Read Waray Samarenyo Meaning Based Sirac 40 Bible Online

Sirac 40 - Waray Samarenyo Meaning Based bible

Sirac 40

¹An Makalolooy nga Kinabuhi han Tawo An tagsa ka tawo tinagan hin damo kaupay nga buhat nga iya pagtutumanon. Usa nga mabug-at nga paras-anon ihinatag ha aton ngatanan tikang han adlaw han aton pagkatawo tubtob han adlaw nga mabalik kita ngadto ha tuna, an iroy naton ngatanan.

²Nagugupong ngan nahahadlok kita, ngan nalilisang kita han adlaw han aton kamatayon—

³kita ngatanan, tikang han hadi dida han iya hadianon nga trono nga nakakabado hin hadianon nga mga panapton ngan nakakasul-ot hin korona ngadto han giuubosi nga tawo nga nakakabado hin bahol nga panapton ngan kablas an kaukoy.

⁵Kita ngatanan ha aton kinabuhi igkakatapo han kasina, pangabugho, kaawa, ug kasamok. An mga butang nakakasamok ha aton; nag-uokoy kita dida hin makalilisang nga mga pagkasumpaki ngan dida hin kahadlok han kamatayon. Bisan kon nahigda kita, mga bag-o nga samok an aton hinngangaturogan.

⁶Tuman la kita nga nakaturog, kon nangangaturog lugaring kita. Hibabaw la an aton pagkaturog, kay nasasamok kita hin bag-o nga mga panhunahuna. Kon mag-inop kita nga nakalag-iw kita hin kaaway,

⁷ha takna nga hidadakpan[111] na kita, nagmamata kita ngan nakakaginhawa kita kay waray man ngay-an naton sadang kahadlokan.

⁸Iini an kinahanglan atubangon han ngatanan nga mga binuhat, ma tawo ug ma mananap (kundi pito pa ini ka pilo hin kamaraot para han makasasala):

⁹an kamatayon, an karibok, an pakig-away, an pakamatay, an disgrasya, an gutom, an sakit, ug an peste.

¹⁰Ini ngatanan nga mga butang ginbuhat tungod han magraogdaog; hira amo an tinikangan han pagkabungkag[112] han mga butang.

¹¹An ngatanan nga tikang ha tuna mabalik ha tuna, sugad nga an ngatanan nga tubig naawas ngadto ha dagat. An Sangputanan han Karat-an

¹²Waray butang nga tikang hin paghukip ug panlupig nga magpapadayon, kundi an bunga han kamainogopanon magpapabilin ha kadayonan.

¹³An hiagi nga naangkon hin diri matadong nga paagi sugad ini hin sapa nga naawas kay nagsasapay ha panahon nga may-ada makusog nga dalogdog ug uran,

¹⁴nag-aanod han mga dagko nga bato dida ha iya pagdaralwa ngan ha tigda la nagmamara.[113]

¹⁵An mga anak han mga tawo nga diri natoo han Dyos diri magbibilin hin dagko nga panimalay; sugad hira hin mga tanom nga naiginagamutan ha bawbaw hin bato,

¹⁶sugad hin mga bariis nga naturok ha pangpang han salog nga una malaya[114] kay han iba nga banwa.

¹⁷An mga buhat ha kalooy ug ha paghigugma magpapadayon sugad han kinaiya nga waray tinikangan ngan waray kataposan.[115] An mga Kalipay han Kinabuhi han Tawo

¹⁸An paglugaring hin ka may-ada manggad ug hin pagbuhat basi mabuhi—ini nga duha nakakahatag hin mahusay nga kinabuhi kundi mauruupay pa an pakaagi hin bahandi.

¹⁹An ngaran han tawo diri mawawara labi na kon may-ada hiya mga anak o magtindog hiya hin syudad, kundi mauruupay pa an pakaagi han Kinaadman. An kamay-ada mga hayop ug tanaman hin mga nabunga nga kahoy makakapabantog ha imo,[116] kundi mauruupay pa kon may-ada ka asawa nga imo hinihigugma.[117]

²⁰An bino, tokar, ngan kanta makakalipay ha imo, kundi mauruupay pa an malipayon nga pagkaasawa.[118]

²¹An mga plauta ug arpa makakahimo hin maupay nga tunog kundi mauruupay pa an manamit pamation nga tingog hin tawo.

²²An kamatahom ug an kamahusay nakakalipay han mata, kundi diri gud sugad han bag-o nga pagturok ha panahon han panmukad.

²³Diri ka igkakaaway hin maupay nga sangkay o amyaw, kundi mauruupay pa an masinaboton nga asawa.[119]

²⁴Maupay nga may-ada mga bugto ug bumurulig ha panahon hin kasamok, kundi labi na nga kadako nga bulig kon naara ka hin paghatag ha mga kablas.

²⁵An bulawan ug salapi makakahatag ha imo hin matapod nga kamutangan, kundi mauruupay pa an maupay nga sagdon.

²⁶An manggad ug kusog makakahatag ha imo hin pagtapod, kundi an kahadlok han GINOO makakahatag pa ha imo hin darodako nga pagsarig. Kon mahadlok ka han GINOO waray mo na sadang kabarak-an; aada an ngatanan nga imo ginkikinahanglan.

²⁷An kahadlok han GINOO sugad hin malangbo nga tanaman hin mga kaupayan; diri ka na magkikinahanglan hin lain pa nga imo sisirongan. An Pakilimos

²⁸Anak, ayaw pag-ukoy hin kinabuhi hin makililimos; mauruupay pa an kamatay kay hin pakilimos.

²⁹Kon kinahanglan magsarig ka hin usa ka tawo para han imo pagkaon, diri tinuod nga nag-uokoy ka ha imo kalugaringon nga kinabuhi. Gindudum-itan mo an imo kinabuhi pinaagi hin pagkarawat tikang ha iba hin pagkaon. An pakilimos nakakapaguol han kalag hin tawo nga maupay an pamurubuot.[120]

³⁰An tawo nga waray kaawod makakahimo nga an iya pakilimos matam-is ngan maupay nga buhat, kundi ha pagkatinuod didto ha sag-od han iya kasingkasing, may-ada nagdidilaab nga kaawod.