Read Waray Samarenyo Meaning Based Sirac 21 Bible Online

Sirac 21 - Waray Samarenyo Meaning Based bible

Sirac 21

¹An Sala Anak ko, nakasala ka ba? Ayaw na ini pagliwata ngan pangaro hin pasaylo tungod han imo nabuhat.

²Paglikyi an sala sugad hin pagpahirayo mo han halas. Kon dumuok ka, tutukbon ka hini sugad hin liyon ngan mapatay ka.

³An tagsa nga buhat nga nasupak han balaod nagbibilin hin samad nga diri nauupay, sugad hin gintigbas hin espada nga paluyo an tarom.

⁴Kon waray batasan ngan mapahitas-on in usa ka tawo, kawawad-an hiya han ngatanan nga iya hiagi.

⁵Kon nag-aampo an mga kablas, pinamamatian hira han Dyos ngan binabaton hin kadagmitan an ira mga pag-ampo.

⁶Nakakasala ka kon diri ka pumasaway; ngan magbabasol ka hin kinasingkasing kon may-ada mo pagkahadlok han GINOO.

⁷Bangin bantogan in usa ka tawo nga maupay nga namumulong, kundi kon sayop hiya, mahisasabtan ini dayon hin maaram nga tawo.

⁸An tawo nga nagbabalay pinaagi hin inutang nga kwarta sugad la hin nagtitirok hin mga bato para han iya kalugaringon nga lubnganan.[50]

⁹Sugad hin tinambak nga sungo in hugpo hin mga tawo nga waray pagtahod han Balaod; magkakasusunog hira.

¹⁰Mahamis ngan sinemento an dalan nga ginlalaktan han mga magpakasasala, kundi tipakadto ini ha tuna han mga patay. Kinaadman ngan Kalurongan

¹¹An bisan hin-o nga karuyag magtuman han Balaod kinahanglan mahibaro han kahulogan han Balaod. Magkakamay-ada ka kinaadman kon may-ada mo matuod nga pagkahadlok han GINOO.

¹²Kinahanglan maaram ka basi mahibaro ka han mga butang; kundi may-ada tawo nga nagpapakamaaram, nga nakakapahangit la han mga tawo.

¹³An hibaro han makinaadmananon nga tawo sugad hin salog nga diri nahubas, sugad hin masulog nga sapa hin maupay nga mga sagdon.

¹⁴Ha luyo nga bahin, may-ada an lurong hunahuna nga sugad hin tibod nga may-ada buho; nawawara dayon an bisan ano nga iya hinbabaroan.

¹⁵Kon hinbabatian hin maaram nga tawo in usa nga maupay nga pagtutdo, nakakapukaw ini han iya pagsabot ngan nakakadugang ini hin iba nga bag-o nga mga hunahuna. Kundi kon hinbabatian ini hin usa nga tapang, diri ini hiya maruruyag, ngan iya gintatalinguha nga iya hingangalimtan ini dayon.

¹⁶An pamati han pulong hin usa nga lurong sugad hin paglakat nga may mabug-at ka nga binaba, kundi usa nga kalipay an pamati hin tawo nga maaram.

¹⁷An katig-oban maruruyag pamati hin tawo nga maaram ngan kakarawaton gud hin tinuod an iya mga pulong.

¹⁸Para hin tawo nga tapang, waray la gamit an kinaadman sugad la hin balay nga naruba. Waray gud ngani niya paghunahunaa mahitungod han mga butang nga iya hinbabaroan.

¹⁹Para hin usa nga lurong, an pag-aram sugad hin mga posas,

²⁰kundi para hin maaram sugad ini hin mga pulseras nga bulawan. Diri hinsasabotan an paghiyom han tawo nga maaram, kundi an lurong nag-aaningal kon natawa hiya.

²²An tawo nga lurong makadto han porta hin balay ngan mahiling ngan masakob dayon, kundi nahulat la ha gawas an tawo nga maupay an batasan ngan may-ada pagtahod.

²⁴Maraot nga batasan an paghiling ha mga porta, ngan maawod hin pagbuhat hini an tawo nga maupay an panggawi.

²⁵An mga napakamaaram nagyayakan hiunong hin mga butang nga waray nira labot,[51] kundi gintitirutimbang han mga mag-aram an ira mga pulong.

²⁶Ginyayakan dayon han mga lurong an bisan ano nga nasakob ha ira hunahuna; namumurubuot anay an mga mag-aram han ira iginhihimangraw.

²⁷Kon an maraot nga tawo nagtutunglo han iya kaaway,[52] nagtutunglo la hiya ngahaw han iya kalugaringon.

²⁸Ginhuhugawan hin usa nga paralibak an iya kalugaringon nga pagkatawo ngan nakontra ha iya an ngatanan niya nga kahigrani.