Read Waray Samarenyo Meaning Based Sirac 39 Bible Online

Sirac 39 - Waray Samarenyo Meaning Based bible

Sirac 39

¹Kundi lain hini an tawo nga nag-alagad han iya kalugaringon hin pag-aram han Balaod han Gihahataasi. Ginsususi niya an kinaadman han ngatanan nga mga baraan nga magsusurat ngan gin-aadman niya an mga panagna.

²Ginsasag-ulo niya an mga pinamulong han mga bantogan nga tawo ngan maupay hiya maghubad han mga pananglitan.

³Gin-aadman niya an mga tinago nga butang han mga darahonon ngan nakakahimo hiya hin paghimangraw han mga diri masayunay hisabotan nga bahin han mga pananglitan.

⁴Natawag ha iya an mga dagko nga pagkatawo basi makabulig hiya ha ira ngan hinkikit-an hiya nga kaupod hadton mga pangulo. Napakadto hiya ha mga langyaw nga tuna basi la hiya mahibaro mahitungod han kaupayan ug karat-an han tawo.

⁵Nababatasan niya in pagmata ngan pagbuhat nga sayo pa ngan pag-ampo hin dako nga tingog ngadto han GINOO, iya Magburuhat, pangaro han Gihahataasi nga pasayloon an iya mga sala.

⁶Kon karuyag han gamhanan nga GINOO, pupun-an hiya hin sarabotan. Ipapagawas niya in damo nga mga makinaadmananon nga mga pulong ngan magpapasalamat hiya han GINOO dida han iya pag-ampo.

⁷May-ada niya hibaro nga ipapaangbit ngan maupay nga sagdon nga ihahatag, sugad man nga may-ada niya pakasabot han mga tinagoan han GINOO.

⁸Ipapakita niya an iya hinbaroan dida han iya pagtutdo[105] ngan an iya parayaw aada han Balaod han GINOO ug an Ginsaaran.

⁹Dadayawon hiya han ngatanan tungod han iya kinaadman ngan diri ini mawawara tungod kay an mga tawo han tiarabot nga katulinan mahinunumdom ha iya.

¹⁰Maghihinabi an mga Hentil mahitungod han iya kinaadman ngan pagdadayawon hiya hin makusog nga tingog didto han katirok.

¹¹Kon mabuhi hiya tubtob hin kalagas, mapatay hiya nga bantogan nga tawo, kundi kon ilubong hiya nga diri pa hiya bantogan, igo na ini para ha iya.[106] Usa nga Imno ha Pagdayaw han Dyos

¹²Sugad han bulan, bug-os ako—puno hin damo nga mga panhunahuna nga kinahanglan paghirohimangrawan.

¹³Pamati kamo ha akon, kamo nga akon mga madasigon nga anak, ngan pamuklad kamo sugad han tanom nga rosal ha pangpang han sapa.

¹⁴Pamuklad kamo sugad han mahamot nga lirio ngan luoba an hangin han iyo kahamot sugad hin insyenso. Pagkanta han mga pagdayaw han GINOO ngan pagpasalamati hiya tungod han ngatanan nga iya ginbuhat.

¹⁵Ipasangyaw an iya himaya dida hin mapasinalamaton nga pagdayaw! Dinuyogan han tokar han arpa, pagkanta hini nga awit:

¹⁶An ngatanan nga ginbuhat han Dyos maupay hin duro; an ngatanan nga iya sugo, ha maiha o madali, natuman.

¹⁷Waray bisan hin-o in magpakiana kay ano nga amo man ini an mga butang; babatunon ini nga mga pakiana kon umabot na an igo nga panahon. Nagsugo hiya ngan an tubig hitaas an pagtambak, dagko nga mga pader hin tubig pinmakita han iya pagyakan.

¹⁸Bisan ano an iya igsugo, natutuman dayon; waray katubtoban an iya gahom hin pagtalwas.

¹⁹Nakita hiya han ngatanan nga ginbubuhat han mga tawo, waray paagi hin pagtago ha iya atubangan.

²⁰Nakita hiya han kabug-osan han panahon, tikang ha tinikangan ngadto ha kataposan, ngan waray butang nga makakapahiburong ha iya.[107]

²¹Waray bisan hin-o in magpakiana kay ano nga amo man ini an mga butang; an ngatanan nga mga binuhat may-ada tuyo.

²²Nalapwas an iya mga bendisyon sugad han Nilo, nga nagpapakaupay han kalibutan pinaagi hin nakakalangbo nga baha.[108]

²³Ginhimo niya nga maasin an tubig nga matab-ang, ngan ipinadapat an iya kasina ngadto han mga nasod.

²⁴Para hadton mga mag-inampoon, matadong an iya mga dalan, para hadton magraogdaog, binutangan ini hin mga bitik.

²⁵Tikang ha tinikangan naghimo hiya hin mag-upay nga mga butang para hadton mga mag-upay, ngan mga makalilisang nga mga butang para hadton mga makasasala.

²⁶An una nga mga kinahanglan han kinabuhi amo ini: tubig, kalayo, puthaw ug asin, arina, dugos, ngan gatas, bino, bado, ngan lana.

²⁷Ini ngatanan nga mga butang mag-upay para hadton mga mainampoon, kundi mahihimo ini nga magraot para hadton mga makasasala.

²⁸May-ada mga hangin nga ginbuhat basi magdara hin sirot, makusog kaupay hin pagbantad hin kabukiran.[109] Ha panahon hin paghukom, binubul-iwan nira an ira kusog, ngan pinapahugpoy nira an kasina han ira magburuhat.

²⁹An magpintas nga mga mananap, mga bungad ug mga halas, ngan espada nga nagpuo han mga magraogdaog; an kalayo, uranos hin yelo, gutom, ug sakit; ginbuhat ini ngatanan basi gamiton hin pagsirot.

³¹Ini ngatanan malipayon hira hin pagsugot han sugo han GINOO ngan andam ini hira hin pag-alagad ha iya dinhe ha tuna; kon an pagtuman han ira buhat naabot, diri gud hira nasupak. (

³²Naiha na nga natoo ako hini, sanglit kahuman ko hin paghunahuna hini, akon ini ginsurat.[110])

³³An ngatanan nga mga binuhat han GINOO mag-upay; gintutuman an ngatanan nga kinahanglanon ha igo nga panahon.

³⁴Waray may makakasiring nga may-ada mga butang nga maraot-raot kay han iba, kay an ngatanan mag-upay ha iya dida han iya kalugaringon nga dapit.

³⁵Sanglit yana, pagkanta kamo hin pagdayaw ha bug-os niyo nga kasingkasing, ngan dayawa niyo an ngaran han GINOO!