Read Waray Samarenyo Meaning Based Sirac 4 Bible Online

Sirac 4 - Waray Samarenyo Meaning Based bible

Sirac 4

¹Ayaw pag-ulanga hin pamiling han ira panginabuhi an mga pobre o ayaw pagpinahulata hira dida han ira pagkinahanglan.

²Ayaw gud pagtuksoha hin pagdumot o kasina an tawo nga ginugutom.

³Ayaw pagdugangi an mga kakurian han tawo nga nagtuturaw na. Kon nagkikinahanglan man hiya, ayaw na hiya pagpinahulata.

⁴Ayaw igsikway in usa nga makililimos nga nagkukuri. Ayaw pagtalikdi in usa nga makalolooy o ayaw pagtagi hin higayon nga hiya magtunglo ha imo.

⁶Kon pagtunglohon ka niya ha butnga han iya paghimakuri, pamamatian han iya Magburuhat an iya pag-ampo.

⁷Talinguhaa nga kilal-on ka han bungto. Tahora an mga tawo nga mga pagburot-an.

⁸Pamatii an igsisiring han mga pobre ngan batona hira nga matinahuron.

⁹Panalipdi an mga tawo hadton karuyag magdaot ha ira, ngan magmadig-on ka ha imo paghukom.

¹⁰Pagpaka-amay han mga ilo, ngan tagi an mga balo han pagbulig nga diri na mahahatag han ira patay nga mga bana. Niyan masusugad ka hin anak han Gihahataasi, ngan hihigugmaon ka niya labaw pa han paghigugma ha imo ni imo nanay. Magturutdo an Kinaadman

¹¹Ginmamangnoan han Kinaadman adton mga nagbibiling ha iya; gin-aataman niya basi hira magmagamhanan.

¹²An paghigugma ha iya amo an paghigugma han kinabuhi; tim-os gud nga kalipay an temprano nga pagmata hin pagbiling ha iya.

¹³Pagpapasidunggan an nakarawat hin Kinaadman. Pagpapakaupayon hiya han GINOO bisan diin hiya kadto.

¹⁴An mga surugoon han Usa nga Baraan amo an mga surugoon han Kinaadman, ngan hinihigugma han GINOO an ngatanan nga nahigugma han Kinaadman.

¹⁵Adton mga nagsusugot ha iya; maghuhukom hin matadong[8] adton mga namamati ha iya may-ada matuod nga kahimyangan.

¹⁶Ikada an imo paglaom han Kinaadman, ngan magtatag-iya ka ha iya ngan magpapabilin hiya dida han imo mga tulin.

¹⁷Ha pagtikang, pag-uunhan ka niya ha magkuri nga mga aragian. Paghahadlokon ka niya ngan maghuhunahuna ka nga diri ka makakagpadayon. An disiplina nga iya ginkikinahanglan mahatag hin dako nga kasakitan, ngan pagsasarihan ka niya han iya mga kinahanglanon tubtob nga makasarig na hiya ha imo.[9]

¹⁸Niyan makada hiya ha imo hin waray paglangan, ipapadayag ha imo an iya mga tinago ngan paglilipayon ka niya.

¹⁹Kundi kon tumalikod ka ha iya, pababay-an ka niya ngadto han imo kabungkagan. Ayaw Pagtapod han Imo Kalugaringon

²⁰Pahimulosi an mga higayon kundi bantayi an karat-an. Ayaw pagtamaya an imo kalugaringon.

²¹Angay hin pagpasidungog ngan pagtahod an kamapinaubsanon, kundi makakapasala an usa nga ubos nga paghukom han imo kalugaringon.

²²Ayaw pagtugot nga pagpakaraoton ka han iba; ayaw pagdaota an imo kalugaringon pinaagi hin pagpasibaya han imo mga katungod.

²³Ayaw pag-alang hin pagyakan kon ginkikinahanglan ini han higayon.[10] Ayaw pagtagoa an imo kinaadman.[11]

²⁴Mahibabaroan la an imo kinaadman ngan an imo gin-adman pinaagi han imo mga pulong.

²⁵Kundi ayaw pagkontra han kamatuoran, ngan hinumdomi nga diri ka maaram han ngatanan.

²⁶Ayaw kaawod hin pagkompisal han imo mga sala; kawang la an pagpugong han pag-awas hin usa nga salog.

²⁷Ayaw itugot nga pagmandoan ka hin usa nga lurong o hin pagdapig han mga gamhanan.

²⁸Unongi an kamatuoran tubtob ha kamatayon; makikiaway an GINOO tungod ha imo.

²⁹Ayaw pagdagmit hin pagyakan o ayaw kahubya ngan ayaw pagpasibaya han imo buruhaton.

³⁰Ayaw pagpakaliyon ha iyo panimalay o ayaw pagtahap han imo mga surugoon.

³¹Ayaw igmasayon an pagduhol han imo palad hin pagkarawat kon kukumkumon mo manla ini ha takna hin paghatag.