Read Waray Samarenyo Meaning Based Sirac 37 Bible Online

Sirac 37 - Waray Samarenyo Meaning Based bible

Sirac 37

¹An Diri Tinuod nga mga Sangkay An bisan hin-o makakahimo hin pag-angkon ha imo nga iya ka sangkay kundi may-ada mga tawo nga sangkay la ha ngaran.

²An kabidoan nga natikang hin paglubad han tinuod nga kamagsangkay mararaot pa kay han kamatayon.

³Pagkamaraot hini nga pagbati! Kay ano nga nahimo man ini nga pakigsangkay? Naunan-o nga nalukop man an tuna hini nga limbong?

⁴May-ada mga tawo nga maupay la nga imo sangkay samtang maupay an imo kahimtang kundi matalikod ha imo kon umabot an kasamokan.

⁵An tinuod[94] nga sangkay mabulig ha imo kontra han imo mga kaaway[95] ngan maugop ha imo dida hin pakig-away.

⁶Ayaw hingalimot hin sugad nga kaupod dida ha pag-awayan.[96] Ipaangbit ha iya an mga bunga han imo pagdarag-an. Paghinay hin Pagkarawat hin Sagdon

⁷An bisan hin-o makakahimo hin paghatag hin sagdon, kundi may-ada mga tawo nga nagsasagdon tungod la han iya kaupayan.

⁸Paghinay kon may-ada maghatag ha imo hin sagdon. Panginanoa anay kon ano an iya tuyo bahin hini nga butang kay makakasabot ka nga an orog gud hini para la han iya kaupayan. Kay ano nga magpapasig-una man hiya ha imo?[97]

⁹Papasarigon ka nga maupay an ngatanan, kundi maisol hiya hin pag-inaw kon ano an mahinanabo ha imo.

¹⁰Ayaw pangaro hin sagdon hin tawo nga waray pagtapod ha imo ngan ayaw paghatag hin sagdon hin tawo nga naawa ha imo.

¹¹Ayaw pangaroi in babaye hin sagdon mahitungod han karibal niya, in matalaw mahitungod hin aragway, in matirigayon mahitungod hin pagtawad, in pumaralit mahitungod hin pagbaligya, in kuripot nga tawo mahitungod hin pagpasalamat, in maraogdaog nga tawo mahitungod hin pagkalooy, in hubya nga tawo mahitungod hin buruhaton, in diri permanente nga magtratrabaho mahitungod hin paghuman hin buhat, in hubya nga surugoon mahitungod hin makuri nga turumanon. Ayaw pagtagad hin mga sagdon nga ira ighahatag.

¹²Lugod sarig hin usa nga dyosnon nga tawo ngan kinikilala nga nagtutuman hiya han mga sugo han GINOO, hin usa nga malolooy ha imo, nga mabibido kon kumita han imo kapakyasan.

¹³Tapod han imo kalugaringon nga paghukom; waray na iba nga kasasarigan nga sagdon kay hini.

¹⁴Usahay an imo kalugaringon nga pagbati mauruupay pa magsumat ha imo kay hin pito nga magbarantay didto hin hitaas nga lantawan.

¹⁵Labaw han ngatanan, pag-ampo ngadto han Gihahataasi nga ipakita ha imo kon ano an matadong nga butang nga angay pagbuhaton. An Kinaadman ngan an Pagtapod

¹⁶Ha luyo han ngatanan nga nabuhat aada an paglarang ug an paghunahuna.

¹⁷May labot an hunahuna hin upat nga mga butang: amo ini an maupay ngan an maraot, an kinabuhi ug an kamatayon. Natikang ini hira dida han hunahuna[98] kundi waray iba nga nagmamando ha ira kundi an dila.

¹⁹In usa ka tawo bangin may-ada hibaro hin pagtutdo kundi para ha iya kalugaringon, waray niya gamit.

²⁰Bangin maupay hiya magpahamutang hin mga pulong, kundi ha kataposan gugutomon hiya kay nasisina an mga tawo ha iya.

²¹Mahinanabo ini kon waray niya maupay nga pamurubuot, kon an GINOO waray maghatag ha iya hin ka listo hin pagyakan.

²²In usa ka tawo makasiring nga maaram hiya ngan ipapasabot niya nga diri hiya nagsasayop han iya hinbabaroan.

²³An bisan hin-o nga tinuod nga maaram mahihimo nga magturutdo han iya mga tawo nga waray magruruhaduha nga an iya gintututdo amo an kamatuoran.

²⁴An ngatanan magdadayaw hini nga tawo ngan maghihinabi nga palaran ini nga tawo.

²⁵An kinabuhi han tawo may-ada katubtoban han kadamo han mga adlaw, kundi an kinabuhi han Israel diri masusukol pinaagi hin mga adlaw.

²⁶An maaram nga tawo makakaangkon han pagtapod han mga kadayonan. An Pagpugong han Ginhawa han Tawo

²⁷Anak, ha imo pag-ukoy dinhe ha kalibutan, pagpudngi an imo ka may-ada gana hin pagkaon ngan ayaw pagkaon hin bisan ano nga maaram ka nga makakadaot ha imo.

²⁸An ngatanan nga pagkaon diri para han ngatanan ngan an tagsatagsa diri naruruyag hin amo la gihapon nga pagkaon.

²⁹Ayaw pakasiring nga kinahanglan tilawan mo an ngatanan nga pagkaon ngan ayaw kalamot hin pagkaon.

³⁰Kon maglapos han kasadangan an imo pagkaon, masasakit ka; kon buhaton mo hin masukot, dayuday magsasakit an imo tiyan.

³¹An kalamot nakamatay hin damo nga mga tawo pinaagi hin bangongot. Paglikyi ini ngan mahilawig pa an imo kinabuhi.