Read Waray Samarenyo Meaning Based Sirac 3 Bible Online

Sirac 3 - Waray Samarenyo Meaning Based bible

Sirac 3

¹An mga Katungdanan Para han mga Kag-anak Mga anak, pamati kamo ha akon, kay ako an iyo amay. Buhata niyo an akon igsusumat ha iyo ngan mahigagawas kamo han kataragman,

²kay an mga kag-anak gintagan han GINOO hin pagburot-an han ira mga anak, ngan tinagan an mga anak han katungdanan hin pagsugot han ira mga nanay.

³Kon magtahod kamo han iyo amay, magkakabayad na kamo han iyo mga sala,

⁴ngan kon pasidunggan niyo an iyo nanay, magtitirok kamo hin dako nga manggad.

⁵Kon magtahod kamo han iyo amay, ha san-o nga adlaw paglilipayon liwat kamo han iyo mga anak; pamamatian han GINOO an iyo mga pag-ampo.

⁶Kon magsugot kamo han GINOO pinaagi hin pagpasidungog han iyo amay, ngan pagpahalipay han iyo nanay, mag-uokoy kamo hin hilawig nga kinabuhi.

⁷Sugta an iyo mga kag-anak nga sugad hin oripon kamo nira.

⁸Pasidunggi an iyo amay ha iyo buhat ngan ha pulong, basi karawton niyo an iya bendisyon.

⁹Tinatagan han mga kag-anak hin kusog an mga panimalay han ira mga anak kon ira ginbebendisyonan an ira mga anak, kundi kon ginpapanhimaraot nira an ira mga anak, nabubungkag an mga patukoranan han panimalay.

¹⁰Ayaw gud pagbiling hin dungog para han iyo kalugaringon pinaagi hin pagpakaalohi han iyo amay; kay diri ito iyo dungog kon pakaalohan an iyo tatay.

¹¹An iyo dungog natikang han pagtahod nga iyo ipinapakita ngadto han iyo amay. Kon an mga anak diri magpasidungog han ira mga nanay, ira ini kalugaringon nga kaarawdan.

¹²Anak, mangnoi an imo amay kon lagas na hiya; ayaw hiya tagi hin kaguol samtang buhi pa hiya.

¹³Ipakita an imo pagpaid ha iya bisan kon maluya na an iya hunahuna; ayaw hiya pagtamaya tungod la nga makusog ngan maupay an imo panlawas.

¹⁴Diri an GINOO mahingangalimot han kalooy nga imo iginpakita han imo amay; makakabulig ini hin pagbayad han imo mga sala.

¹⁵Kon aada ka ha kakurian, hinunumdoman han GINOO an imo kamaloloy-on han imo amay ngan bubuligan ka; matutunaw an imo mga sala sugad hin yelo kon sinisirakan.

¹⁶An bisan hin-o nga nabaya han iya mga kag-anak o matinikangan hiya han ira kasina, sugad hiya hin nagtutunglo han GINOO; ngan hiya liwat daan na gintunglo han GINOO. An Pagpaubos

¹⁷Anak, pagpaubos ha ngatanan nga imo ginbubuhat, ngan maruruyag an mga tawo hini nga imo buhat labaw hin mga regalo.[5]

¹⁸Kon ikaw magtikadako ha imo pagkatawo, labi na nga magpaubos ka; ngan malilipay ha imo an GINOO.[6]

²⁰Gamhanan an GINOO ngan ginpapasidunggan hiya hadton mga mapainubsanon.

²¹Ayaw pagtinguhaa hin pagsantop han mga butang nga makuri hisabotan nimo, o pag-usisa han mga butang nga lapos na han imo gahom hin paghibaro.

²²Pamalandonga an Balaod nga iginhatag ha imo. Diri kinahanglan nga hibaroan mo in mga butang nga waray ipadayag ha imo han GINOO,

²³sanglit ayaw pagkabaraka tungod hini. Ha katapostaposan, an iginpakita ha imo labaw pa han kanan tawo pagsabot.

²⁴Damo nga mga tawo an nahilisa han ira kalugaringon nga mga panhunahuna; nakabuta han ira mga paghukom an ira sayop nga mga panhunahuna.[7]

²⁶Magbabasol ha kataposan an tawo nga matig-a an ulo. An mag-uokoy ha kataragman, ini ngahaw an mapatay ha imo.

²⁷Pabubug-atan hin mga kakurian an tawo nga matig-a an ulo. Nagdidinugang la hin pakasala an makasasala.

²⁸Waray tambal han mga kakurian nga aada han mga mapahitas-on, ginmamot na gud hin maupay dida ha ira an pagkamaraot.

²⁹Mahibabaro an mag-aram nga mga tawo tikang han mga darahonon ngan mga pananglitan. Namamati hira hin maupay kay karuyag nira hin pag-aram. An Paghatag Ngadto han mga Pobre

³⁰An paglimos makakagbayad hin mga sala sugad nga an tubig nakakaparong hin naglalarab nga kalayo.

³¹An nagtutuman hin mga buhat ha kalooy ngadto ha iba naghuhunahuna han iya kabubwason, kay makakaagi hiya hin tambulig kon hiya na man an magkinahanglan.