]

⁶Gintagan niya hira hin mga dila, mga mata, mga durunggan, mga hunahuna ngan mga konsyensya.

⁷Ginpuno niya hira hin hibaro ngan pagsabot ngan ginpakita ha ira an kalainan han maupay ngan maraot.

⁸Gintagan niya hira han iya kalugaringon nga pagsabot ha pagpakita ha ira han pakaharangdon han iya mga binuhat.[40]

¹⁰Pagdadayawon nira an iya baraan nga ngaran ngan igpapasangyaw an kagamhanan han ngatanan nga iya mga buhat.

¹¹Iginhatag niya ha ira an hibaro ngan gintagan hira hin Balaod nga burabod hin kinabuhi.

¹²Naghimo hiya ha ira hin dayon nga ginsaaran ngan iginpadayag ha ira an iya mga sugo.

¹³Hinkit-an nira an kamaanyag han iya pagkaharangdon, ngan hinbatian nira an himaya han iya tingog.

¹⁴Ginpahimatngon niya hira supak han diri pagkamatadong ngan gintutdoan an kada tawo kon uunanhon niya pagdumara han iba. An Dyos Amo an Maghurukom

¹⁵Dayuday nakita an GINOO han ginbubuhat han mga tawo; waray paagi nga makakatago ka ha iya.[41]

¹⁷Gintagan niya an tagsa nga nasod han iya kalugaringon nga punoan, kundi an Israel amo an kalugaringon nga malon han GINOO.[42]

¹⁹Dayuday ginbabantayan han GINOO an ginbubuhat han mga tawo; para ha iya sugad han kapawa han adlaw an ngatanan nga ira ginbubuhat.

²⁰Waray mga sala nira nga natatago ha iya; hinkikit-an niya an ngatanan nga ira mga sala.[43]

²²Kon nahatag kita ngadto han mga kablas, gin-iisip ini han GINOO nga birilhon sugad ka mahal hin mapulsanon nga singsing. Minahal niya an kamaloloy-on han tawo sugad han kinabuhi ngahaw.

²³Maabot an adlaw nga paghuhukman niya an mga magraot ngan kakastigohon hira. Kakarawton nira an angay para ha ira.

²⁴Kundi tutugotan han GINOO adton mga nagbabasol nga makabalik ngada ha iya. Dayuday gintatagan niya hin kadasig adton mga nawawad-an hin paglaom. Nagtawag hin Pagbasol

²⁵Dangop han GINOO ngan bayai an imo sala. Pag-ampo hin kinasingkasing nga buligan ka niya basi makag-ukoy ka hin mauruupay nga kinabuhi.

²⁶Balik na ngadto han Gihahataasi ngan bayai an imo sala. Pagdumti an ngatanan nga iya dinidirian.

²⁷Makakahimo hin pagpasalamat han GINOO adton mga buhi pa, kundi nakakagkanta ba hin pagdayaw han Gihahataasi an aadto na ha tuna han mga patay?

²⁸An tawo la nga buhi ngan maupay an panlawas an makakagkanta hin mga pagdayaw han GINOO, kundi diri na makakagpasalamat ha iya an mga minatay nga waray na dinhe ha aton.

²⁹Hin pagkadako han maloloy-on nga pagpasaylo han GINOO hadton mga nabalik ha iya!

³⁰Kundi diri ini amo an kinaiya han mga tawo;[44] waray usa ha aton nga waray kamatayon.

³¹Waray mapurupawa pa kay han adlaw kundi nagsisirom an kapawa han adlaw kon may-ada bakunawa. Hin pagkamasayon han hunahuna han tawo katahoban han maraot!

³²Makakahimo an GINOO hin pagtan-aw han ngatanan nga mga bitoon ha langit. Kundi an mga tawo, ano man? Tapotapo ngan mga agbon la hira.