Read Waray Samarenyo Meaning Based Sirac 2 Bible Online

Sirac 2 - Waray Samarenyo Meaning Based bible

Sirac 2

¹An Pagkamatinumanon sa Dyos Anak, kon mag-aalagad ka han GINOO, pag-andam para hin mga panahon nga pagsasarihan ka.

²Kinahanglan nga kinasingkasing ug tinuod an imo pagbuhat. Ayaw kalisang kon umabot an kakurian.

³Pabilin dida han GINOO; ayaw hiya bayai ngan maghihingaupay ka ha kataposan.

⁴Karawata an bisan ano nga mahinanabo ha imo. Pagmapailubon bisan kon an imo kinabuhi nagdadara hin damo nga mga pag-antos.

⁵Ginpupurog han kalayo an bulawan, ngan ginsasarihan an kinaiya han tawo dida han hudno han pag-antos.

⁶Sarig han GINOO ngan bubuligan ka niya. Paglakat hin matadong ngan paglaom ha iya.

⁷Kamo ngatanan nga may pagkahadlok han GINOO, paghulat kamo nga ipakita niya ha iyo an iya pagkalooy. Ayaw kamo pagbaya ha iya basi diri kamo mapukan.

⁸Sarig ha iyo kamo ngatanan nga may pagkahadlok han GINOO, ngan babalosan gud kamo.

⁹Kamo ngatanan nga may pagkahadlok han GINOO, laomi niyo an iya mga bendisyon han kalooy ngan dayon nga kalipay.

¹⁰Pamalandonga an linmabay nga mga katulinan ngan painoinoha ini: ginpakaalohan na ba han GINOO an tawo nga nagsarig ha iya? Ginbayaan na ba han GINOO an tawo nga nagpadayon hin pagtahod ha iya? Ginpasibay-an na ba han GINOO an tawo nga nag-ampo ha iya?

¹¹Maloloy-on ngan napaid an GINOO; nagpapasaylo hiya han aton mga sala ngan tinatalwas kita niya ha takna han kakurian.

¹²Kundi kairo hadton mga magluya an kasingkasing—an mga makasasala nga mga malabyaw ha ira kinabuhi.

¹³Kairo hadton mga nawad-an han ira kaisog; waray hira pagtoo, sanglit waray mananalipod ha ira.

¹⁴Kairo hadton mga nawad-an han ira paglaom. Ano an ira bubuhaton kon kumanhi na an GINOO hin paghukom ha ira?

¹⁵Adton may pagkahadlok han GINOO diri nasupak han iya mga sugo; adton mga nahigugma ha iya mabubuhi sumala han iya karuyag.

¹⁶Adton mga may pagkahadlok ngan paghigugma ha iya magtitinguha hin pagpahalipay ha iya ngan paghalad han ira kinabuhi para han Balaod.

¹⁷Dayuday andam hin pag-alagad ha iya adton may pagkahadlok han GINOO. Nagpapaubos hira ha iya atubangan ngan nasiring,

¹⁸“Itinutubyan namon an amon kinabuhi ha mga kamot han GINOO ngan diri ha mga tawo, kay an iya pagkalooy sugad kadako han iya pagkaharangdon.”