Read Waray Samarenyo Meaning Based Sirac 42 Bible Online

Sirac 42 - Waray Samarenyo Meaning Based bible

Sirac 42

¹An Angay Iparayaw Ha lain nga bahin, mahimo nga makasala pinaagi hin pagpatuyang han imo karuyagon ngadto han iba nga mga tawo. May-ada mga butang nga kinahanglan diri kamo maawod:

²an Balaod han Gihahataasi ug an iya ginsaaran, an angay nga paghukom han mga tawo nga diri nakilala han Dyos,

³an pakigbahin han mga gastos hin iyo kabulig ha pagpakabuhi o kaupod niyo ha paglalaktan an pakig-angbitay han surondanon,

⁴paggamit hin igo nga mga timbangan ug suruklan,

⁵an pagganansya, ma dako o ma gutiay, pakitawad ug paghangyo hin usa nga nagpapatigayon, an masukot nga pagdisiplina han iyo mga anak, pagtubal hin malingoon nga oripon tubtob nga pag-awasan hin dugo.

⁶Maupay pa nga trangkahan niyo an iyo mga butang kon diri katataporan an iyo asawa o kon damo an nag-aalirong nga mga tawo.

⁷Paghimo hin tama nga listahan hin bisan ano nga imo hinulog ha bangko o hin bisan ano nga imo kinarawat kon hinatag.

⁸Ayaw paghialang hin pagsaway hin tawo nga patuyaw an mga panggawi o hin lagas nga naungay la gihapon hin mga kababayen-an nga maraot in dungog. Mapulsanon nga mga sagdon ini ngatanan ngan kon iyo ini pagtumanon, an ngatanan nauyon han imo mga panggios. Mga Kag-anak ngan mga Anak nga Kababayen-an

⁹Bisan kon diri karuyag han amay nga makasabot an iya anak nga babaye, diri mangangaturog an amay hin kabaraka tungod ha iya. Kon bata pa ini hiya, nababaraka an amay nga bangin diri ini makaasawa. Kon inasaw-an na hiya, nababaraka hiya hiunong han iya kalipayan.

¹⁰Kon usa hiya nga uray nga babaye, nababaraka hiya nga bangin ini hiya paglugoson ngan magburod samtang kalungon pa hiya han iya kag-anak. Kon inasaw-an na hiya, nababaraka hiya nga hangin hiya magmalingoon o bangin diri hiya mag-anak.

¹¹Bantayi hin maupay an imo anak nga babaye kon diri na hiya napasaway. Kon diri nimo bantayan hin maupay, bangin ka la pag-uwaton ha atubangan han imo mga kaaway. Dayuday nga pagtitinawaan ka la han mga tawo han bungto, usa ka nga kaarawdan han atubangan han mga tawo. Siguroha nga an iya kwarto waray mga bintana o hin bisan ano nga dapit nga makakapanan-aw hiya ngadto han portahan han balay.[127]

¹²Ayaw tugoti nga iparayaw niya an iya kamahusay ha atubangan han kalalaken-an o makighinangpangon hiya han iya igkasi kababayen-an.[128]

¹³An kababayen-an nakakadaot han ira igkasi kababayen-an sugad nga an mga tangkob nakakadumog han bado.

¹⁴An kamaraogdaog han lalake mauruupay pa kay han ka buotan han babaye; an kababayen-an amo an nagdadara han kaawod ug han disgrasya. An Himaya han Dyos dida han mga Butang ha Kalibutan

¹⁵Yana pahinunumdumon ta ikaw mahitungod han mga ginbuhat han GINOO ngan pag-aasoyan ta ikaw han mga butang nga akon hinkit-an. An mga pulong han Dyos amo an naghimo hini nga mga binuhat niya ug an bug-os nga iya ginbuhat nasugot han iya mga sugo.

¹⁶An kapawa han adlaw nasirang ngada han ngatanan, ngan napupuno hin himaya han GINOO an mga butang.

¹⁷Bisan ngani ha iya mga baraan nga anghel waray ihatag han GINOO an gahom hin pag-asoy han ngatanan nga iya pagkagamhanan, bisan kon gintagan niya hira hin gahom nga diri hira paglabtan ha iya mahimayaon nga atubangan.[129]

¹⁸Nakita hiya han mga kalalawdan ug han kasingkasing han tawo, ngan maaram hiya han mga tinagoan hini nga duha. An Gihahataasi maaram han ngatanan nga kinahanglan hibaroan, ngan nakakasabot han mga tigaman han mga katuigan.

¹⁹Maaram hiya hadton mga naglabay ngan han ngatanan nga tiarabot; ginbubuksan niya an labi ka hilarom han mga misteryo.

²⁰Hinbabaroan niya an aton tagsatagsa nga hunahuna ngan hinbabatian niya an tagsatagsa nga aton pulong.

²¹An mahusay nga pagpalakat han kalibutan nagpapakita han kadako han iya kinaadman; waray niya pagkabalhin ha dayon nga mga katuigan.[130] Waray mahidudugang ha iya ngan waray man liwat maiiban ha iya; waray niya kinahanglan nga may-ada magsagdon ha iya.

²²An ngatanan niya nga binuhat maanyag, bisan an gigugutiayi ug labi hin kamaluya nga sulhog han kapawa.[131]

²³An ngatanan nga butang nagpapadayon hin waray katubtoban, ngan hira ngatanan may-ada kalugaringon nga tuyo.

²⁴Padispadis an ngatanan nga mga butang, an usa ka atbang han iba, kundi waray ginhimo han GINOO nga diri hingpit.

²⁵An ngatanan naghihingpit han kaupayan hin lain nga butang. May tawo ba nga makakakita hin igo hini nga iya himaya?