Read Waray Samarenyo Meaning Based Sirac 34 Bible Online

Sirac 34 - Waray Samarenyo Meaning Based bible

Sirac 34

¹An mga Inop Waray Hinungdan An mga tawo nga waray maupay nga buot nalilipat hin mga waray hinungdan nga paglaum, sanglit nadadara hira han ira mga inop.

²An tawo nga natoo hin mga inop masusugad hira hin usa nga tawo nga nagdadakop han iya lambong ug nagbubukod han hangin.

³An imo makita dida hin inop diri tinuod sugad nga diri tinuod an nakikita dida han espeho.

⁴An diri matuod diri makakahimo hin butang nga tinuod sugad nga an mahugaw diri makakahimo hin butang nga malinis.

⁵Mga patuyaw la ito nga mga inop, mga patigo, ug mga tirimad-on. Hinkikit-an mo ha ira an karuyag mo la hikit-an.[89]

⁶Labot kon pinadara tikang han Gihahataasi an inop, ayaw gud tuod.

⁷Damo nga mga tawo an naowat hin mga inop; ira ibinutang an ira pagtoo dida hin inop ngan ha kataposan nawaray hira paglaom.

⁸Hingpit an Balaod bisan kon waray hini nga mga buwa. An Kinaadman sumala han ginsiring han mga magtadong hingpit gihapon bisan kon waray hini nga buwa. An Paglakaton

⁹An usa ka tawo nga makadamo na paglakaton[90] ngan may-ada damo na nga gin-agian ha iya kinabuhi maaram hin damo nga mga butang ngan may-ada hinungdan an iya mga pulong.

¹⁰Diri damo an imo hibabaroan kon diri damo an imo gin-agian ha imo kinabuhi kundi an paglakaton makakapaabtik ha imo.

¹¹Dida ha akon mga paglakaton, hinkit-an ko in damo nga mga butang ngan hinbaroan ko in damo pa nga akon masisiring ha iyo.

¹²Nakadamo ako umatubang hin kamatayon kundi dayuday nahigawas ako pinaagi ha pagsarig ko han akon hadto gin-agian ha kinabuhi. An Kahadlok han GINOO

¹³Adton mahadlok han GINOO mabubuhi tungod kay ira ibinutang an pagtapod ha iya nga makakatalwas ha ira.

¹⁴Kahadloki an GINOO ngan waray nimo sadang kahadlokan. Kon tumapod ka ha iya, diri ka magtatalaw.

¹⁵Palaran adton mga tawo nga nahadlok han GINOO kay maaram hira kon hain hira pagbibiling hin tambulig.

¹⁶Nagbabantay an GINOO hadton nahigugma ha iya; hiya an makusog nga panalipod ug madig-on nga kasasarigan. Pinapasirong niya hira han kamapaso; ginlalandongan hira niya han sirak han naudtohan nga adlaw ngan ginhahawiran hira niya nga diri hira matumba ngan mahulog.

¹⁷Ginlilipay hira ngan tinatagan hin kapawa an ira mga mata. Ihinahatag ha ira in kinabuhi ug maupay nga panlawas. An Paghalad hin mga Sakripisyo

¹⁸Kon maghalad ka hin usa nga tutuboron nga hayop nga imo nakuha hin diri matadong nga paagi, may dum-it na ini nga halad ngan diri na ini kakarawton.

¹⁹Diri nalilipay an Gihahataasi hin mga halad nga tutuboron nga ginhimo hin mga diri nakilala hin Dyos; waray bisan ano nga halad nga tutuboron makakabayad han ira mga sala.

²⁰An tawo nga mangawat hin hayop tikang hin usa nga kablas ngan ihalad niya nga tutuboron sugad hiya hin tawo nga nagpatay hin bata ha atubangan han iya amay.

²¹Kinabuhi para han mga kablas an pagkaon ngan an pag-agaw hini ha ira usa nga pagpatay.

²²Kay usa nga pagpatay in pag-agaw han panginabuhi hin usa ka tawo ug paglimbong hin surugoon bahin han iya suhol.

²³Kon in usa magtindog ug kahuman pagrub-on liwat hin iba, waray may nahimo labot la an makuri nga buhat.

²⁴Kon in usa nga tawo magpakaupay ngan in lain nga tawo magpakaraot, hin-o ha ira in pamamatian han GINOO?

²⁵Kon magkapot ka hin patay nga lawas ngan kahuman maglinis ka pinaagi hin panhunaw, ngan kahuman magkapot ka liwat han patay nga lawas, ano an kaupayan han imo panhunaw?

²⁶Kon magpuasa ka tungod han imo mga sala ngan magbalikbalik ka hin pagbuhat han amo la ngahaw nga mga sala, ano man an imo nakuha nga kaupayan han imo pagpuasa? Hin-o ngani in mamamati han imo mga pag-ampo?