Read Waray Samarenyo Meaning Based Sirac 41 Bible Online

Sirac 41 - Waray Samarenyo Meaning Based bible

Sirac 41

¹An Kamatayon An kamatayon! An panhunahuna la hini mapait para hin usa nga mainuswagon an kabuhi, himyang an pag-ukoy ngan may-ada niya mga hiagi, waray kagul-anan, ngan may-ada gana hin pagkaon.

²An kamatayon! An paghukom hini kinakarawat hin usa ka tawo nga kablas an pag-ukoy, nga masakiton, lagas na kaupay, lumos hin mga kabidoan, buta, ngan nawad-an na hin paglaom.[121]

³Ayaw kahadlok han kaladnganan han kamatayon. Panumdom nga inmabot an kamatayon ha ira nga una pa ha imo ngan maabot liwat ini hadton masunod pa ha imo.

⁴Iginbuot ini han GINOO para han ngatanan nga buhi nga binuhat. Hin-o ka ngani nga masupak han karuyag han Gihahataasi? Didto han tuna han mga minatay, waray na manginginano kon nag-ukoy ka ba hin napulo ka tuig o 100 ka tuig o 1,000 ka tuig. An Sangputanan han mga Magraogdaog

⁵An mga anak han mga makasasala, nga ginpatubo dida hin dapit nga waray pagkilala han Dyos, nahimo nga mga magdumot nga tawo.

⁶Nawawad-an hira han bisan ano nga ira nasunod ngan an ira sumusunod mag-uokoy dida hin makaaalo nga kinabuhi.

⁷Pagbabasulon han mga anak an ira mga kag-anak nga waray pagkilala han Dyos mahitungod hini nga ira kaarawdan.

⁸Ginhukman na kamo ha karat-an, kamo nga waray tuloohan nga mga tawo nga binmaya han Balaod han Gihahataasi.

⁹Kon may-ada niyo nga anak, aabotan hira hin disgrasya ngan waray mahibibilin dida ha iyo labot han kabidoan. May-ada malilipay ha kada kapupukan niyo[122] ngan bisan kahuman han iyo kamatayon, pagpapakaraoton la kamo gihapon.

¹⁰An nahimo tikang ha kawarayan,[123] mabalik ngadto ha kawarayan; ngan amo ini an mahinanabo han mga diri nakilala han Dyos, paghuhukman hira basi maanaw.

¹¹An lawas han tawo waray la gamit,[124] kundi an maupay nga dungog magpapadayon.

¹²Panalipdi an imo dungog; mauuna ka pa hin kamatay ngan magpapabilin ini nga imo dungog hin maiha kay han yinukot nga mga bahandi.

¹³An maupay nga kinabuhi may-ada katubtoban kundi an maupay nga dungog magpapabilin ha kadayonan. An Angay Kaawdan

¹⁴Mga anak ko, tumana an akon igtututdo ha iyo ngan pag-ukoy kamo nga malinawon. An kinaadman nga diri ipinapagawas ha pulong sugad ini hin manggad nga gintago—nga duha waray mga gamit.

¹⁵An tawo nga magtabon han iya katuyawan mauruupay ini hiya hadton nagtitipig han iya kinaadman para la ha iya kalugaringon.

¹⁶Mga anak ko, pamati kamo ngan tututdoan ta kamo han mga higayon nga angay niyo kaawdan.[125] Kon usahay diri ini nahimumutang ha kaangayan.

¹⁷Ha atubangan han iyo mga kag-anak, kaawod kamo han iyo maghilas nga panggawi. Ha atubangan hin punoan o importante nga tawo, kaawod kamo hin pagbinuwa.

¹⁸Ha atubangan han hukom, kaawod kamo han iyo masinupakon nga binuhatan. Ha atubangan hin katirok o han kadam-an, kaawod kamo hin pagsupak han balaod. Ha atubangan hi sangkay o kabulig, kaawod hin paglimbong.

¹⁹Ha atubangan han iyo amyaw, kaawod hin pangawat. Kaawod hin diri pagtuman hin saad,[126] hin pagsaray han iyo mga siko ha lamesa nga kaonan, hin katihik kon pangangaroan kamo,

²⁰hin diri pagbaton hin pangomusta hin pagtutok ha babaye nga maraot an dungog,

²¹hin pagbaribad han hangyo hin iyo uropod, hin pagpugong han katungod han iba, hin pagtutok han asawa hin iba nga lalake,

²²hin pagsingabot han iya oripon nga babaye (pahirayo han iya higdaan) hin pagpakaalo han iyo kasangkayan, hin pagsuson han mga regalo

²³nga iyo kinakarawat, hin pagbuyagyag hin mga tinago. Amo ini an mga panahon nga kinahanglan maawod kamo, ngan an mga tawo magtatahod ha iyo.