Read Waray Samarenyo Meaning Based Sirac 44 Bible Online

Sirac 44 - Waray Samarenyo Meaning Based bible

Sirac 44

¹Ipinakita ha Kasaysayan an Gahom han Dyos Sanglit pagdayawa ta yana an dyosnon[136] nga mga tawo, an aton ginikanan han naglabay nga mga katulinan,

²mga tawo nga ginpasidunggan han GINOO pinaagi hin dako nga dungog, ngan hinkit-an dida ha ira an iya kagamhanan, tikang pa ha tinikangan.

³May naghadi hin mga ginhadian, ngan kinilala an iba tungod han ira kusog. May mag-aram nga mga magsaragdon, ngan nagyakan hin mga panagna an iba.

⁴May mga tawo ha pamunoan nga nagmando han mga tawo pinaagi han ira mga sagdon, mga punoan nga nagpagawas hin mga sugo,[137] mga mag-aram nga naghihimangraw hin mga pulong nga puno hin kinaadman,[138] ngan adton mga nagamit hin higlarom nga mga darahonon,[139]

⁵mga parasiday, ngan parahimo hin musika,

⁶mga riko ngan gamhanan nga mga tawo nga nag-uokoy nga murayaw ha ira balay.

⁷Mga bantogan ini ngatanan ha ira kalugaringon nga panahon, ngan ginpasidunggan han mga tawo han ira panahon.

⁸May-ada mga tawo nga nagbilin hin kabantogan, ngan gindadayaw pa gihapon hin mga tawo ngada yana.

⁹May iba nga diri na hinunumdoman, sugad hin waray hira mag-ukoy dinhe ha kalibutan, nga namatay ngan hinngalimtan hira upod an ira mga anak nga nasunod ha ira.

¹⁰Kundi pagdadayawon ta ini nga dyosnon nga mga tawo, kanay magtadong nga mga binuhatan, diri gud hingangalimtan.

¹¹Pagsusundon han ira mga tulin an ira kabantogan, ngan amo ini an ira panurondon.[140]

¹²Nagpapadayon an ira mga tulin nin pagtuman han Ginsaaran ngan dayuday magtutuman han ginbuhat han ira mga ginikanan.

¹³Magpapadayon gud an mga kaliwat han ira panimalay, ngan diri gud mapapara an ira kabantogan.

¹⁴Iginlubong na an ira mga lawas, kundi magpapadayon ha kagihapunan, an ira mga ngaran.

¹⁵Magsusumat an mga nasod hiunong han kinaadman hini nga mga tawo, ngan pagdadayawon hira han mga tawo han Dyos. Hi Enoc

¹⁶Nakalipay hi Enoc han GINOO ngan ikinayab hiya ngadto ha langit. Nagin susbaranan hiya hin pagbasol para han ngatanan nga panahon nga tiarabot. Hi Noe

¹⁷Matadong gud nga tawo hi Noe. Kahuman han kapuo han mga tawo pinaagi hin lunop, gintagan niya hin bag-o nga pagtikang[141] an bug-os nga katawhan. Tungod ha iya may-ada mga tawo nga nanhibilin ha tuna han kahuman na han lunop.

¹⁸Naghimo an GINOO hin dayon nga ginsaaran ha iya, ngan nagsaad nga diri na gud pagpupuohon an kinabuhi pinaagi hin lunop. Hi Abraham

¹⁹Hi Abraham amo an gamhanan nga ginikanan hin damo nga mga nasod; waray gud iginsuson han iya dungog.[142]

²⁰Gintuman niya an Balaod han Gihahataasi ngan naghimo hin Ginsaaran ha iya, usa nga Ginsaaran nga igintigaman dida han iya lawas. Hinsabutan hiya nga matinumanon dida han pag-arihi ha iya.

²¹Sanglit ginsaaran hiya han GINOO nga an iya mga tulin mahihimo nga kaupayan para han kalibutan, nga diri maiihap an ira kadamo, sugad han tapotapo han tuna; nga pagpapasidunggan hira labaw pa kay han iba nga mga tawo ha tuna; nga an kadagatan amo an pag-ultan han ira katunaan, tikang han Eufrates ngadto ha mga kataposan han tuna. Hira Isaac ug Jacob

²²Ginbag-o han GINOO ito nga Ginsaaran kan Isaac ngan ginbag-o liwat kan Jacob, nga ginliwat pagbalik an saad nga mahihimo nga kaupayan an tulin ni Abraham para han ngatanan nga katawhan. Ginpatapod hi Jacob han GINOO nga pagpapakaupayon hiya. Iya gintagan hi Jacob han tuna nga iya panurondon, nga ginbahinbahin ini ngadto hin 12 ka malon, usa ka malon para han tagsa nga iya mga anak.