Read Waray Samarenyo Meaning Based Sirac 43 Bible Online

Sirac 43 - Waray Samarenyo Meaning Based bible

Sirac 43

¹Hin kamatahom han mapawa, mahawan nga langit ha igbaw naton! Kamaanyag nga taran-awon hini!

²An adlaw ha iya pagsidlit nagsasangyaw ha iya pagsirang an kamakaaramdok hini nga butang nga ginhimo han Gihahataasi.

³Ha udto ginpapamara niya an tuna; waray nailob han iya maping-it nga kapaso.

⁴An natutunod nga adlaw nagsusurit han mga sampaw han kapungtoran, sugad hin hudno nga metal nga nababangga tungod han kapaso.[132] Nag-iidlap ini hin nagkakalayo nga mga sulhog, nga nakakabuta han mga mata tungod han kabislaw.

⁵Gamhanan an GINOO nga naghimo hini; ha iya pagsugo nagmamadali ini dida ha iya agianan.

⁶Aada liwat an bulan nga nagtitigaman han palakat han panahon,[133] an tigaman nga waray kataposan han pagkabarobalyo han panahon.

⁷An bulan amo an tigaman han baraan nga mga adlaw, an iya kapawa nabug-os ngan onina nagtitikasirom.

⁸An “bulan” ginngaranan alinsunod han bulan, makaaramdok pagkit-on samtang nagtitikabug-os ini kada gab-i, usa nga mapawa nga tigaman para han kasondalohan nga langitnon, nga nagsiga didto ha atop han panganuron.

⁹Nakakapatahom han kagab-ihon an masanag nga mga bitoon ha langit, maranggat nga mga sabong didto han kalangitan han GINOO.

¹⁰Aadto ini han mga dapit nga igintudlok ha ira han Usa nga Baraan ngan waray gud paghunong an iya dayon nga pagbantay.

¹¹Tan-awa an balangaw ngan pagdayawa an iya Magburuhat! Hin kamatarag-ob, hin kamaranggat an iya katahom!

¹²Sugad hin pana nga binabawog han mga kamot han Gihahataasi, nalakbay ini han sidsid han langit dida hin malidong nga himaya.

¹³Nagsugo hiya ngan natikang pagkataktak an yelo, nakikidlat hin pagtuman han iya paghukom.

¹⁴Binubuksan an mga hirimosan han langit ngan nagkakagawas an mga dampog sugad hin mga tamsi nga nagkakalupad.

¹⁵Pinaagi han iya gahom ginpupundok niya in dagko nga hugpong hin mga dampog, ngan ginpupusak an bagtik nga uran ngan nahimo nga uranos hin mga burubuk-ol nga yelo.

¹⁶Nagyakan hiya, ngan ginlubag han dalugdog an tuna tungod hin kasakit; nabay-og an kabukiran tungod han iya kusog.[134] Kon iya karuyag, nahangin an salatan, naabot an mga buhawe ngan an mga bagyo tikang ha amihanan. Napadara hiya han yelo nga nahugdon sugad hin mga tamsi, sugad hin mga duron nga nahapon ha tuna.

¹⁸Napapausa kita han iya mabusag nga katahom, ngan nasisindak kita hin pagkita nga nagkakaludlog ini.

¹⁹Ginbisibis niya ha tuna an bagtik nga tubig sugad hin asin, ngan natig-a ini ngan nahihimo nga tunokon nga mga bukad nga yelo.[135]

²⁰Nasugo hiya nga humuyop an mahagkot nga hangin nga amihan ngan nahihimo nga yelo an tubig; nabagtik an ngatanan nga lanaw ug danaw nga nagsusul-ot hin bado nga yelo.

²¹Ginsusuritan niya pinaagi hin huraw an mga kagurangan han mga kapungtoran, ngan nauuga an kabanwaan tungod han kamapaso;

²²Kundi nabubuhi na liwat ini ngatanan pinaagi hin usa nga dampogon nga burong, samtang naghahadkot an panahon ngan napakita an tun-og.

²³Pinaagi han iya kinaadman ginpahugpoy niya an kalawdan, ngan iginbutang didto an mga puro.

²⁴Nagsumat an mga parasakay ha kadagatan hiunong han mga kataragman ha dagat, ngan namamati kita han ira susumaton ha dako nga paghipausa!

²⁵May mga urosahon nga mga binuhat didto ha dagat, mga dagko nga mananap ngan nagtanan nga mga buhi nga binuhat.

²⁶Nagtutuman an tagsa nga sinugo han GINOO han iya buruhaton, diri nagbuburublag an ngatanan pinaagi han iya pulong.

²⁷Diri gud naton matatapos an bisan ano nga aton masisiring, kundi amo la ini an karuyag sidngon: an GINOO amo an kahingpitan han ngatanan nga mga butang.

²⁸Uunanhon naton hin pakaagi han gahom hin pagdayaw ha iya? Labaw gud hiya han ngatanan nga iya mga binuhat.

²⁹Makatarag-ob an GINOO dida han iya pagkagamhanan, nakakaluob an iya gahom.

³⁰Bisan kon buhaton mo an gimamaupayi hin pagdayaw ha iya, larolabaw pa gud hiya han imo igsusumat. Bisan kon pasidunggan mo hiya hin waray paghunong, ngan ha bug-os mo nga kusog, diri ka gud gihapon makakagdayaw hin igo ha iya.

³¹Waray pa nakakita ha iya, waray makakagsaysay ha iya; waray makakagdayaw ha iya, sugad han angay ha iya.

³²Diri pa gud hinbabaroan an mga urosahon nga larolabaw hini, gutiay la an aton hinbabaroan han iya mga ginbuhat.

³³Ginhimo han GINOO an ngatanan nga mga butang, ngan naghatag hiya hin kinaadman ngadto han mga dyosnon nga tawo.