Read Waray Samarenyo Meaning Based Sirac 27 Bible Online

Sirac 27 - Waray Samarenyo Meaning Based bible

Sirac 27

¹Damo in mga tawo nga nakasala tungod hin pamiling hin ganansya. Kon karuyag ka nga magriko, kinahanglan nga tabunan mo an imo mga mata.

²Makuri hin paggabot hin igintusok ha butnga hin duha nga bato hin balay ngan sugad gud kamakuri an pagkuha han kamalimbong dida ha pagpalit ngan pagbaligya.

³Labot kon hugot an imo hunahuna dida hin kahadlok han GINOO, an imo balay magugun-ob ngan madadat-ogan ka. An Aton Pagyakan Nagpapakita han Matuod nga mga Pagbati

⁴Kinikita an mga sayop han tawo dida han iya pagyakan. Sugad ini hin pagsara diin nahilalain an hugaw.

⁵An imo panhunahuna magpapakita han imo kinaiya sugad nga dida han hudno hikikit-an an karat-an han mga daba nga ginbabangga.

⁶Hisasabotan kon maupay ba an pagtimangno han kahoy pinaagi han iya mga bunga ngan makakasabot ka han pagbati han tawo pinaagi han iya pagpahimutang hini nga iya pagbati.

⁷Ayaw gud pagdayaw bisan kan kanay kon diri ka anay makabati han iya pagyakan; amo ini an tinuod nga pagsari ha iya. An Diri Malimbong nga Tawo

⁸Kon magtalinguha ka hin diri kamalimbong, makakahimo ka ngan makakaupay ini han imo kinaiya sugad nga an mahusay nga bado nakakaupay han pagkita ha imo han mga tawo.

⁹An mga tamsi nakikig-usa han iya igkasitamsi ngan adton nagtatalinguha hin diri paglimbong maaara hin diri paglimbong.

¹⁰Naghuhulat an sala hadton nangingita hin higayon hin pakasala, sugad nga an liyon naghuhulat han iya kakaonon. An Binuang nga Karukayakan

¹¹Kon magyakan in tawo nga nakilala han Dyos, suloran iton iya mga pulong; kundi an buang nga tawo magyayakan ngan natipa han iya hunahuna.

¹²Kon mahitampo ka hin mga lurong nga tawo, pamiling hin pasangil hin paglakat, kundi kon tampo ka hin mga tawo nga may-ada buot, awil hin pakig-usa ha ira.

¹³An mga susumaton hin mga lurong nga tawo maraot ha talinga pamation ngan ira hinihimo nga intremis an ira mangil-ad nga mga sala.

¹⁴Kon ini nga mga tawo magpakaraot, mamamarihayaw an imo buhok ngan kon magpapalarolantugi hira, an maupay buhaton amo an pagsarop han imo mga talinga.

¹⁵Mabug-on ha dughan an pamati han ira pagpinakaraotay ngan ini nga maraot nga pulong danay pinapadisan hin kusog. An Pagbuyagyag hin mga Tinago

¹⁶Kon imo igbuyagyag in mga tinago nga iginsumat ha imo, mawawad-an hin pagtapod ha imo an iba nga mga tawo ngan mawawaray ka na suok nga sangkay.

¹⁷Tahura an imo kasangkayan ngan tapod ha ira. Kon paglingoon mo an pagtapod han imo sangkay ha imo, gabay ka lugod mangalimot nga may-ada ka sangkay.

¹⁸Ginpatay nimo an iyo kamagsangkay sugad nga kinmuha ka hin sundang ngan imo patayon an imo kaaway.

¹⁹Waray na an imo sangkay. Diri ka na makakabalik ha iya sugad nga diri ka na makakapabalik hin tamsi ngada ha imo kamot kon imo ini buhian.

²⁰Ayaw na kalisang hin pamailing ha iya. Orhe ka na kaupay. Nawara na hiya sugad hin bugsok nga nakalusot han bitik ha iya.

²¹Mahihimo nga mabutok an mga samad ngan mahihimo nga pasayloon an mga pagpakaalo, kundi kon maglingo ka han pagtapod ha imo han imo sangkay, waray nimo sadang paglaoman. An Kamalabyaw

²²Kon may-ada magkiniro ha imo, may-ada niya maraot nga hunahuna ngan waray makakasaway ha iya.

²³Kon upod hiya ha imo, maupay iton iya mga pulong. May pag-uyon niya han imo mga pulong. Kundi ha imo talikoran, lain an iya bubuhaton. Kakarawaton niya an imo pulong kundi gagamiton niya hin pagsupak ha imo.

²⁴Waray butang dinhe ha kalibutan nga dinidirian ko kay hin usa ka tawo nga sugad hini—ug an GINOO madiri liwat ha iya.

²⁵Tadonga an paglabay hin bato ha igbaw ngan maumban ini ha imo ulo. Kusga an pagsuntok ngan masasamad ka.

²⁶An tawo nga nagbubutang hin bitik amo la ngahaw hiya an hisasakban.

²⁷An tawo nga magpadaot han iba, madadaot tungod han ira maraot nga buhat ngan diri ngani mahibabaro kon kay ano hin kasugad hini.

²⁸An malabyaw nga tawo nagpapakaalo han iba ngan nagbibiaybiay ha ira,[71] kundi may-ada tawo nga sugad hin liyon, naghihinulat hin higayon hin pagbulos ha ira.

²⁹Adton malipayon hin pagkita han kapukan han mga tawo nga natoo han Dyos mahuhulog ngadto hin bitik ngan an masakit nga kamatayon amo an magpapatay ha iya.

³⁰An kasina ug an kamapaso ha ulo makalilisang nga mga butang ngan aada ini nga duha han makasasala.