Read Waray Samarenyo Meaning Based Sirac 26 Bible Online

Sirac 26 - Waray Samarenyo Meaning Based bible

Sirac 26

¹Palaran an lalake kon bana hiya hin maupay nga asawa; doble an kahilawig han iya kinabuhi tungod ha iya.

²An buotan nga asawa usa nga kalipay han iya bana ngan malinawon an iya bug-os nga kinabuhi.

³An maupay nga asawa usa han mga mahal nga kaupayan nga ihinahatag ngadto hadton nahadlok han GINOO.

⁴Magmariko ini nga mga tawo, madiri, malipayon hira ngan mahiyomhiyom.

⁵May-ada upat nga butang nga nakakapahadlok ha akon: an maraot nga libak nga ginpapasarang ha bungto, an pagtirok hin mga mag-isog nga mga tawo, an diri matuod nga mga sumbong—ini hira labi pa hin kamaraot kay han kamatayon.

⁶Kundi an babaye nga maabugho tungod hin lain nga babaye nakahatag hin kasakit ha kasingkasing ngan kabidoan; waray tinahod han iya dila.

⁷An maraot nga asawa sugad hiya hin yugo nga diri nasukol ha liog. Makuri an pugong ha iya sugad hin nakapot ka hin bungad.

⁸Makaoorit pagkit-on an hubog nga babaye. Waray na niya kaawod ngan an iba nakakasala tungod ha iya.

⁹Hinsasabotan in babaye nga malingo pinaagi han iya malaw-ay ngan nakakalukmay nga mga paniplat han iya mga mata.

¹⁰Kon karuyag han imo anak nga babaye nga pasagdan la hiya, bantayi hiya hin maupay. Kon diri ka bantayan hin maupay, masingabot hiya kon may-ada higayon nga ihatag ha iya.

¹¹Kon magparabuot hiya, pag-ikmat ngan ayaw hipausa kon makabido hiya ha imo.

¹²Mabirangkat hiya bisan diin para han lalake nga naruruyag ha iya sugad nga an inuuhaw nga magbaraktas mainom hin bisan ano nga tubig nga iya hiagian.

¹³An buotan nga asawa amo an kalipay han iya bana; an iya mga binuhatan makakapakusog han iya bana.[67]

¹⁴An babaye nga diri uraura hin kamayakan usa nga upa tikang han GINOO. Ini nga pakahimo hin pagpugong sadang pagdayawon ngan diri ini matutukib hin mga pulong.

¹⁵An maligdong nga asawa may-ada waray paglubad nga kamatahom; usa ini nga hiyas nga an iya kamahal diri masusukol.

¹⁶An kamaanyag han maupay nga asawa amo an iya mahusay nga pag-ayad han iya panimalay sugad hin naudtohan nga pagsirak han adlaw dida ha panganuron han GINOO.

¹⁷An iya matahom nga bayhon ug an iya mahusay nga katindog[68] maanyag kaupay sugad han kapawa tikang han mga baraan nga lampara didto ha Templo, ug

¹⁸an iya maupay pagkit-on nga mga bitiis ngan magkusog nga mga tiil[69] sugad hin bulawan nga harigi nga gintindog ha tumbanan nga salapi.[70] Mga Makabibido nga mga Pagtigaman

²⁸May-ada duha nga butang nga nakakabido ha akon ug an ikatulo nakakapasina ha akon: usa nga sundalo nga naghingalooy, mga mag-aram nga tawo nga diri tinatahod ug in usa nga matadong nga tawo nga nagbuhat hin maraot. Pagsisirotan han GINOO in sugad hini nga mga tawo.

²⁹An usa nga magtirigayon diri gud makakalikay hin pagbuhat hin maraot; an tagsa nga parabaligya makakasala man ta.