Read Waray Samarenyo Meaning Based Sirac 25 Bible Online

Sirac 25 - Waray Samarenyo Meaning Based bible

Sirac 25

¹An mga Tawo nga Takus hin Pagdayawa May-ada tutulo nga butang nga nakakahatag ha akon hin talagsaon nga kalipay—magtahom nga mga butang para han GINOO ug para man liwat han tawo:[61] an magbugto nga maupay an pagkasabot, an mga amyaw nga magsarangkay, ug an mag-asawa nga malipayon ha ira pagkausa.

²May-ada tutulo ka lain nga mga tawo nga diri ako nakakaantos, kanay mga panggawi nakakahatag hin kasina ha akon: an mga kablas nga tawo nga napakahin-o, an mga riko nga tawo kundi buwaon, ngan an mga lurong nga kalagsan nga nanlilibog.

³Labot kon mag-aram ka tubtob han imo mahimo samtang nga batan-on ka pa, diri ka gud magkakamay-ada kinaadman kon malagas ka na.

⁴An tuhay nga paghukom, an maupay nga pagsagdon, ug an ubanon mahusay pagkit-on kon nagkakaburunyog hira.

⁵An kinaadman, an pagsabot, ug an tuhay nga paghukom angay ini han mga kalagsan ug an mga tinahod nga tawo.

⁶An mga tigurang nga tawo nakakasul-ot han korona han naiha na nga gin-agian nira ha kinabuhi, ngan waray nira sadang iparayaw kundi an ira pagkahadlok han GINOO.

⁷Susumatan ta kamo hiunong hin napulo nga mga tawo nga nakahigayon ako hin pagkilala ha ira labi na hiunong han ikanapulo nga tawo: an tawo nga nalilipay han iya mga anak, an tawo nga nakaabot hin pagkita han kapukan han iya mga kaaway,

⁸an tawo nga may-ada masinaboton nga asawa, an mag-asawa nga maupay an pagkatampo,[62] an tawo nga diri gud nagyayakan hin pakasala, an tawo nga diri nag-alagad hin tawo nga ubos ha iya,

⁹an tawo nga may-ada maunongon nga sangkay,[63] an tawo nga diri masumo hin pamati ha iya,

¹⁰ug adton tinuod nga dako nga pagkatawo: an tawo nga may-ada kinaadman. Kundi an gidadakoi amo an tawo nga may-ada pagkahadlok han GINOO.

¹¹Waray makakatanding hin sugad nga tawo tungod kay an pagkahadlok han GINOO amo an labi ka importante nga butang dinhe ha kalibutan.[64] Mga Kababayen-an

¹³Waray samad nga sugad hin ka mahapdos kay han nasamad nga gugma. Waray kasamokan nga sugad hin ka mabug-at kay han kasamokan nga tikang han kababayen-an.

¹⁴Waray mga pag-antos nga labi hin ka mapait kay han mga pag-antos nga tikang hin mga tawo nga may-ada pagdumot ha imo. Waray pagbulos nga labi hin ka maraot kay han pagbulos han imo kaaway.

¹⁵Waray hilo nga labi hin ka makamaratay kay han hilo hin halas, ngan waray kasina nga labi hin ka nabug-on ha dughan kay han kasina hin usa nga babaye.[65]

¹⁶Gabay ako makitampo dida ha amo ngahaw nga balay hin liyon kon hin dragon, diri la ako hin usa nga maraot nga asawa.

¹⁷Kon in usa nga asawa maraot an buot, nabalhin an iya pamayhon tubtob nga baga na la hiya hin maisog nga oso pagkit-on.

¹⁸An iya bana mapakadto han ira amyaw hin pagsaro ngan diri gud hiya nakakapugong han iya mga pag-uba han iya asawa.

¹⁹Kon itanding an mga kasamokan nga tikang hin babaye, an bisan ano nga samok gutiay la pagkit-on. In sugad nga mga kababayen-an nahuhulog hin pakasala.

²⁰In mahilumon nga bana nga iginkakatampo hin maaringasa nga asawa mahitatanding hiya hin usa nga lagas nga nagkukuri hin pagsagka hin mahanglas nga tayod.

²¹Ayaw kalisang tungod han kamahusay han babaye, ngan ayaw karuyag hin babaye tungod kay manggaranon hiya.[66]

²²Kon an babaye amo an nagbubuhi han lalake, waray ruhaduha maabot man ta an kasina, an pagparayaw, pagpakaalo.

²³An maraot nga asawa amo an nakakapasubo, nakakapaguol han iya bana ngan ha kataposan amo an nakakasakit han iya kasingkasing. Ipakita ha akon in awdanon nga lalake nga waray buot nga kinaptan ngan ipapakita ko in asawa nga diri nakakalipay han iya bana.

²⁴Babaye an tinikangan han sala ngan kinahanglan mamatay kita tungod ha iya.

²⁵Ayaw pasagdi in usa nga maraot nga babaye sugad nga diri niyo pinababay-an nga mag-awas an tubig tikang han tanke.

²⁶Kon diri hiya magtuman han imo ginsiring ha iya, bulagi hiya.