Read Waray Samarenyo Meaning Based Sirac 32 Bible Online

Sirac 32 - Waray Samarenyo Meaning Based bible

Sirac 32

¹Kon ikaw an napili hin pagpangulo hin usa nga sasaro, ayaw pagparayaw. Hunahunaa la nga sugad ka la han iba nga mga tawo. Panimangnoa an mga dinapit san-o ka lumingkod ha pangaraonan.

²Kahuman nimo pagtuman han imo buruhaton, amo na an imo paglingkod ngan pagliaw-libang upod han iba. Tatahuron ka nira tungod kay maupay an imo pagtuman han imo buruhaton.

³Kon magurang ka han kadam-an nga mga gindapit, makahimo ka hin pagyakan. Imo ini katungod. Kundi kinahanglan maaram ka han imo igyayakan ngan ayaw paundanga an tokar.

⁴Kon may-ada gin-andam para hin pagliaw-libang, ayaw ipadayon an hirohimangraw; diri ini an angay nga panahon hin pagpakita han imo kamaaram.

⁵An tokar ug kanta dida hin usa nga sasaro diin may-ada tagay nga irinmon sugad ini hin rubi nga itinaod dida hin bulawan.

⁶An maupay nga tokar ngan kanta ug maupay nga irinmon—usa ini nga bato nga esmeralda nga itinaod dida hin bulawan.

⁷Kon batan-on ka, ayaw pagyakan kon diri ka sidngon, kundi ayaw paglapos hin makaduha ngan dida la kon may-ada mauna hin pagyakan ha imo.

⁸Igyakan dayon an imo karuyag sidngon ngan ayaw damoa in mga pulong. Ipakita nga diri ka surumatan la kundi hilom la.

⁹Ayaw pagsugara ngan itupong ha imo an mga importante nga tawo ngan ayaw itugot nga ikaw an tinikangan hin kamaaringasa pinaagi hin damo nga mga pakiana ha ira.[83]

¹⁰An maupay nga dungog hin maligdong nga tawo nasunod ha iya sugad nga an kikidlat nasunod han dalugdog.

¹¹Pagsarit hin pag-uli ha igo nga panahon ngan ayaw gud pagpaorhi hin paglakat. Ayaw paglangan dida ha may porta; uli dayon ngadto ha imo balay.

¹²Didto makakahimo ka hin pagliaw-libang sugad han imo karuyag kundi ayaw gud hin paghinambog.

¹³Ngan ayaw hingalimot hin pagpasalamat han imo Magburuhat nga tinugotan ka hin pagpahimulos hin damo nga mga mag-upay nga butang. An Paghubad han Balaod

¹⁴Kon tinuod nga nahadlok ka han GINOO, kakarawaton mo an iya mga pagsaway. Bebendisyonan niya adton magmata hin sayo ha kaagahon hin pag-ampo.

¹⁵Pagton-i an iya Balaod ngan igsaulo hin maupay. Labot kon diri kinasingkasing an imo pagtoon, kawang la an imo pag-aram.

¹⁶Kon may pagkahadlok ka han GINOO, makakasabot kon ano an matadong ngan dadayawon ka tungod kay waray nimo pinalabi.

¹⁷Para han makasasala, waray gamit an pagsaway ngan paghuhubaron nira an Balaod sugad han ira karuyag.

¹⁸An may-ada buot nga mga tawo maghuhunahuna han tagsa nga ipinahayag nga pulong kundi an mapahitas-on[84] nga tawo diri matugot nga may-ada magbalabag ha ira.

¹⁹Ayaw pagbuhat hin bisan ano kon diri ka anay manhunahuna hin maupay ngan kon nakabuhat ka na, ayaw na paglingi ngan pagbasol.

²⁰Ayaw paghimo hin buhat nga puno hin kataragman ngan ayaw pagbuhat hin amo ngahaw nga sayop makaduha.[85]

²¹Ayaw tapod ha imo kalugaringon bisan kon baga masayunay an paagi.

²²Dayuday pagbantay kon tikain ka.[86]

²³Kon ano an imo buhaton, pag-ikmat;[87] amo ini an pagtuman han mga sugo han GINOO.

²⁴An pagtoo han Balaod amo an pagtuman han mga sugo han GINOO. Kon tumapod ka han GINOO, diri ka madadaog.