Read Waray Samarenyo Meaning Based Sirac 19 Bible Online

Sirac 19 - Waray Samarenyo Meaning Based bible

Sirac 19

¹Kon buhaton mo ini, diri ka[46] magririko; kon diri ka manginano han talagudti nga mga butang, maghihikaraot ka hin hinayhinay.

²An bino ug an kababayen-an amo an nagtutukso han may buot nga kalalaken-an hin pagbuhat damo nga mga patuyaw. An lalake nga napakadto hin mga kababayen-an nga maraot an bantog, diri na nanginginano han iya kalugaringon,

³ngan tungod hini, ginbabaydan niya han iya kinabuhi. An iya nadudunot nga lawas kakaonon hin mga ulod.

⁴Linurong la an inapiki nga pagsarig ha mga tawo. Kon nakasala ka, ikaw la ngahaw an maghihimakuri.

⁵Kon nakakalipay ha imo an pagkamaraot, paghuhukman ka. Likayi an Paglibak

⁶Likayi an paglibak nga waray hangkag, ngan malilikyan mo in damo nga kasamokan.

⁷Ayaw gud liwata hin pagsumat an imo hinbatian, ngan diri ka gud magbabasol.

⁸Ayaw ini igsumat ngadto han imo kasangkayan o mga kaaway labot la kon makakasala ka kon hilomon mo la ini ha imo kalugaringon.

⁹Titigamnan ini han bisan hin-o nga makabati ha imo, ngan maiha o madali, pagdudumtan ka tungod hini.

¹⁰Hinbatian ba nimo in sumat? Himoa nga matubtob la ini ha imo. Ayaw kahadlok, diri ini makakadaot ha imo.

¹¹An lurong nga tawo nga magsari hin pagtipig hin mga sekreto, mag-aantos sugad hin babaye nga tipag-aranak.

¹²Ikinapagbati niya hin mga sekreto, sugad ini hin pana nga natusok ha iya paa.

¹³Pakianhi anay an imo sangkay hiunong hin imo hinbatian nga sayop nga iya nabuhat. Bangin diri ini matuod. Kon matuod man lugaring ini, basi diri na niya pagliwaton,

¹⁴pakianhi anay an imo amyaw mahitungod han imo hinbatian nga iya ginyakan nga diri angay. Bangin waray hiya magyakan hini. Kon ginbuhat man niya ini, basi diri na niya pagyaknon liwat.

¹⁵Kon hinbatian mo in maraot hiunong hin imo sangkay, pakianhi hiya mahitungod hini. Bangin buwa la ini. Ayaw pagtuod han ngatanan nga imo hinbatian.

¹⁶Usahay nahililisa an ginyakan hin usa ka tawo ngan diri niya tinuyo ini. Hin-o ba ha aton an waray makasala hin sugad hini nga paagi?

¹⁷Kon hibatian mo in pulong nga makapasina ha imo han imo kahigrani, pakianhi anay hiya san-o mo hiya pagtarhogon. Itubyan ini nga butang ngadto han Balaod han Gihahataasi.[47] Kilalaha an Matuod nga Kinaadman

²⁰Kahadloki an GINOO ngan tumana an iya Balaod; amo ini an kahingpitan han Kinaadman.[48]

²²Bangin hibaroan mo an ngatanan nga angay hibaroan hiunong han pagkamaraot, kundi diri ini makakahimo ha imo nga maaram. Diri subay ha katadongan an pagsunod han sagdon han mga makasasala.

²³Mahihimo nga an pagkalisto gamiton para hin maraot nga mga panuyo, kundi may mga tawo nga linurong an panggawi tungod kay diri hira maaram.

²⁴Mauruupay pa in tawo nga may pagkahadlok han Dyos bisan kon diri hiya maaram, kay han gililistohi han mga makasasala.

²⁵Mahihimo nga magin listo in usa ka tawo kundi malimbong la gihapon o makakuha han iya kinaruruyag pinaagi hin pagkamatinahuron.

²⁶May magraot nga mga tawo nga nagpapakita hin masulob-on ug mainampoon nga nawong, kundi nagtatalinguha la hin paglimbong ha imo.

²⁷Ilinilingiw nira an ira mga nawong ngan napasangil nga diri nabati ha imo, kundi masingabot hira ha imo ha takna nga diri mo ginpapaabot.

²⁸Kon diri hira makakagbuhat hin sala yana, tungod hin kakulang hin kusog, bubuhaton nira ini ha syahan nga higayon nga ihatag ha ira.

²⁹Makikilala mo in usa nga tawo pinaagi han iya pamahongpahong. Mahibabaro ka kon may maupay niya nga pagsabot ha syahan nimo nga pagkita ha iya.

³⁰Makilala ka ha iya pinaagi han iya pagbado han iya pagtawa ngan han iya paglakat.