Read Waray Samarenyo Meaning Based Sirac 35 Bible Online

Sirac 35 - Waray Samarenyo Meaning Based bible

Sirac 35

¹An pagtuman han Balaod labi pa hin kamahal kay han damo nga mga halad; usa ini nga halad hin pakig-angbitay.

²An pagbalos tungod hin kalooy sugad ini hin usa nga inani nga pugas nga halad; an paghatag ha mga kablas sugad ini hin halad hin pagpasalamat.

³An paglikay hin pakasala makakalipay han GINOO ngan makakabayad han sala.

⁴Kundi ayaw pagkadto han Templo kon waray nimo dara nga halad.

⁵Sugo ini han Balaod nga magdara ka hin halad.

⁶Kon in usa nga matadong nga tawo maghalad hin sakripisyo ngan an tambok maglanay ngada ha altar, an mahamot nga baho maalisbok ngadto han Gihahataasi.

⁷Kakarawaton han GINOO an mga halad han matadong nga tawo ngan diri ini hingangalimtan han GINOO.

⁸Pagdayaw han GINOO pinaagi hin huyayag nga pagdara hin halad ngadto ha iya; ayaw kahalot han syahan nga abot han imo uma.

⁹Pagmalipayon han tagsa nga upa nga imo ginhimo, ngan kon mabayad ka han ikanapulo ka bahin, buhata ini nga malipayon.

¹⁰Ihatag han Gihahataasi sugad han ginhatag niya ha imo ngan sugad hin kamahinatagon tubtob han imo mahimo.

¹¹An GINOO magbabalos manta ngan bubuhaton ini hin makadamo.

¹²Kundi ayaw hiya paghukipi ngan ayaw pagtapod hin mga halad nga nakuha hin diri matadong nga paagi. Diri hiya makarawat hini nga mga halad. An Katadongan han Dyos An GINOO waray pinili ug waray pinalabi.[91]

¹³Diri hiya nagtatamay han mga kablas; kon may-ada nag-aampo tungod kay ginpakaraot hiya, pinamamatian hiya han GINOO.

¹⁴Kon an mga ilo ug mga balo kinasingkasing an ira mga pag-ampo, diri hiya nagpapakabungol.

¹⁵An mga luha nga nadaligdig ha bayhon hin usa nga balo nagoliat hin pagsumbong supak han tawo nga nakahatag hin kasakitan ha iya.

¹⁶Pag-alagad nga mahinalangpon han GINOO ngan kakarawaton ka han GINOO; an imo mga pag-ampo maabot ngadto ha mga dampog.

¹⁷An mga pag-ampo han mapainubsanon nga tawo nalahos han mga dampog ngan naabot ngadto han Gihahataasi nga GINOO ngan nagpapabilin didto tubtob han pagbaton niya pinaagi nga an katadongan tumanon gud ngan adton mga salaan kastigohon.

¹⁸Ngan an GINOO magbubuhat dayon. Diri hiya mapakita hin iya kamapailobon ngadto han mga maghuka nga tawo. Mabulos hiya pinaagi hin pagpuo han mga diri natoo han Dyos. Pupuohon niya ngatanan adton mga waray pagpaid ug adton mga mapahitas-on ngan pupukanon an gahom han mga magraogdaog.

¹⁹Ihahatag han tagsa nga tawo an angay han iya mga hunahuna ug mga buhat. Tungod han kalooy han GINOO magmamalipayon an iya mga tawo kon paghukman na hira.

²⁰Ha panahon hin kasamokan, an iya kalooy kinakarawat sugad hin uran kahuman hin maiha nga kathuraw.