Read Waray Samarenyo Meaning Based Sirac 36 Bible Online

Sirac 36 - Waray Samarenyo Meaning Based bible

Sirac 36

¹Pag-ampo para han Israel O GINOO, Dyos han bug-os nga kalibutan siplati kami nga mapuanguron ngan kalooyi kami.

²Mahadlok unta an ngatanan nga nasod ha imo.

³Pakig-away kontra han mga langyaw nga nasod ngan magin saksi hira han imo gahom!

⁴Gingamit nimo kami ha pagpakita ha ira han imo pagkabaraan; yana gamita hira ha pagpakita han imo pagkagamhanan!

⁵Hibaroan unta nira, sugad nga hinbaroan namon, nga waray lain nga Dyos, O GINOO, kundi hi ikaw la.

⁶Ihatag in bag-o nga mga tigaman, pagbuhat hin mga bag-o nga milagro; ipakita an imo mahimayaon nga kusog!

⁷Ipadangat an imo gintalaan nga panahon nga an ngatanan makakaghimangraw bahin han mga dagko nga butang nga imo ginbuhat! Ibubo an imo makalilisang ngan naglalaga nga kapungot ngan pamataya an ngatanan nga amon mga kaaway. Puoha adton nagraogdaog han imo mga tawo.

¹⁰Dugmoka an ngatanan nga mga pangulo nga kaaway nga naghunahuna nga hira la an importante nga mga tawo dinhe ha kalibutan.

¹¹Tiroka an mga tribo han Israel ngan ibalik ha ira an ira mga tuna sugad nga imo ginhatag hadto ha ira.

¹²GINOO, kalooyi an Israel, an mga tawo nga kinilala pinaagi han imo ngaran, nga imo gintawag nga imo bugtong nga anak.

¹³Ipakita an imo pagpaid han Jerusalem, an imo baraan nga syudad nga imo ginpili nga imo pag-uokyan.

¹⁴Pun-a an imo Templo[92] didto ha Bukid Sion han imo himaya ngan hin mga imno hin pagdayaw.

¹⁵Magin saksi ka unta han imo mga tawo nga imo gintuha ha tinikangan; tumana an mga panagna nga ginpamulong ha imo ngaran.

¹⁶Balosa adton may-ada pagtoo ha imo ngan ipakita nga an imo mga manaragna magtadong.

¹⁷Dayuday mahigugmaon ka han imo mga tawo;[93] pamatii an imo mga surugoon dida han ira pag-ampo. Ngan an ngatanan dinhe ha tuna makakasabot nga ikaw an GINOO, an Dyos han mga katuigan. An Pagpili hin Asawa

¹⁸Makakaon hin bisan ano nga pagkaon, kundi may-ada mga pagkaon nga mauruupay kaonon kay han iba.

¹⁹Sugad nga an dila nakakasabot han rasa han magkalainlain nga karne, amo man an maidlot nga sarabotan makakasabot han mga buwa.

²⁰An tawo nga masamok an hunahuna amo an tinikangan han kasamok kundi an tawo nga may-ada maupay nga gin-agian ha kinabuhi mahibabaro kon uunanhon hin pagbalos hini.

²¹An babaye makarawat hin bisan hin-o nga lalake basi ma iya bana, kundi an lalake kinahanglan nga upayon an pagpili han iya asawa.

²²An kamahusay han babaye nakakalipay han lalake; waray masugad kamatahom pagkit-on han mata hin tawo.

²³Kon in babaye maaghop ngan mapainubsanon ha iya mga pulong, palaran gayud an iya bana.

²⁴Kon mag-asawa in lalake, nakaangkon hiya han gimamaupayi nga butang—usa nga asawa nga mabulig ug madasig ha iya.

²⁵Kon in usa nga tuna diri pag-alaron, magpapasagad la hin pagkuha hin bisan ano an mga kawatan. Kundi kon in lalake waray asawa, waray hunong an iya panhayhay dida han iya pagsinudoysudoy.

²⁶An mga tawo waray na pagtapod hin usa nga lalake nga waray puroy-anan nga nakaturog bisan diin nga dapit sugad nga waray nira pagtapod hin malakat nga kawatan nga waray hunong hin sudoy han mga kabungtuhan.